Read Nguna Togoa Etafe North 2 KRONIKEL MAGA 16 Bible Online

2 KRONIKEL MAGA 16 - Nguna Togoa Etafe North bible

2 KRONIKEL MAGA 16

¹Natau kerualima dolu tamate latesa ni namaramaraana ki Asa, Baasha nawota ni Israel e sake pano dip̃a Yudah, po davagi Ramah, nalakena e da suasua ki te naata naga ega tave pano kite sili umai punusi Asa nawota ni Yudah mau.

²Go Asa e dape lua silver, go kold m̃elu dua ki nasum̃a ni natauakiana ni naleo wia maga ni nasum̃a ki Yehovah, go ni nasum̃a ki nawota, po dip̃aki lua ra pano dua Ben‐hadad nawota ni Siria asa, waina e doko Damaseko doko,

³e naga, Navasasokiana sikai e doko namawota kakagida, dapala waina e doko namawota ni tamagu go ni tamam̃a: p̃a leo, a po dip̃aki lua dua ko silver go kold; p̃a vano, p̃a mari kotovi navasasokiana anigo waina ku mari a paki Baasha nawota ni Israel, naga ega m̃elu dua kinau pano.

⁴Go Ben‐hadad e dogo parati ki nawota Asa, po dip̃aki lua tea maraki maga ni taua navakalo aneana maga pano naga euga marimari dip̃a natokoana maga ni Israel; go eu atugi Iyon, go Dan, go Abel‐maim, go natokoana maga ni natauakiana maga mamau puti ni Naftali.

⁵Go e pakilina, ragi waina Baasha e dogo e, naga e doropusi natavagiana ni Ramah, go nawosiana aneana e makoto.

⁶Go nawota Asa e puati Yudah mamau; go eu dape lua pavakoto vatu maga ni Ramah, go napapa kakana, waina Baasha e mari natavagiana asa; go e davagi Ceba go Mispah asa.

⁷Go doko ragi sikai maau wanogoe Hanani tea kikita, e umai punusi Asa nawota ni Yudah, po noa ki nia, e naga, Nalakena nigo ku pavatu nawota ni Siria, go ku da pavatu Yehovah, Sup̃e anigo mau, nalakena tea wanogoe taua navakalo ki nawota ni Siria eu sava m̃elu dua ki nam̃elearum̃a pano.

⁸Naatam̃oli maga ni Ethiopia go ni Lubim eu da pei taua navakalo warua liu sikai, pilake kariot maga go naatam̃oli maga ni horse eu laapa liu, kite? Ma ku pavatu Yehovah, e pei nalakena e pitua ki da paki nam̃elearum̃a.

⁹Nalakena namata ni Yehovah ero do leo dalitaliepu usuraki maramana mamau, naga ega tum̃ana pisei ki nia naga e magi tea maga waina nap̃op̃oda e p̃ialua paki nia, pei nakasuaana. Tea waina nigo ku po mari a e pei tea ni navei‐lala‐ana; nalakena pae ragi waia pa pa pa, navakalo maga euga wo doko sikoti ko doko.

¹⁰Go Asa e maeto ki tea kikita wanogoe, po doropusi a paki nasum̃a ni navavaigoroana; nalakena e maeto ki nia nalo ni naleo wanogoe. Go Asa e diesoki narei seara ragi sikai maau wanogoe.

¹¹Go p̃a leo, nawosiana maga ki Asa, pae tea vea pa pa paki tea edaku, p̃a leo, eu pei tea midiriana tusi ki nawota maga ni Yudah go ni Israel.

¹²Go natau kerualima dolu tamate loveti ni namaramaraana aneana, Asa e sasana ki nasasanaana sa sikai natuana maga; nasasanaana aneana e sa p̃arua liu: ma doko nasasanaana aneana e da laaga Yehovah mau, ma e laaga nasilaeana ki naatam̃oli mari pauri maga.

¹³Go Asa e mate natau kerualima pati tamate sikai ni namaramaraana aneana go e maturu sikoti tamana maga.

¹⁴Go eu ova ki nia matigo aneana, waina e dum̃ana maneana dae a natokoana ki David, po lesi a e one nawewele waina e pura ki tea ni nap̃o wia visarasara maga, tea marim̃atakiana ki tea mari naroro lolo: go eu maneana mari natap̃arakiana warua liu sikai.