Read Nguna Togoa Etafe North 2 KRONIKEL MAGA 17 Bible Online

2 KRONIKEL MAGA 17 - Nguna Togoa Etafe North bible

2 KRONIKEL MAGA 17

¹Go natuna Yehoshafat e maramara du oli a, po dum̃ana mari a e kasua dip̃a Israel.

²Go e lawo ki taua maga ni navakalo eu doko sara natokoana p̃aakagoroana maga ni Yudah, po lawo ki tea vavaigoro maga doko navanua ni Yudah, go natokoana maga ni Efraim, waina tamana Asa e puati ra.

³Go Yehovah e sikoti Yehoshafat, nalakena e surata napua vea maga ki tamana David, go e da laaga paki Baal maga mau;

⁴Ma e laaga Sup̃e ki tamana, po surata natip̃akiana aneana maga, po da dausi natomariana maga ni Israel mau.

⁵Nalakena tea wanogoe Yehovah e lawosoki namarakiana doko nam̃elearuna; go Yudah mamau eu dape nasautoga maga umai dua Yehoshafat ara; go e peani nasogolapaana go nadodomadaganiana warua liu.

⁶Go nap̃op̃ona e kasua doko napua maga ki Yehovah: go e mari puoli ki tokora vakilagi maga go Asherah maga m̃elu dua ki Yudah.

⁷Go natau ketolu ni namaramaraana aneana, e dip̃aki lua tea maraki aneana maga pano, Ben‐hail, go Obadiah, go Sekariah, go Nethanel, go Mikaiah, naga euga vei tea vasapiseiki maga doko natokoana maga ni Yudah;

⁸Nara ma naworawora ni Levi, Shemaiah, go Nethaniah, go Sebadiah, go Asahel, go Shemiramoth, go Yehonathan, go Adoniyah, go Tobiyah, go Tob‐adoniyah, nara naworawora ni Levi, go Elishama go Yehoram tea viri maga.

⁹Go eu pei tea vasapiseiki maga doko Yudah, go tusi ni nawotaeana ki Yehovah e doko nam̃elearuda; go eu surata duaduru sara natokoana maga mamau puti ni Yudah, po do pasa pisei ki narei.

¹⁰Go namatau‐ki‐Yehovah‐ana e dowo paki sara namarakiana maga ni navanua maga waina eu doko dalivirigoro Yudah, go eu da moro mari navakalo dip̃a Yehoshafat mau.

¹¹Go Filistine maga seara kakada eu magi Yehoshafat dape navituaana maga, go silver umai e pei nasautoga; go tea ni Arabia eu maneana dape navata maga umai, shiip anoai manu larua go p̃onotia larua, go naninani anoai manu larua go p̃onotia larua.

¹²Go Yehoshafat e disu po p̃arua liu; go e davagi nasum̃a ni p̃aaka maga, go natokoana maga ni natauakiana maga doko Yudah.

¹³Go e peani nawosiana visarasara maga doko natokoana maga ni Yudah; go naatam̃oli maga ni navakalo, naatam̃oli kasua maga ni namarimatuaana doko Yerusalem.

¹⁴Go tea waia e pei naveveana kakada pae nasum̃a maga ni tamada maga: ni Yudah, tea maraki maga ni manu maga; Adnah tea maraki, go naatam̃oli kasua maga ni namarimatuaana manu p̃onotia dolu:

¹⁵Go kerua Yehohanan, tea maraki, go naatam̃oli manu p̃onotia dua go tivilia takuna latolu.

¹⁶Go ketolu Amasiah natu ni Sikri, waina e suasua dum̃ana pitua ki nia paki Yehovah; go naatam̃oli kasua maga ni namarimatuaana manu p̃onotia dua:

¹⁷Go ni Benyamin; Eliada naatam̃oli kasua sikai ni namarimatuaana, go naatam̃oli manu p̃onotia dua, waina eu puati naasu go nakokoro:

¹⁸Go kerua Yehosabad, go naatam̃oli manu p̃onotia sikai go tivilia takuna latolu waina eu mari m̃ata sua raki navakalo.

¹⁹Tea maga wanogoe eu doko nasuasuaana ki nawota, eu masale ki tea maga waina nawota e lawo ki da doko natokoana p̃aakagoroana maga usuraki Yudah mamau.