Read Nguna Togoa Etafe North 2 KRONIKEL MAGA 18 Bible Online

2 KRONIKEL MAGA 18 - Nguna Togoa Etafe North bible

2 KRONIKEL MAGA 18

¹Go Yehoshafat e peani nasogolapaana go nadodomadaganiana warua liu; go e mari navasasokiana sikai sikoti Ahab.

²Go edaku ki natau seara, e siwo paki Samaria pano punusi Ahab. Go Ahab e maneana mari punue taua warua sikai ni shiip go ni oks maga, go magi narei aneana waina eu mamau pano, po pasadie a naga eroga wo dua sake paki Ramoth‐cilead pano.

³Go Ahab nawota ni Israel e noa ki Yehoshafat nawota ni Yudah, e naga, Toroga rua paki Ramoth‐cilead pano, kite? Go e pasadara e, po naga, Kinau ma nigo, go narei aginau ma narei anigo; go tuga mamau paki navakalo.

⁴Go Yehoshafat e noa ki nawota ni Israel, e naga, Ma tea vea, a pavara ni ko asa, p̃a vusuusu ki navasaana ki Yehovah.

⁵Go nawota ni Israel e piragi saisai ki profeta maga, naatam̃oli p̃onotia pati, po noa ki da, e naga, Auga vaki Ramoth‐cilead pano po mari navakalo, kite aga soki doko? Go eu naga, Kuga sake pano, nalakena Sup̃e ega wo pitua ki nia paki nam̃elearu ni nawota.

⁶Ma Yehoshafat e naga, Profeta sikai ki Yehovah e da doko nea mau, naga tuga vusuusu paki nia, kite?

⁷Go nawota ni Israel e noa ki Yehoshafat, e naga, Naatam̃oli sikai e ko doko, waina tu mariatae pusuusu paki nia ki Yehovah: ma kinau a pilosi a; nalakena e da maginau peanoasai tea wia mau nalo kakagu, ma tea sa sara ragi: nae e pei Mikaiah natu ni Imla. Go Yehoshafat e naga, Nawota ega ta noa dapala nogoe mau.

⁸Go nawota ni Israel e soso tasiga sikai umai, po naga, P̃a m̃araverave paraki Mikaiah natu ni Imla umai punusi au.

⁹Go nawota ni Israel go Yehoshafat nawota ni Yudah ero sikasikai dasake malo tasake adeada doko, ero suni tea kovagoro adeada maga, go ero dasake doko tokora welewelea sikai doko tokora ni nasiliana ni namata‐pua ni Samaria; go profeta maga mamau puti eu do peanoasai naraeda.

¹⁰Go Sedekiah natu ni Kenaanah e dum̃ana maneana mari napati maga ni airon, po naga, Yehovah e noa dapala nea, e naga, Pae tea maga waia p̃a wo dip̃a tea ni Siria pa pa euga wo pei tea mari‐puoli‐kiana.

¹¹Go profeta maga mamau puti eu peanoasai dapala nea, eu naga, P̃a sake paki Ramoth‐cilead pano, po mari matua: nalakena Yehovah ega wo pitua ki nia paki nam̃elearu ni nawota.

¹²Go tea tautauana waina e pano naga ega soso Mikaiah umai, e noa ki nia, e naga, P̃a leo, nanoaana maga ki profeta maga eu peanoasai tea wia paki nawota ki nawoka sikai maau: nalakena tea wanogoe, a pavara ni ko asa, nanoaana anigo ega tapala tea adeada, go p̃a vasa tea wia.

¹³Go Mikaiah e naga, Yehovah e mauri, go tea waina Sup̃e aginau ega noa e, tea wanogoe kinau aga wo noa e.

¹⁴Go ragi waina e umai punusi nawota, nawota e noa ki nia, e naga, Mikaiah, auga vaki Ramoth‐cilead pano po mari navakalo, kite aga soki doko? Go e naga, Kuga sake pano, po mari matua; go euga wo pei tea vituakiana paki nam̃elearumu.

¹⁵Go nawota e noa ki nia, e naga, Kinau aga vaka visa pasasoki ko naga p̃a ta noa kinau naleo p̃alo mau, ma nalomauana ega sikina doko nagisa ni Yehovah?

¹⁶Go e naga, Kinau a punusi Israel mamau eu daperavera usuraki tava maga, dapala shiip waina tea leo parati ki da e dika: go Yehovah e naga, Tea maga wanogoe eu dika ki tea maraki; euga liliu sara naata sikasikai paki nasum̃a adeada pano doko natam̃ateana.

¹⁷Go nawota ni Israel e noa ki Yehoshafat, e naga, Kinau a da noa ki‐go asa naga ega wo da peanoasai nalo ni tea wia paki nau mau, ma ki tea sa, kite?

¹⁸Go e naga, Nalakena tea wanogoe kuga rogo navasaana ki Yehovah: a punusi Yehovah e dasake doko malo tasake aneana, go taua mamau ni nakoroatelagi eu lawodu matuana go mawirina.

¹⁹Go Yehovah e naga, Sei ega wo surue Ahab nawota ni Israel naga ega sake pano po dowo Ramoth‐cilead? Go tea sikai e pasa dapala tea waia, go tea p̃ota sikai e pasa dapala tea wanana.

²⁰Go naatana sikai e dave umai, po lawodu narae ni Yehovah, po naga, Kinau aga wo surue a. Go Yehovah e noa ki nia, e naga, Ki nasava?

²¹Go e naga, Aga wo dave pano, po pei naatana sorosoro sikai nawoka ni profeta aneana maga mamau puti. Go e naga, P̃a wo surue a, go p̃a wo mari matua: p̃a m̃elu pano, po mari dapala nogoe.

²²Nalakena tea wanogoe, p̃a leo, Yehovah e doropusi naatana sorosoro sikai e doko nawoka ni profeta anigo maga waia; go Yehovah e pasa tea sa nalo kakam̃a.

²³Go Sedekiah natu ni Kenaanah e umai paki m̃aladigi, po dapagi nap̃oro ni Mikaiah, po naga, Dapale sava naata ni Yehovah e m̃elu au pano naga ega vasa ki‐go?

²⁴Go Mikaiah e naga, P̃a leo, p̃a wo atae a naaleatia sikai, ragi waina p̃a vaki em̃ago tukituki sikai naga p̃a tokoloku asa.

²⁵Go nawota ni Israel e naga, Kuga vuati Mikaiah, po piragi a ega liliu pa punusi Amon, tea maramara ni natokoana, go Yoash nawota natuna;

²⁶Po naga, Nawota e noa dapala nea, e naga, P̃a toropusi naatam̃oli waia ega toko nasum̃a ni navavaigoroana, po pagani a ki navinaga ni narogokitesaana, go ki noai ni narogokitesaana, pa pa aga liliu umai doko natam̃ateana.

²⁷Go Mikaiah e naga, Ku pe liliu umai doko natam̃ateana, Yehovah e pe ta pasa pae nawokagu mau. Go e naga, Kuga taki dorogo, nimu narei maga mamau puti.

²⁸Go nawota ni Israel ma Yehoshafat nawota ni Yudah ero sake paki Ramoth‐cilead pano.

²⁹Go nawota ni Israel e noa ki Yehoshafat, e naga, Kinau aga wo pilip̃o po pei naatam̃oli p̃ota, po paki navakalo pano; ma nigo p̃a suni sugoro kovagoro anigo maga. Go nawota ni Israel e pilip̃o po pei naatam̃oli p̃ota; go ero paki navakalo pano.

³⁰Go nawota ni Siria e dip̃aki tea maraki maga ni kariot aneana maga, e naga, Kuga ta marimari paki tea vakitano kite tea vakilagi mau, ma paki nawota ni Israel ega sikina.

³¹Go e pakilina, ragi waina tea maraki maga ni kariot maga eu punusi Yehoshafat, naga eu noa, E pei nawota ni Israel. Nalakena tea wanogoe eu maradoa naga euga marimari dip̃a e: ma Yehoshafat e kua pioso, go Yehovah e silae a; go Sup̃e e mari ra naga eu m̃elu dua ki nia pano.

³²Go e pakilina, ragi waina tea maraki maga ni kariot maga eu punusi naga e da pei nawota ni Israel mau, naga eu liliu po da moro kopasi a mau.

³³Go naatam̃oli sikai e dipe dago, po dipe p̃ai nawota ni Israel namawota ni naweluki ni suguro ni vatu aneana: nalakena tea wanogoe e noa ki tea wowolau ni kariot aneana, e naga, P̃a roa nam̃elearum̃a, po dape lua au m̃elu dua ki taua ni navakalo pano; nalakena a dogokitesa p̃arua.

³⁴Go navakalo wanogoe e disu po p̃arua naaleatia wanogoe: go nawota ni Israel e doko leana doko kariot aneana narae ni tea ni Siria maga pa pa paki ragi melu: go ragi waina e pei m̃aladigi naga elo ega musu, e mate.