Read Nguna Togoa Etafe North 2 KRONIKEL MAGA 24 Bible Online

2 KRONIKEL MAGA 24 - Nguna Togoa Etafe North bible

2 KRONIKEL MAGA 24

¹Yoash e pei tea ni natau larua ragi waina e pae asa maramara; go e maramara Yerusalem natau rualima pati: go p̃ilana nagisana Sibiah ni Beer‐sheba.

²Go Yoash e mari tea waina e leana namata ni Yehovah naaleatia maga mamau puti ki Yehoiada tea viri.

³Go Yehoiada e maneana puati nagoroi dua; go e pesi natuna naanoai maga go natuna nagoroi maga.

⁴Go e pakilina edaku ki tea wanogoe, naga Yoash e midoa ki nia naga ega tavagi piri nasum̃a ki Yehovah.

⁵Go e piragi saisai ki tea viri maga go naworawora ni Levi, po noa ki da, e naga, Kuga tave pano paki natokoana maga ni Yudah, po dape m̃ane m̃elu Israel mamau, naga tuga tavagi piri nasum̃a ki Sup̃e animu pae natau paki natau, go kuga mari m̃araverave asa. Ma naworawora ni Levi eu da mari m̃araverave asa mau.

⁶Go nawota e soso nap̃auda Yehoiada umai, po noa ki nia, e naga, Ekasana ku da datago paki naworawora ni Levi naga euga viragi umai m̃elu Yudah go m̃elu Yerusalem nasautoga waina Moses tea suasua ki Yehovah, go nasaisaiana mamau ni Israel eu pitip̃aki asa, raki tap̃aup̃au ni nanoasokisokiana?

⁷Nalakena Athaliah, nagoroi sigisigileo waina, natuna maga eu sili pavakoto nasum̃a ki Sup̃e; go naleo tapu maga mamau puti ni nasum̃a ki Yehovah, eu pitua ki da paki Baal maga.

⁸Go nawota e pitip̃aki, go eu mari bokes sikai, po lawo ki nia katama doko namata‐pua ni nasum̃a ki Yehovah.

⁹Go eu dogorogo ki narogorogoana sikai usuraki Yudah go Yerusalem naga euga viragi umai dua Yehovah nasautoga waina Moses tea suasua ki Sup̃e e doropusi a e doko Israel masop̃alo.

¹⁰Go tea maraki maga go narei mamau puti eu laelaea, po piragi umai, po do nadi paki ekopu ni bokes wanogoe, pa pa e nopu.

¹¹Go e doko, ragi waina naworawora ni Levi eu dape bokes wanogoe umai punusi tasiga maga ki nawota, go ragi waina eu punusi naga e pura ki m̃ane, naga tea midiri ki nawota go tasiga ki tea viri warua liu ero umai po daki bokes wanogoe, po moro dape a liliu paki naliana pano. Eu do mari dapala nogoe sara naaleatia, po pila saisai ki p̃arua ki m̃ane.

¹²Go nawota go Yehoiada ero pitua ki nia paki tea maga waina eu mari nawosiana ni nasuasuaana ni nasum̃a ki Yehovah; go eu pasadapui tea mataisau ni vatu maga go mataisau maga naga euga tavagi piri nasum̃a ki Yehovah, go tea wosiwosi maga ni airon go ni brass naga euga tavagi piri nasum̃a ki Yehovah.

¹³Go naatam̃oli wosiwosi maga eu p̃osiwosi, go nawosiana e disu p̃ia pae nam̃elearuda, go eu mari nasum̃a ki Sup̃e e moro p̃ia dapala sala vea, po mari a e moro kasua.

¹⁴Go ragi waina nawosiana kakana e nopu, eu dape namagovai ni m̃ane waina e ko doko, eu dape a umai paki narae ni nawota go ni Yehoiada, go eu mari lasa maga asa raki nasum̃a ki Yehovah, lasa maga raki nasuasuaana, go raki navituaana tap̃arakiana, go spun maga, go lasa maga ni kold go ni silver. Go eu pitua ki navituaana tap̃arakiana maga pitip̃atip̃a nasum̃a ki Yehovah, naaleatia maga mamau puti ki Yehoiada.

¹⁵Ma Yehoiada e po matua p̃arua, po pura ki naaleatia laapa, go e mate; e pei tea ni natau p̃onotia sikai rualima takuna dolu ragi waina e mate.

¹⁶Go eu ova ki nia natokoana ki David m̃aleoputo ni nawota maga, nalakena e mari tea waina e p̃ia doko Israel, go paki Sup̃e go nasum̃a aneana.

¹⁷Go edaku ki namateana ki Yehoiada, tea maraki maga ni Yudah eu rumai, po kolo suai natano paki nawota. Go nawota e daki dorogo paki da.

¹⁸Go eu doropusi nasum̃a ki Yehovah, Sup̃e ki tamada maga, po magi Asherah maga go idolo maga suasua: go namaritausuana e dowo Yudah go Yerusalem nalakena natapiriana adeada wanogoe.

¹⁹Ma e moro dip̃aki lua profeta maga pa punusi ra, naga euga moro piragi liliua ki da umai punusi Yehovah; go nara eu noasokisoki dip̃a ra: ma eu da suasua naga euga taki nadaligada mau.

²⁰Go Naata ni Sup̃e e puvua umai doko Sekariah natu ni Yehoiada tea viri; go e lawodu elagi narae ni narei, po noa ki da, e naga, Sup̃e e noa dapala nea, e naga, Ekasana nimu ku do dapiri natip̃akiana maga ki Yehovah, dapala waina kuga ta doko p̃ia mau? Nalakena nimu ku doropusi Yehovah, nae ma e doropusi mu.

²¹Go eu mari nasekeana dip̃a e, go pae natip̃akiana ki nawota, eu nadi a ki vatu maga roara ni nasum̃a ki Yehovah.

²²Dapala nogoe nawota Yoash e da midoa ki nadodomiana waina tamana Yehoiada e mari a paki nia mau, ma e atugi natuna. Go ragi waina e mate, e naga, Yehovah ega vunusi a, po datagovi a asa.

²³Go e pakilina doko namatap̃ago ni natau, naga taua navakalo ni tea ni Siria eu sake umai dip̃a e: go eu rumai paki Yudah go Yerusalem, po mari sa sa ki puti tea maraki maga ni narei m̃elu dua ki m̃aleoputo ni narei maga, po dip̃aki lua tea vuti‐lua‐pavakotoana kakada mamau puti paki nawota ni Damaseko.

²⁴Nalakena taua navakalo ni tea ni Siria eu pei taua kiki sikai umai; go Yehovah e pitua ki taua warua liu sikai paki nam̃elearuda, nalakena eu doropusi Yehovah, Sup̃e ki tamada maga. Dapala nogoe eu mari navasap̃otaeana paki Yoash.

²⁵Go ragi waina eu m̃elu dua ki nia pano, (nalakena eu doropusi a e doko e sasana p̃arua,) tea suasua aneana maga eu mari nasekeana dip̃a e, nalakena nada ni natu ni Yehoiada tea viri, go eu atugi a nawewelena, go e mate: go eu ova ki nia natokoana ki David, ma eu da ova ki nia matigo maga ki nawota maga mau.

²⁶Go tea maga waina eu mari nasekeana dip̃a e, eu pei tea maga waia; Sabad natu ni Shimeath, nagoroi sikai ni Ammon, go Yehosabad natu ni Shimrith, nagoroi sikai ni Moab.

²⁷Go nalo ni natuna maga, go ni nawaruaana ni natapetapeana maga waina eu madaga doko asa, go ni natavagi‐piri‐ana ni nasum̃a ki Sup̃e, p̃a leo, nara eu pei tea midiriana tusi ni naatusiana ki nawota maga. Go natuna Amasiah e maramara du oli a.