Read Nguna Togoa Etafe North 2 KRONIKEL MAGA 25 Bible Online

2 KRONIKEL MAGA 25 - Nguna Togoa Etafe North bible

2 KRONIKEL MAGA 25

¹Amasiah e pei tea ni natau rualima dua tamate lima ragi waina e pae asa maramara; go e maramara Yerusalem natau rualima dua tamate loveti: go p̃ilana nagisana Yehoadan ni Yerusalem.

²Go e mari tea waina e leana namata ni Yehovah, ma da mari a ki p̃op̃o wialua sikai mau.

³Go e pakilina, ragi waina namarakiana e po pei tea lawo‐sokiana doko nam̃elearuna, naga e atugi tea suasua aneana maga waina eu mari punue tamana nawota.

⁴Ma e da doropusi natuda maga paki namateana mau, ma e mari pataka ni tea waina e pei tea midiriana nawotaeana doko tusi ki Moses, dapala waina Yehovah e pitip̃aki asa, doko do naga, Tamada maga euga ta mate oli natuda maga mau, go natuda maga euga ta mate oli tamada maga mau; ma sara naata euga sikasikai mate nalakena namarinaleosaana adeada.

⁵Go Amasiah e piragi saisai ki naatam̃oli maga ni Yudah, po lawo ki da pae nasum̃a ki tamada maga, eu doko etano ki tea maraki maga ni manu maga go ki tea maraki maga ni p̃onotia maga, Yudah go Benyamin mamau: go e peve parati ki da, tea ni natau rualima dua go do liu, po pap̃ai ra eu pei naatam̃oli matadoaana manu p̃onotia dolu, waina eu pataka naga euga tave paki navakalo pano, waina eu mariatae puati naio go nakokoro.

⁶Go e moro pasadapui naatam̃oli marimatua maga ni navakalo manu p̃onotia sikai m̃elu Israel ki silver talenta p̃onotia sikai.

⁷Ma naatam̃oli sikai ki Sup̃e e umai punusi a, po naga, Nawota O, p̃a ta suasua ki taua navakalo ni Israel naga euga sikoti ko pano mau; nalakena Yehovah e da sikoti Israel, Efraim natuna maga mau.

⁸Ma ku pe midoa ki nia naga p̃a vano, p̃a viviari pano, p̃a mari kasua paki navakalo: Sup̃e ega wo nadi ki‐go pakitano narae ni tea kokona; nalakena Sup̃e e peani navei‐nawotaana naga ega silae, go naga ega nadi ki pakitano.

⁹Go Amasiah e noa ki naatam̃oli ki Sup̃e, e naga, Ma auga mari nasava nalo ni talenta p̃onotia sikai waina a po pitua ki nia paki taua navakalo ni Israel? Go naatam̃oli ki Sup̃e e pasadara, po naga, Yehovah e mariatae dua ko tea waina e p̃arua liu tea wanogoe.

¹⁰Go Amasiah e dap̃otae ra, taua ni navakalo nogo waina eu m̃elu Efraim umai punusi a, naga euga moro liliu paki kiada pano: nalakena tea wanogoe namaetoana adeada e pavaga p̃arua dip̃a Yudah, go eu liliu paki kiada namaetoana adeada e p̃arua.

¹¹Go Amasiah e marasike, go e maraki narei aneana eu dave pano, po paki Nap̃aloa ni Natasimena pano, po atugi Seir natuna maga tivilia sikai kakada.

¹²Go Yudah natuna maga eu pua pavakoto pulemauri ki tivilia p̃ota sikai kakada, po piragi ra sake paki nam̃asua ni vatu laketoko, po nadi ki da siwo pae nam̃asua ni vatu laketoko pakitano pano, go eu mamau puti pei tea mari p̃oraworaeana.

¹³Ma naatam̃oli maga ni navakalo waina Amasiah e dip̃aki da liliu, naga euga ta sikoti a paki navakalo mau, nara eu dowo paki natokoana maga ni Yudah, pae Samaria pano pa pa liliu Beth‐horon, po atugi ra naatam̃oli manu dolu kakada, po dape pavakoto tea vuti‐lua‐pavakotoana warua.

¹⁴Go e pakilina, ragi waina Amasiah e atugi sua naworawora ni Edom go e moro liliu umai, naga e dape sup̃e maga ki Seir natuna maga umai, po lawo ki da naga euga vei sup̃e aneana maga, go e kolo suai natano naraeda, po dap̃ara ki tea ni nap̃o wia paki da.

¹⁵Nalakena tea wanogoe namaetoana ki Yehovah e pavaga dip̃a Amasiah, go e dip̃aki lua profeta sikai pano punusi a, waina e noa ki nia, e naga, Ekasana ku laaga dausi sup̃e maga ki narei waina eu mari sa dum̃ada pualua narei adeada m̃elu dua ki nam̃elearum̃a mau?

¹⁶Go e pakilina, ragi waina e ko do pasa paki nia, naga nawota e noa ki nia, e naga, Kinami au mari ko ku pei tea vusum̃aki sikai ki nawota, kite? P̃a soki du; ekasana p̃a wo pei tea atugiana? Go profeta wanogoe e soki du. Go e naga, Kinau a atae naga Sup̃e e midoaki p̃otae naga ega mari sa ki‐go, nalakena ku mari naleo wanogoe, go ku da daki dorogo paki navasaparatikiana aginau mau.

¹⁷Ragi wanogoe Amasiah nawota ni Yudah e daki dorogo paki navusum̃akiana, po dip̃aki lua pa punusi Yoash natu ni Yehoahas natu ni Yehu nawota ni Israel, po naga, P̃a umai, toroga tum̃agida leo paki gida, narae paki narae.

¹⁸Go Yoash nawota ni Israel e dip̃aki lua pa punusi Amasiah nawota ni Yudah, po naga, Namatagauta waina e doko Lebanon e dip̃aki lua pa punusi nakau sidar waina e doko Lebanon, po naga, P̃a vitua ki natum̃a nagoroi paki natugu naanoai naga ega vei anagoroi: go nalo tuavati mila sikai waina e doko Lebanon e do liu pano, go e pasi soki namatagauta wanogoe.

¹⁹Nigo ku naga, P̃a leo, kinau a atugi Edom; go nap̃op̃om̃a e dape ko pakilagi naga ku pasa pakavakae: ma p̃a toko kiam̃a doko; ekasana p̃a wo mari piriviri naga p̃a vei tea marisakiana, naga p̃a wo dowo nimu ma Yudah kuga mamau?

²⁰Ma Amasiah e da suasua naga ega taki dorogo mau; nalakena e pei tea ki Sup̃e, naga ega vitua ki da paki nam̃elearu ni tea kokona ki da maga, nalakena eu laaga dausi sup̃e maga ni Edom.

²¹Go Yoash nawota ni Israel e sake pano; go nara ma Amasiah nawota ni Yudah ero dum̃ada leo paki da, narae paki narae, doko Beth‐shemesh, waina e pei agi Yudah.

²²Go Yudah e pei tea mari‐matua‐kiana narae ni Israel; go eu sava sara naata sikasikai paki tap̃aup̃au adeada pano.

²³Go Yoash nawota ni Israel e piragi lua pavakoto Amasiah nawota ni Yudah natu ni Yoash natu ni Yehoahas doko Beth‐shemesh, po piragi a paki Yerusalem pano, go e dakai p̃aaka ni Yerusalem pae namata‐pua ni Efraim pano pa pa liliu namata‐pua ni naweluki, kubit p̃onotia pati.

²⁴Go e dape pavakoto kold mamau puti, go silver, go lasa maga mamau puti waina eu pei tea vap̃aiana doko nasum̃a ki Sup̃e, waina Obed‐edom e leo parati ki da, go naleo tauakiana wia maga mamau puti ni nasum̃a ki nawota, go tea vei manumanu maga, po liliu paki Samaria pano.

²⁵Go Amasiah natu ni Yoash nawota ni Yudah e mauri doko natau rualima sikai tamate lima edaku ki namateana ki Yoash natu ni Yehoahas nawota ni Israel.

²⁶Go nawosiana maga mamau puti ki Amasiah, tea vea go tea edaku, p̃a leo, eu da pei tea midiriana tusi ki nawota maga ni Yudah go ni Israel, kite?

²⁷Go pae ragi waina Amasiah e dawasi m̃elu dua ki narausi‐Yehovah‐ana pa pa, eu mari nasekeana sikai dip̃a e Yerusalem; go e sava paki Lakish pano: ma eu dip̃aki lua dausi a paki Lakish pano, po atugi a tokora wanogoe.

²⁸Go eu sawa ki nia nam̃adu ni horse po piragi a umai, po ova ki nia doko sikoti tamana maga natokoana ni Yudah.