Read Nguna Togoa Etafe North 2 KRONIKEL MAGA 27 Bible Online

2 KRONIKEL MAGA 27 - Nguna Togoa Etafe North bible

2 KRONIKEL MAGA 27

¹Yotham e pei tea ni natau rualima dua tamate lima ragi waina e pae asa maramara; go e maramara Yerusalem natau rualima sikai tamate latesa: go p̃ilana nagisana Yerushah, Sadok natuna nagoroi.

²Go e mari tea waina e leana namata ni Yehovah, dapala tea mamau puti waina tamana Ussiah e pea mari a: ma e da paki ekopu ni nasum̃a tapu ki Yehovah mau. Go narei eu do mari naleo sa.

³E davagi namata‐pua ni elagi ni nasum̃a ki Yehovah, go e sokari p̃arua ki natavagiana ni p̃aaka ni Ofel.

⁴Go e davagi natokoana maga navanua ni tava ni Yudah, go e davagi p̃aaka maga go tokora vakilagi maga mala ni nakau maga.

⁵Go e mari navakalo dip̃a nawota ki Ammon natuna maga, po mari matua ki da. Go natau wanogoe Ammon natuna maga eu dua e talenta ni silver p̃onotia sikai, go totowo ni whiit tivilia sikai, go ni barle tivilia sikai. Go totowo sikai maau wanogoe Ammon natuna maga eu moro dua e asa natau kerua go natau ketolu.

⁶Go Yotham e disu po kasua, nalakena e mari m̃ata ki napua aneana maga namata ni Yehovah, Sup̃e aneana.

⁷Go nawosiana maga mamau puti ki Yotham, go navakalo aneana maga mamau puti, go natomariana aneana maga, p̃a leo, eu pei tea midiriana tusi ki nawota maga ni Israel go ni Yudah.

⁸E pei tea ni natau rualima dua tamate lima ragi waina e pae asa maramara, go e maramara Yerusalem natau rualima sikai tamate latesa.

⁹Go Yotham e maturu sikoti tamana maga, go eu ova ki nia natokoana ki David: go natuna Ahas e maramara du oli a.