Read Nguna Togoa Etafe North 2 KRONIKEL MAGA 29 Bible Online

2 KRONIKEL MAGA 29 - Nguna Togoa Etafe North bible

2 KRONIKEL MAGA 29

¹Hesekiah e pae asa maramara ragi waina e pei tea ni natau rualima dua tamate lima; go e maramara Yerusalem natau rualima dua tamate loveti: go p̃ilana nagisana Abiyah, Sekariah natuna nagoroi.

²Go e mari tea waina e leana namata ni Yehovah, pataka ni tea mamau puti waina tamana David e pea mari a.

³Natau vea ni namaramaraana aneana, atelagi vea kakana, e p̃olagati namata maga ni nasum̃a ki Yehovah, po davagi piri ra.

⁴Go e soso tea viri maga go naworawora ni Levi eu moro umai, po piragi saisai ki da tokora welewelea waina e doko taleva ni elo sake,

⁵Po noa ki da, e naga, Kuga rogo au, nimu naworawora ni Levi O; kuga tum̃amu mari mu kuga tautau, go kuga mari nasum̃a ki Yehovah, Sup̃e ki tamamu maga ega tautau, go kuga tape lua naloaana m̃elu dua ki tokora tapu pano.

⁶Nalakena tamagida maga eu mari naleo sa, po mari tea waina e sa namata ni Yehovah Sup̃e anigida, go eu doropusi a, po doa naraeda pa dua ki tokora tokoana ki Yehovah, po atutaku.

⁷Go eu kokoro namata maga ni natara‐taup̃a, po mari punue nasulu maga, go eu da dap̃ara ki tea ni nap̃o wia kite pitua ki navituaana tap̃arakiana maga paki Sup̃e ki Israel tokora tapu mau.

⁸Nalakena tea wanogoe namaritausuana ki Yehovah e doko Yudah go Yerusalem, go e po pitua ki da naga euga vei tea duletuleakiana dapala napeao maga, naga euga vei tea ni nasaram̃akotoana sikai, go tea ni nasaram̃asikaana sikai, dapala waina namatamu maga eu punusi a.

⁹Nalakena kuga leo, tamagida maga eu dowo ki lova, go natugida naanoai maga go natugida nagoroi maga go nagoroi anigida maga eu pei tea viragi‐lua‐pavakotoana nalakena tea wanogoe.

¹⁰Go e doko nap̃op̃ogu naga aga mari navasasokiana sikai paki Yehovah, Sup̃e ki Israel, naga namaetoana vivitinu aneana ega liliu pa dua ki gida pano.

¹¹Nalakena tea wanogoe natugu maga, kuga mari m̃ata: nalakena Yehovah e matadoa mu naga kuga lawodu naraena, naga kuga maneana suasua, go naga kuga vei tea suasua aneana maga, po dap̃ara ki tea ni nap̃o wia paki nia.

¹²Go naworawora ni Levi eu duleana, Mahath natu ni Amasai, go Yoel natu ni Asariah, naworawora ni Kohath natuda maga seara kakada: go ki Merari natuna maga, Kish natu ni Abdi, go Asariah natu ni Yehallelel: go ni naworawora ni Cershon, Yoah natu ni Simmah, go Eden natu ni Yoah:

¹³Go ni Elisafan natuna maga, Shimri go Yeuel: go ni Asaf natuna maga Sekariah go Mattaniah:

¹⁴Go ni Heman natuna maga, Yehuel go Shimei: go ni Yeduthun natuna maga, Shemaiah go Ussiel.

¹⁵Go eu piragi saisai ki taida maga, po dum̃ada mari ra eu dautau, go eu paki ekopu, dapala natip̃akiana ki nawota pae navasaana maga ki Yehovah, naga euga mari nasum̃a ki Yehovah ega tautau.

¹⁶Go tea viri maga eu paki ekopu ni tokora tapu ni nasum̃a ki Yehovah, naga euga mari a ega tautau, go eu dape lua sara naloaana waina eu pap̃ai a doko nasum̃a tapu ki Yehovah pano paki roara ni nasum̃a ki Yehovah. Go naworawora ni Levi eu dape a paki etaku pano, paki noaisara Kidron.

¹⁷Go nakup̃a vea ni atelagi vea eu pae asa mari a ega tautau, go nakup̃a kelatolu ni atelagi wanogoe eu rumai paki natara‐taup̃a ni nasum̃a ki Yehovah; go eu p̃osiwosi naaleatia larua po mari nasum̃a ki Yehovah e dautau: go nakup̃a kerualima sikai tamate latesa ni atelagi vea wanogoe eu mari a e nopu.

¹⁸Go eu paki ekopu ni nasum̃a ni navei‐nawota‐ana pa punusi nawota Hesekiah, po naga, Au mari nasum̃a mamau ki Yehovah e dautau, go wede ni naviriana ni navituaana tap̃arakiana pilake lasa maga mamau puti kakana, go wede ni bred tokorae, pilake lasa kakana maga mamau puti.

¹⁹Go lasa maga mamau puti, waina nawota Ahas e mari puoli ki da ragi ni namaramaraana aneana, ragi waina e mari naleo sa, au mari m̃ata ki da po mari ra eu dautau, go p̃a leo, eu doko narae ni wede ni naviriana ki Yehovah.

²⁰Go nawota Hesekiah e duleana malip̃ogi loaloa, po piragi saisai ki tea maraki maga ni natokoana, po sake paki nasum̃a ki Yehovah pano.

²¹Go eu dape kau anoai larua, go shiip anoai larua, go shiip natuna larua, go naninani anoai larua, umai naga ega magi namarakiana go magi tokora tapu go magi Yudah pei navituaana sikai ni namarinaleosaana. Go e dip̃aki tea viri Aaron natuna maga naga euga vitua ki da wede ni naviriana ki Yehovah.

²²Go eu mari punue kau anoai maga, go tea viri maga eu dape nadana, po meseura ki nia wede ni naviriana: go eu mari punue shiip anoai maga, po meseura ki nadana wede ni naviriana: go eu mari punue shiip natuna maga, po meseura ki nadana wede ni naviriana.

²³Go eu dape naninani anoai maga ni navituaana ni namarinaleosaana umai paki m̃aladigi narae ni nawota go ni nasaisaiana; go eu doropusi nam̃elearuda maga ara:

²⁴Go tea viri maga eu mari punue ra, go eu mari navituaana sikai ni namarinaleosaana ki nadada wede ni naviriana, naga euga magi Israel mamau mari natap̃augoroana: nalakena nawota e pitip̃aki naga navituaana tap̃arakiana go navituaana ni namarinaleosaana eroga wo magi Israel mamau pei tea mariana.

²⁵Go e lawo ki naworawora ni Levi eu doko ekopu ni nasum̃a ki Yehovah eu pilake simbal maga, go salteri maga, go harp maga, pataka ni natip̃akiana ki David go ki Cad tea kikita ki nawota, go ki profeta Nathan: nalakena natip̃akiana wanogoe e pei tea ki Yehovah pae profeta aneana maga.

²⁶Go naworawora ni Levi eu lawodu eu pilake tea woka nagalo maga ki David, go tea viri maga eu pilake paiga maga.

²⁷Go Hesekiah e pitip̃aki naga euga vitua ki navituaana tap̃arakiana wede ni naviriana. Go ragi waina navituaana tap̃arakiana e po atulake, nalegaana ki Yehovah nae ma e atulake, go paiga maga go tea woka nagalo maga ki David nawota ni Israel.

²⁸Go nasaisaiana mamau eu lotu, go tea lega maga eu lega, go tea sui paiga maga eu sui paiga; tea mamau puti wanogoe eu do pano pa pa navituaana tap̃arakiana e nopu.

²⁹Go ragi waina eu mari sua navituaana go e nopu, nawota go tea mamau puti waina eu mamau doko tokora wanogoe doko, eu kolo suai natano po lotu.

³⁰Go nawota Hesekiah go tea maraki maga eu dip̃aki naworawora ni Levi naga euga lega samasama ni Yehovah ki navasaana maga ki David, go ki Asaf tea kikita. Go eu lega samasama pilake nalaelaeaana, go eu kusu ki nap̃auda po lotu.

³¹Go Hesekiah e pasadara, po naga, Ku po dum̃amu pakavuro nam̃elearumu paki Yehovah, go kuga umai paki m̃aladigi po dape naviriana maga go navituaana maga ni navasadodom̃atakiana umai paki ekopu ni nasum̃a ki Yehovah. Go nasaisaiana mamau eu dape naviriana maga umai go navituaana maga ni navasadodom̃atakiana; go tea maga mamau puti waina nap̃op̃oda eu suasua asa, eu dape navituaana tap̃arakiana maga umai.

³²Go naveveana ni navituaana tap̃arakiana maga, waina nasaisaiana e dape ra umai, e pei kau anoai rualima larua, go shiip anoai p̃onotia sikai, go shiip natuna p̃onotia dua: tea maga mamau puti wanogoe eu pei tea ni navituaana tap̃arakiana sikai paki Yehovah.

³³Go naleo tapu maga eu pei oks p̃onotia latesa go shiip manu dolu.

³⁴Ma tea viri maga eu pisa maau, go eu mari sa soe nawili ni navituaana tap̃arakiana maga mamau puti mau: nalakena tea wanogoe taida maga naworawora ni Levi eu silae ra, pa pa nawosiana e nopu, go pa pa tea viri maga eu dum̃ada mari ra eu dautau: nalakena naworawora ni Levi eu leana nap̃op̃oda liu tea viri maga, naga euga tum̃ada mari ra euga tautau.

³⁵Go navituaana tap̃arakiana maga eu laapa liu, pilake nap̃eletia ni navituaana maga ni natam̃ateana, go pilake navituaana takiana maga raki sara navituaana tap̃arakiana maga. Dapala nogoe nawosiana ni nasuasuaana ni nasum̃a ki Yehovah e pei tea marim̃ata‐ki‐ana pae totowo kakana.

³⁶Go Hesekiah e laelaea, nara ma narei mamau, nalakena tea waina Sup̃e e magi narei mari m̃ata ki nia: nalakena naleo wanogoe e pakilina m̃araverave.