Read Nguna Togoa Etafe North 2 KRONIKEL MAGA 3 Bible Online

2 KRONIKEL MAGA 3 - Nguna Togoa Etafe North bible

2 KRONIKEL MAGA 3

¹Go Solomon e pae asa davagi nasum̃a ki Yehovah Yerusalem doko tava Moriah, tokora waina Yehovah e pakilina ki tamana David asa, doko tokora waina David e mari m̃ata ki nia doko malo wokalesue ki Ornan naatam̃oli ni Yebus.

²Go e atulake natavagiana nakup̃a kerua ni atelagi kerua, natau kevati ni namaramaraana aneana.

³Go laketano maga waina Solomon e nadi ki da raki natavagiana ni nasum̃a ki Sup̃e, eu pei tea maga waia. Navarauana kakana pae totowo ni narowogiana ni tuai e pei kubit rualima latesa, go naweleweleana kakana kubit rualima dua.

⁴Go natara‐taup̃a waina e doko kivea ki nasum̃a, navarauana kakana e pataka sikai ma naweleweleana ni nasum̃a, e pei kubit rualima dua, go navarau‐pakilagi‐ana kakana p̃onotia sikai rualima takuna dua: go e pulutigoro e ekopu ki kold tautau.

⁵Go e duri nakau paine ekopu ni nasum̃a warua liu, po pulutigoro e ki kold tautau, po midiri nakau paama go namori maga asa.

⁶Go e dekei ki nasum̃a ki vatu wia maga ni naulu laapa raki narekeikiana: go kold wanogoe e pei kold ni Parvaim.

⁷Go e moro pulutigoro nasum̃a, tea walagoto maga, nakau tuasila maga, go namalo kakana maga, go namata sili kakana maga, ki kold; po dae midiria kerub maga doko namalona maga.

⁸Go e mari nasum̃a tapu liu; navarauana kakana e pataka sikai ma naweleweleana ni nasum̃a, e pei kubit rualima dua: go naweleweleana kakana e pei kubit rualima dua: go e pulutigoro e ki kold tautau, totowo kakana talenta p̃onotia latesa.

⁹Go totowo ni namadagaana ni tea tuturi maga shekel ni kold rualima lima. Go e pulutigoro em̃ago maga ni elagi ki kold.

¹⁰Go e mari kerub dua tea ni nawosiana ni nakau; go eu pulutigoro ra ki kold.

¹¹Go kerub dua wanogoe nalivaruda maga navarauana kakada kubit rualima dua: kerub sikai nalivaruna sikai e pei kubit elima, e dip̃a dogo namalo ni nasum̃a; go nalivaruna kerua e pataka sikai pei kubit elima, e dip̃a dogo nalivaru ni kerub kerua.

¹²Go kerub kerua nalivaruna sikai e pei kubit elima, e dip̃a dogo namalo ni nasum̃a: go nalivaruna kerua e moro pei kubit elima, e do dip̃a sokari nalivaru ni kerub vea.

¹³Kerub dua wanogoe nalivaruda maga eu dum̃ada pitosi ra pano kubit rualima dua: go ero lawodu natuada, go naraeda ero leo paki nasum̃a.

¹⁴Go e mari tea taugoro‐p̃otae ni tea malakesa loa, go tea miala‐kesakesa, go tea miala, go linen wia, po mari kerub maga asa.

¹⁵Go e mari tip̃a dua kivea ki nasum̃a, navaraupakilagi‐ana kakada kubit rualima dolu tamate lima, go nap̃auda kubit elima sikasikai.

¹⁶Go e mari namori maga ekopu ni tokora tapu, po lawo ki da doko nam̃asua maga ni tip̃a maga sikasikai; go e mari pomekranet p̃onotia sikai, po lawo ki da doko namori maga wanogoe.

¹⁷Go e sike lawo ki tip̃a dua wanogoe kivea ki nasum̃a tapu, sikai e doko taleva ni matua, go kerua e doko taleva ni mawiri; po salagisa ni tea waina e doko taleva ni matua ki Yakin, go tea waina e doko taleva ni mawiri ki Boas.