Read Nguna Togoa Etafe North 2 KRONIKEL MAGA 30 Bible Online

2 KRONIKEL MAGA 30 - Nguna Togoa Etafe North bible

2 KRONIKEL MAGA 30

¹Go Hesekiah e dip̃aki lua paki Israel mamau go paki Yudah, go e midiri tusi maga paki Efraim go Manasseh, naga euga umai paki nasum̃a ki Yehovah Yerusalem, naga euga vavaigoro navakalauana paki Yehovah Sup̃e ki Israel.

²Nalakena nawota go tea maraki aneana maga, go nasaisaiana mamau waina eu doko Yerusalem, eu peani navusum̃akiana naga euga vavaigoro navakalauana atelagi kerua.

³Nalakena eu mari sa pavaigoro e ragi kakana, nalakena tea viri maga waina eu pei tea mari‐dautau‐kiana, eu da patakana mau go narei eu ko da dum̃ada piragi saisai ki da Yerusalem mau.

⁴Go naleo wanogoe e leana namata ni nawota go ni nasaisaiana mamau.

⁵Go eu lawosoki natawonakiana sikai po dogorogo usuraki Israel mamau, pae Beer‐sheba pano pa pa liliu Dan, naga euga wo umai naga euga vavaigoro navakalauana paki Yehovah, Sup̃e ki Israel, Yerusalem: nalakena tea laapa eu da moro pavaigoro e dapala waina e pei tea midiriana.

⁶Go tea tautauana maga eu pano, eu dape tusi midiriana maga pae nawota go tea maraki aneana maga pano usuraki Israel mamau go Yudah, pataka ni natip̃akiana ki nawota waina e naga, Nimu Israel natuna maga O, kuga moro maradoa liliu paki Yehovah, Sup̃e ki Abraham, ki Isaak, go ki Israel, naga nae ma ega moro maradoa liliu paki mu namagovai kakamu waina ku pei tea mautiana m̃elu dua ki nam̃elearu ni nawota maga ni Assiria.

⁷Go kuga ta pei tea takiusi tamamu maga go taimu maga mau, waina eu dapiri dip̃a Yehovah, Sup̃e ki tamada maga, dapala waina e pitua ki da paki nasaram̃asikaana, dapala waina ku punusi a.

⁸Go kuga ta pei tea noa kasua dapala tamamu maga mau; ma kuga tum̃amu pitua ki mu paki Yehovah, po paki ekopu ni tokora tapu aneana, waina e mari a e dapu pa pa po du mau du, go kuga magi Yehovah Sup̃e animu suasua, naga namaetoana vivitinu aneana ega liliu pa dua ki mu pano.

⁹Nalakena ku pe moro maradoa liliu paki Yehovah, taimu maga go natumu maga eu pe wo pap̃ai namaritadodomiana narae ni tea maga waina eu piragi lua pavakoto ara, go eu pe wo moro liliu umai paki navanua waia: nalakena Yehovah Sup̃e animu e saup̃ia go e pei maritadodomi, go ega wo da doa naraena pa dua ki mu pano mau, waina ku pe maradoa liliu paki nia.

¹⁰Go tea tautauana maga eu surata pae natokoana paki natokoana usuraki navanua ni Efraim go Manasseh pano pa pa liliu Sebulun: ma eu muru ki saudoa ki da, po pasadao ara.

¹¹Ma naatam̃oli seara ni Asher go ni Manasseh go ni Sebulun, eu dum̃ada doro ra pakitano, po umai paki Yerusalem.

¹²Go nam̃elearu ni Sup̃e e doko Yudah naga ega tua ra p̃op̃o sikai maau, naga euga mari tea waina nawota go tea maraki maga eu dip̃aki da asa, pae navasaana ki Yehovah.

¹³Go naatam̃oli laapa eu saisai Yerusalem naga euga vavaigoro nasaisaiana ni bred waina leven e dika asa, doko atelagi kerua, e pei nasaisaiana warua liu sikai.

¹⁴Go eu duleana, po dape lua wede ni naviriana maga waina eu doko Yerusalem, go wede ni naviriana maga ni tea ni nap̃o wia, po nadi ki da pano paki nap̃aloa ni Kidron.

¹⁵Go eu mari punue navakalauana nakup̃a kerualima sikai tamate pati ni atelagi kerua: go tea viri maga go naworawora ni Levi eu maliere, po dum̃ada mari dautau ki da, po piragi navituaana tap̃arakiana maga umai paki ekopu ni nasum̃a ki Yehovah.

¹⁶Go eu lawodu naliada pataka ni nawotaeana ki Moses, naatam̃oli ki Sup̃e: tea viri maga eu meseura ki nadana waina eu dape a ki nam̃elearu ni naworawora ni Levi.

¹⁷Nalakena tea laapa waina eu doko nasaisaiana, eu ko da dum̃ada mari ra eu dautau mau: nalakena tea wanogoe naworawora ni Levi eu dap̃au namaripunuvunueana ni navakalauana maga agi tea maga mamau puti waina eu da dautau mau, naga euga mari ra euga tautau paki Yehovah.

¹⁸Nalakena taua sikai ni narei, Efraim go Manasseh, Issakar go Sebulun, tea laapa kakada eu da pei tea mariana eu dautau mau, ma eu gani navakalauana, e da pae nawotaeana waina e pei tea midiriana mau. Nalakena Hesekiah e madeada dapasavasa, po naga, Yehovah waina e p̃ia, ega magi sara naata midoakikorokoro,

¹⁹Sara naata sikasikai waina euga lawo ki nap̃op̃oda naga euga laaga Sup̃e, Yehovah, Sup̃e ki tamada maga, eu pe vei tea mari‐dautau‐kiana pataka ni namari‐dautau‐kiana ni tokora tapu, kite eu pe ta pei tea mari‐dautau‐kiana mau.

²⁰Go Yehovah e daki dorogo paki Hesekiah, po mari pauri narei.

²¹Go Israel natuna maga waina eu doko Yerusalem doko, eu pavaigoro nasaisaiana ni bred waina leven e dika asa naaleatia larua, pilake nalaelaeaana warua: go naworawora ni Levi go tea viri maga eu samasama ni Yehovah naaleatia paki naaleatia, doko do lega paki Yehovah, pilake tea woka nagalo maga ki nadaleo kasua.

²²Go Hesekiah e pasa matemate paki naworawora ni Levi mamau puti waina eu atae m̃ata ki nawosiana ni nasuasuaana ki Yehovah. Go eu gani nakaniana ni nasaisaiana naaleatia larua, doko do pitua ki naviriana maga ni navituaana maga ni natam̃ateana, go ni navasadodom̃atakiana paki Yehovah, Sup̃e ki tamada maga.

²³Go nasaisaiana mamau eu midoaki p̃otae naga euga moro pavaigoro naaleatia larua p̃ota: go eu moro pavaigoro naaleatia larua p̃ota pilake nalaelaeaana.

²⁴Nalakena Hesekiah nawota ni Yudah e dua nasaisaiana kau anoai manu sikai go shiip manu larua euga vei navituaana maga; go tea maraki maga eu dua nasaisaiana kau anoai manu sikai go shiip tivilia sikai: go tea viri maga eu laapa liu waina eu dum̃ada mari ra eu dautau.

²⁵Go nasaisaiana mamau ni Yudah, nara ma tea viri maga go naworawora ni Levi, go nasaisaiana mamau waina eu m̃elu dua ki Israel umai, go nam̃enaki‐atatoko maga waina eu m̃elu dua ki navanua ni Israel umai, go waina eu doko Yudah doko, eu mamau puti laelaea.

²⁶Go nalaelaeaana warua e doko Yerusalem: nalakena pae ragi ki Solomon natu ni David nawota ni Israel pa pa paki naaleatia wanogoe, tea waina e dakiusi a e da doko Yerusalem mau.

²⁷Go tea viri maga naworawora ni Levi eu duleana po pasa p̃ia ki narei: go nadaleoda e pei tea rogoana, go natapasavasaana adeada e sake paki tokora tapu aneana, paki nakoroatelagi.