Read Nguna Togoa Etafe North 2 KRONIKEL MAGA 31 Bible Online

2 KRONIKEL MAGA 31 - Nguna Togoa Etafe North bible

2 KRONIKEL MAGA 31

¹Go ragi waina tea mamau puti wanogoe e nopu, Israel mamau waina eu saisai doko, eu dave pano po paki natokoana maga ni Yudah, go eu mari p̃oraworae tea lawodu maga, po dae kotokotovi Asherah maga, po dakai tokora vakilagi maga go wede ni naviriana maga m̃elu dua ki Yudah mamau go Benyamin, go Efraim go Manasseh, pa pa eu mari puoli ki puti ra. Go Israel natuna maga mamau puti eu liliu, sara naata sikasikai paki tea veaniana adeada, paki natokoana adeada maga.

²Go Hesekiah e pasa dawona ki natap̃otawotaeana maga ni tea viri maga go naworawora ni Levi, pae natap̃otawotaeana adeada maga, sara naata sikasikai doko nawosiana adeada, tea viri maga go naworawora ni Levi eu mamau, naga euga vitua ki navituaana tap̃arakiana maga, go navituaana maga ni natam̃ateana, naga euga suasua, go naga euga vitua ki navasadodom̃atakiana, go naga euga mari nasamasamaana namata‐pua maga ni tokora ni nam̃enakiana ki Yehovah.

³Go e pasa dawona ki namagovai ni tea veaniana ki nawota raki navituaana tap̃arakiana maga, raki navituaana tap̃arakiana maga ni malip̃ogi go ni ragi melu, go raki navituaana tap̃arakiana maga ni sabbath maga, go ni atelagi vau maga, go ni nasaisaiana tatutakiana maga, dapala waina e pei tea midiriana nawotaeana ki Yehovah.

⁴Go e dip̃aki narei waina eu doko Yerusalem doko naga euga tua tea viri maga go naworawora ni Levi ki tea adeada, naga nara euga tum̃ada pitua ki da paki nawotaeana ki Yehovah.

⁵Go ragi waina natip̃akiana e pei tea rogorogokiana usuraki, Israel natuna maga eu pitua ki p̃arua ki takavea maga ni korn, go waine, go naroro, go honi, go ni navuraana ni vanua; go eu dape kekerualima ni taua warua ni sara naleo mamau puti umai.

⁶Go Israel go Yudah natuda maga, waina eu doko natokoana maga ni Yudah doko, nara ma eu dape kekerualima ni oks go ni shiip umai, go kekerualima ni naleo tapugoroana maga waina eu pei tea tapugoroana paki Yehovah Sup̃e adeada, po doropusi ra eu pei tauataua maga.

⁷Atelagi ketolu eu pae asa daua ki taua maga wanogoe, po mari sua ra atelagi kelarua.

⁸Go ragi waina Hesekiah go tea maraki maga eu rumai po punusi taua maga wanogoe, eu pasa dodom̃ata ki Yehovah, go narei aneana Israel.

⁹Go Hesekiah e pusuusu paki tea viri maga go naworawora ni Levi nalo ni taua maga wanogoe.

¹⁰Go Asariah tea viri warua liu, tea ni nasum̃a ki Sadok, e pasadara e, po naga, Pae ragi waina narei maga eu pae asa dape navituaana maga umai paki ekopu ni nasum̃a ki Yehovah pa pa paki ragi waia, au ganikani po puka, go tea warua e dupele: nalakena Yehovah e pasa p̃ia ki narei aneana; go taua warua waia e pei tea waina e dupele.

¹¹Go Hesekiah e pitip̃aki naga euga mari m̃ata ki em̃ago maga ekopu ni nasum̃a ki Yehovah; go eu mari m̃ata ki da.

¹²Go eu mari nalomauana po dape navituaana maga umai paki ekopu, go kekerualima maga, go naleo tapugoroana maga: go Konaniah naworawora ni Levi sikai kakada, e pei tea tap̃au dap̃au ra, go taina Shimei e pei atavina.

¹³Go Yehiel, go Asasiah, go Nahath, go Asahel, go Yerimoth, go Yosabad, go Eliel, go Ismakiah, go Mahath, go Benaiah, eu pei tea leo parati ki maga doko etano ki nam̃elearu ni Konaniah go taina Shimei, pae natawonakiana ki nawota Hesekiah, go ki Asariah tea maraki dap̃au nasum̃a ki Sup̃e.

¹⁴Go Kore natu ni Imnah, naworawora ni Levi sikai kakada, tea vavaigoro ni namata‐pua paki elo sake, e pei tea tap̃au dap̃au navituaana suasuakiana maga ki Sup̃e, naga ega turi p̃otawotae navituaana maga ki Yehovah, go naleo tapu liu maga.

¹⁵Go Eden, go Miniamin, go Yeshua, go Shemaiah, go Amariah, go Shekaniah, eu doko etano ki nia natokoana maga ki tea viri maga, doko nawosiana tatutakiana adeada maga, naga euga tua taida maga asa ega vae natap̃otawotaeana adeada maga, tea matua go tea vusavusa:

¹⁶Eu masale ki tea maga waina eu pei tea veve‐atae‐ana pae nanoaana ni navakilinaana ki naanoai maga, tea ni natau dolu go do liu, sara naata waina eu paki ekopu ni nasum̃a ki Yehovah, pataka ni nawosiana ni sara naaleatia, raki nawosiana ni nasuasuaana adeada, pae natap̃otawotaeana adeada maga;

¹⁷Go tea maga waina eu pei tea veve‐atae‐ana pae nanoaana ni navakilinaana ki tea viri maga pae nasum̃a maga ni tamada maga, go naworawora ni Levi, tea ni natau rualima dua go do liu, doko nawosiana ni nasuasuaana adeada maga pae natap̃otawotaeana adeada maga;

¹⁸Go tea maga waina eu pei tea veve‐atae‐ana pae nanoaana ni navakilinaana ki tea vusavusa adeada maga mamau puti, nagoroi adeada maga, go natuda naanoai maga, go natuda nagoroi maga, usuraki nasaisaiana mamau: nalakena doko nawosiana tatutakiana adeada, eu dum̃ada mari ra eu dautau doko natapuana:

¹⁹Go agi Aaron natuna tea viri maga, waina eu doko vanua maga ni napega maga ni natokoana adeada maga mamau puti, naatam̃oli maga waina nagisada eu pei tea noaana eu doko sara natokoana mamau puti naga euga vitua ki matele maga paki naanoai maga mamau puti ni tea viri maga, go paki tea mamau puti waina eu pei tea veve‐atae‐ana pae nanoaana ni navakilinaana usuraki naworawora ni Levi.

²⁰Go Hesekiah e mari dapala nogoe usuraki Yudah mamau; go e mari tea waina e p̃ia go e leana, go tea vei lomau namata ni Yehovah Sup̃e aneana.

²¹Go sara nawosiana waina e mari a doko nasuasuaana ni nasum̃a ki Sup̃e, go doko nawotaeana, go doko natip̃akiana maga, naga ega laaga Sup̃e aneana, e mari a ki nap̃op̃ona mamau, po disu p̃ia.