Read Nguna Togoa Etafe North 2 KRONIKEL MAGA 32 Bible Online

2 KRONIKEL MAGA 32 - Nguna Togoa Etafe North bible

2 KRONIKEL MAGA 32

¹Edaku ki naleo maga wanogoe, go nawosiana ni navei‐lomau‐ana wanogoe, Sennakerib nawota ni Assiria e umai, po sili paki Yudah, po m̃enakigoro dip̃a natokoana p̃aakagoroana maga, po midoa ki nia naga ega mari matua ki da naga euga vei tea aneana.

²Go ragi waina Hesekiah e punusi naga Sennakerib e po umai, go naga e midoaki p̃otae naga ega marimari dip̃a Yerusalem,

³E pusum̃aki paki tea maraki aneana maga go naatam̃oli marimatua aneana maga, naga ega tonigoro namata noai maga waina eu doko etaku ni natokoana; go eu silae a asa.

⁴Go taua warua ni narei eu pei tea viragi‐saisai‐kiana, go eu donigoro namata noai maga mamau puti, go nap̃ap̃a noaisara waina e sara duaduru m̃aleoputo ni navanua, eu naga, Ekasana nawota maga ni Assiria euga wo umai po pap̃ai naga noai e p̃arua?

⁵Go e marasike, po davagi piri p̃aaka mamau waina e pei tea rakaiana, po davagi nasum̃a varau pakilagi maga asa, go e moro davagi p̃aaka p̃ota sikai etaku kakana, po mari Millo waina e doko natokoana ki David e kasua, go e mari nalikau maga go kokororum̃a maga eu laapa liu.

⁶Go e lawo ki tea maraki maga ni navakalo dap̃au narei, po piragi saisai ki da umai punusi a tokora welewelea ni namata‐pua ni natokoana, po pasa matemate paki da,

⁷po naga, Kuga kasua, go kuga viviari, kuga ta mataku kite m̃anaunau mau nalakena nawota ni Assiria, kite nalakena taua warua waina eu sikoti a doko: nalakena tea waina e doko sikoti gida, e p̃arua liu tea waina e doko sikoti a:

⁸Naru ni nap̃okasi e doko sikoti a; ma Yehovah Sup̃e anigida e doko sikoti gida naga ega silae gida, go naga ega manigida mari navakalo anigida maga. Go narei eu pavatu navasaana maga ki Hesekiah nawota ni Yudah.

⁹Edaku ki tea wanogoe Sennakerib nawota ni Assiria, waina e do dum̃ana kelugoro Lakish, nara ma taua mamau ni navakalo aneana, e dip̃aki lua tea suasua aneana maga paki Yerusalem pano punusi Hesekiah nawota ni Yudah, go narei mamau ni Yudah waina eu doko Yerusalem, e naga,

¹⁰Sennakerib nawota ni Assiria e noa dapala nea, e naga, Ku pavatu sei, naga ku do lawodugoro tea kelugoro Yerusalem?

¹¹Hesekiah e da do maraki sasap̃o ki mu mau, naga ega vitua ki mu naga kuga mate ki navitoloana go ki namadouana, doko do naga, Yehovah Sup̃e anigida ega wo pualua gida m̃elu dua ki nam̃elearu ni nawota ni Assiria, kite?

¹²Hesekiah wanogoe e da mari puoli ki tokora vakilagi aneana maga go wede ni naviriana aneana maga mau, po dip̃aki Yudah go Yerusalem, doko do naga, Kuga wo lotu narae ni wede ni naviriana sikai maau, po dap̃ara ki tea ni nap̃o wia asa, kite?

¹³Nimu ku da atae tea waina kinami ma tamagu maga au mari a paki narei maga mamau puti ni navanua maga mau, kite? Sup̃e maga ni nalauna maga ni navanua maga eu mariatae pualua navanua adeada m̃elu dua ki nam̃elearugu, kite?

¹⁴Sup̃e maga mamau puti ni nalauna maga wanogoe waina tamagu maga eu mari puoli ki puti ra, seve tea kakada e mariatae pualua narei aneana m̃elu dua ki nam̃elearugu, naga Sup̃e animu ega wo mariatae pualua mu m̃elu dua ki nam̃elearugu?

¹⁵Nalakena tea wanogoe kuga ta suasua ki Hesekiah naga ega maraki sasap̃o ki mu, kite pasadie mu dapala nogoe, go kuga ta saralomau asa mau: nalakena sup̃e maga ni nalauna maga go ni namarakiana maga, te sikai kakada e da mariatae pualua narei aneana m̃elu dua ki nam̃elearugu mau, kite m̃elu dua ki nam̃elearu ni tamagu maga mau: go Sup̃e animu e mariatae pualua mu m̃elu dua ki nam̃elearugu, kite?

¹⁶Go tea suasua aneana maga eu moro sokari navasaana maga wanogoe dip̃a Yehovah Sup̃e, go dip̃a tea suasua aneana Hesekiah.

¹⁷Sennakerib e moro midiri tusi maga, naga ega vasa p̃alo ki Yehovah, Sup̃e ki Israel, go naga ega vasa dip̃a e, e naga, Dapala waina sup̃e maga ni nalauna maga ni navanua maga eu da pualua narei adeada m̃elu dua ki nam̃elearugu mau, dapala nogoe Sup̃e ki Hesekiah nae ma ega wo da pualua narei aneana m̃elu dua ki nam̃elearugu mau.

¹⁸Go eu pioso ki nadaleo kasua sikai pae masileo ki tea ni Yudea paki narei ni Yerusalem waina eu doko nam̃asua ni p̃aaka, naga euga mari ra euga mataku po m̃anaunau; naga euga marimatua ki natokoana.

¹⁹Go eu pasa nalo ni Sup̃e ni Yerusalem, dapala waina eu pasa nalo ni sup̃e maga ni narei maga ni maramana, waina eu pei nawosiana ni nam̃elearu ni naatam̃oli maga.

²⁰Go nawota Hesekiah, go profeta Isaiah natu ni Amos, eu dapasavasa nalakena tea wanogoe, po pioso paki nakoroatelagi.

²¹Go Yehovah e dip̃aki lua agelo sikai umai, waina e daelua naatam̃oli marimatua maga mamau puti ni navakalo go tea maraki maga go tasiga maga waina eu doko tokora ni nam̃enakiana ki nawota ni Assiria. Go e liliu paki navanua aneana pano pilake namatamaliereana. Go ragi waina e paki ekopu ni nasum̃a ki sup̃e aneana, tea maga waina eu m̃elu nawarena, eu atugi a ki lova tokora wanogoe.

²²Dapala nogoe Yehovah e mauti Hesekiah go naatatoko maga ni Yerusalem m̃elu dua ki nam̃elearu ni Sennakerib nawota ni Assiria, go m̃elu dua ki nam̃elearu ni tea kokona maga mamau puti, po dua ra natam̃ateana daliviri.

²³Go tea laapa eu dape navituaana maga umai dua Yehovah asa Yerusalem, go naleo wia masauniana maga po dua Hesekiah nawota ni Yudah asa: go e pei tea sikeana pakilagi narae ni nalauna maga mamau puti pae ragi wanogoe pa pa pa.

²⁴Go ragi ni naaleatia maga wanogoe Hesekiah e sasana p̃arua dapala ega mate: go e dapasavasa paki Yehovah; go e pasadara e, po dua e navaivaiana ni namagaana sikai.

²⁵Ma Hesekiah e da pitua liliu mau pataka ni tea wia waina e pei tea vituakiana paki nia; nalakena nap̃op̃ona e pakilagi: nalakena tea wanogoe namaritausuana e pavaga dip̃a e, go dip̃a Yudah go Yerusalem.

²⁶Ma Hesekiah e dum̃ana doro e pakitano nalakena navei‐p̃op̃o‐vakilagi‐ana aneana, nara ma naatatoko maga ni Yerusalem eu mamau, go dapala nogoe namaritausuana ki Yehovah e da pakilina ki da doko naaleatia maga ki Hesekiah mau.

²⁷Go Hesekiah e peani nasogolapaana go nadodomadaganiana warua liu: go e dum̃ana maneana mari nasum̃a maga ni natauakiana ni naleo wia maga raki silver, go raki kold, go raki vatu wia maga ni naulu laapa, go raki tea ni nap̃o wia maga, go raki kokororum̃a maga, go raki lasa wia visarasara maga mamau puti;

²⁸Go m̃agoreaga maga ma raki natauakiana ni korn go waine go naroro; go kelu maga agi nalo tuavati visarasara maga, go loga maga agi navata maga ni shiip go ni naninani maga.

²⁹Go e pei talakea ni natokoana maga, go e peani navata maga ni shiip go ni naninani, go navata maga ni kau eu laapa do liu: nalakena Sup̃e e dua e naveaniana warua.

³⁰Go Hesekiah wanogoe e moro donigoro namata noai ni elagi ni noaisara maga ni Cihon, po mari ra eu sara siwo umai taleva ni elo musu paki natokoana ki David. Go Hesekiah e disu p̃ia nawosiana aneana maga mamau puti.

³¹Ma nalo ni naleo ki tea tautauana maga ki tea maraki maga ni Babelon, waina eu dip̃aki lua pa punusi a naga euga vusuusu ki nia ki navaivaiana ni namagaana waina e pei tea mariana navanua, Sup̃e e doropusi a asa, naga ega maridogo e, naga ega atae tea mamau puti waina e doko nap̃op̃ona.

³²Go nawosiana mamau puti ki Hesekiah, go namariana wia aneana maga, p̃a leo, eu pei tea midiriana tusi ni navunusiana ki profeta Isaiah natu ni Amos, doko tusi ki nawota maga ni Yudah go ni Israel.

³³Go Hesekiah e maturu sikoti tamana maga, go eu ova ki nia tokora vakilagi liu ni matigo maga ki David natuna maga: go Yudah mamau go naatatoko maga ni Yerusalem eu mari nadodomadaganiana paki nia ragi ni namateana aneana. Go natuna Manasseh e maramara du oli a.