Read Nguna Togoa Etafe North 2 KRONIKEL MAGA 8 Bible Online

2 KRONIKEL MAGA 8 - Nguna Togoa Etafe North bible

2 KRONIKEL MAGA 8

¹Go e pakilina ragi waina natau rualima dua eu nopu, ragi waina Solomon e davagi sua nasum̃a ki Yehovah,

²go nasum̃a aneana, Naga natokoana maga waina Huram e dua Solomon ara, Solomon e davagi piri ra, po mari Israel natuna maga eu doko ara doko.

³Go Solomon e paki Hamathsobah pano, po mari matua ki nia.

⁴Go e davagi Tadmor doko masop̃alo, go natokoana maga mamau puti ni natauakiana, waina e davagi ra doko Hamath.

⁵Go e davagi Beth‐horon waina e doko taleva ni elagi, go Beth‐horon waina e doko taleva ni etano, natokoana maga ni p̃aaka, waina eu pilake nakoro maga, namata‐pua maga, go tea walagoto maga;

⁶Go Baalath, go natokoana maga mamau puti ni natauakiana waina eu pei agi Solomon, go natokoana maga mamau puti ni kariot aneana maga, go natokoana maga ni naatam̃oli ni horse aneana maga, go tea mamau puti waina Solomon e masauna naga ega tavagi ra Yerusalem, go Lebanon, go usuraki navanua mamau ni namarakiana aneana.

⁷Go naatam̃oli maga mamau puti waina eu mauri doko ni tea ni naworawora ni Heth, go ni naworawora ni Amor, go ni naworawora ni Peris, go ni naworawora ni Hivah, go ni naworawora ni Yebus, waina eu da pei tea ni Israel natuna maga mau;

⁸Natuda maga waina eu edakugoro ra, waina eu pei tea toropusiana eu mauri doko navanua, waina Israel natuna maga eu da mari puoli ki da mau, tea maga wanogoe Solomon e pualua ra seara kakada naga euga vei tea suasua vei naviti maga, pa pa paki naaleatia waia.

⁹Ma Israel natuna maga, Solomon e da mari ra euga vei tea suasua maga mau naga euga mari nawosiana aneana; ma nara eu pei naatam̃oli maga ni navakalo, go nap̃au ni naatam̃oli navakalo aneana maga, go tea maraki maga ni kariot aneana maga, go ni naatam̃oli maga ni horse aneana maga.

¹⁰Go nara wanogoe eu pei nap̃au ni tasiga maga ki nawota Solomon, naatam̃oli p̃onotia dua rualima takuna lima, waina eu maraki dap̃au narei maga.

¹¹Go Solomon e piragi lua Faraoh natuna nagoroi m̃elu dua ki natokoana ki David sake umai paki nasum̃a waina e maneana davagi a: nalakena e naga, Nagoroi aginau ega wo da doko nasum̃a ki David, nawota ni Israel mau, nalakena tokora maga wanogoe, waina areka ki Yehovah e umai paki ara, eu dapu.

¹²Go Solomon e pitua ki navituaana tap̃arakiana maga paki Yehovah doko wede ni naviriana ki Yehovah, waina e davagi a e doko narae ni natara‐taup̃a,

¹³Dapala nawosiana ni sara naaleatia sikasikai, e pitua ki da pataka ni natip̃akiana ki Moses, sabbath maga, go atelagi vau maga, go ragi ni nasaisaiana tatutakiana maga, waina eu mari ra paka tolu natau sikai, nasaisaiana ni bred waina leven e dika asa, go nasaisaiana ni wiik maga, go nasaisaiana ni tap̃aup̃au maga.

¹⁴Go pae natawonakiana ki tamana David, e mari natap̃otawotaeana maga ni tea viri maga eu lawodu nasuasuaana adeada, go naworawora ni Levi eu lawodu naveitea‐leo‐parati‐kiana adeada maga, naga euga to pasa samasama, po do suasua nawosiana ki tea viri narae ni tea viri maga, pataka ni nawosiana ni sara naaleatia sikasikai: go tea vavaigoro namata‐pua maga, pae natap̃otawotaeana adeada maga eu lawodu sara namata‐pua maga: nalakena David, naatam̃oli ki Sup̃e, e pitip̃aki asa naga ega tapala nogoe.

¹⁵Go eu da dawasi m̃elu dua ki natip̃akiana ki nawota waina e dip̃aki tea viri maga go naworawora ni Levi asa nalo ni te navatuna mau, kite nalo ni naleo tauakiana wia maga mau.

¹⁶Go nawosiana mamau puti ki Solomon e pei tea vakavuroana pae naaleatia vea waina laketano ni nasum̃a ki Yehovah e pei tea lawo‐ki‐laketoko asa, pa pa paki naaleatia edaku waina nawosiana kakana e po nopu. Go dapala nogoe nasum̃a ki Yehovah e po pei tea mari‐sua‐ana.

¹⁷Go Solomon e paki Esion‐keber pano, go paki Eloth, waina e doko elau navanua ni Edom.

¹⁸Go Huram e dip̃aki lua pae nam̃elearu ni tea suasua aneana maga, po dua e rarua maga, go tea suasua maga waina eu pei tea midoaki atae natasi; go eu paki Ofir pano, nara ma tea suasua maga ki Solomon eu mamau, po piragi lua m̃elu dua ki tokora wanogoe, kold talenta p̃onotia pati go rualima takuna lima, po dape ra umai dua nawota Solomon ara.