Read Nguna Togoa Etafe North ESRA 1 Bible Online

ESRA 1 - Nguna Togoa Etafe North bible

ESRA 1

¹Doko natau vea ki Sairus nawota ni Persia, naga navasaana ki Yehovah pae nawoka ni Yeremiah ega vei tea vakavuroana, Yehovah e pulevule naata ni Sairus nawota ni Persia, go e mari narogorogoana sikai usuraki namarakiana mamau aneana, go e midiri a,

²e naga, Sairus nawota ni Persia e noa dapala nea, Namarakiana maga mamau puti ni maramana, Yehovah Sup̃e ni nakoroatelagi e pitua ki da paki nau; go e pasa parati ki nau naga aga maneana davagi nasum̃a sikai Yerusalem, waina e doko Yudah.

³Naata sikai ni narei mamau aneana e pe toko m̃aleoputo kakamu, Sup̃e aneana ega sikoti a, go ega sake pano paki Yerusalem waina e doko Yudah, po davagi nasum̃a ki Yehovah, Sup̃e ki Israel, (nae e pei Sup̃e,) waina e doko Yerusalem.

⁴Go te naata waina e pe toko te tokora waina e pei nam̃enaki atatoko sikai, naatam̃oli maga ni natokoana aneana euga silae a ki silver, go ki kold, go ki naloriki maga, go ki nalo tuavati maga, go ki navituaana suasuakiana raki nasum̃a ki Sup̃e waina e doko Yerusalem.

⁵Go nap̃au maga ni nasum̃a maga ni tamada maga ni Yudah go ni Benyamin eu duleana, nara ma tea viri maga, go naworawora ni Levi, tea mamau puti waina Sup̃e e pulevule naatada naga euga sake pano po davagi nasum̃a ki Yehovah waina e doko Yerusalem.

⁶Go tea mamau puti waina eu doko dalivirigoro ra eu silae ra ki lasa maga ni silver, go ki kold, go ki naloriki maga, go ki nalo tuavati maga, go ki naloriki wia maga ni naulu laapa, go ki tea mamau puti waina eu suasua pitua ki nia.

⁷Go nawota Sairus e dape lasa maga ni nasum̃a ki Yehovah umai, waina Nebukadnessar e dape lua ra m̃elu dua ki Yerusalem, po doropusi ra nasum̃a ki sup̃e aneana maga;

⁸Tea maga wanogoe Sairus nawota ni Persia e dape lua umai pae nam̃elearu ni Mithredath, tea leo parati ki naleo wia tauakiana maga, po peve parati ki da po pitua ki da paki Sheshbassar, tea maraki ni Yudah.

⁹Go tea waia e pei naveveana kakada: siloa warua maga ni kold rualima dolu, siloa warua maga ni silver manu sikai, masimasi maga rualima dua tamate loveti;

¹⁰Boul maga ni kold rualima dolu, boul maga ni silver manu dua p̃onotia pati rualima takuna sikai, go lasa p̃ota maga manu sikai.

¹¹Lasa maga ni kold go ni silver eu mamau puti pei manu lima p̃onotia pati. Tea maga mamau puti wanogoe Sheshbassar e dape lua ra sake umai ragi waina tea maga ni tea viragi‐lua‐pavakotoana maga eu po pei tea viragi‐lua‐ana m̃elu dua ki Babelon umai paki Yerusalem.