Read Nguna Togoa Etafe North ESRA 3 Bible Online

ESRA 3 - Nguna Togoa Etafe North bible

ESRA 3

¹Go ragi waina atelagi kelarua e pakilina, go Israel natuna maga eu doko natokoana maga doko, narei maga eu dum̃ada piragi saisai ki da dapala eu pei naatam̃oli sikai maau, paki Yerusalem.

²Go Yeshua natu ni Yosadak e duleana, nara ma taina tea viri maga, go Serubabel natu ni Shealtiel go taina maga, po davagi wede ni naviriana ki Sup̃e ki Israel, naga euga vitua ki naviriana tap̃arakiana maga asa, dapala waina e pei tea midiriana doko nawotaeana ki Moses, naatam̃oli ki Sup̃e.

³Go eu lawo ki wede ni naviriana e doko laketano kakana; go namatakuana e doko ara nalakena narei ni navanua maga: go eu pitua ki naviriana tap̃arakiana maga paki Yehovah asa, naviriana tap̃arakiana maga malip̃ogi go ragi melu.

⁴Go eu pavaigoro nasaisaiana ni namaritap̃aup̃au‐ana, dapala waina e pei tea midiriana, po pitua ki naviriana tap̃arakiana maga sara naaleatia pae naveveana kakada dapala natawonakiana, pataka ni sara naaleatia;

⁵Go eu edaku pitua ki naviriana tap̃arakiana ni sara ragi, go tea ni atelagi vau maga, go ni nasaisaiana tatutakiana maga ki Yehovah waina eu pei tea mariana eu dapu, go tea ki sara naatam̃oli waina eu m̃arekareka pitua ki navituaana suasuakiana sikai paki Yehovah.

⁶Pae naaleatia vea ni atelagi kelarua eu atulake pitua ki naviriana tap̃arakiana maga paki Yehovah: ma laketano ni nasum̃a tapu ki Yehovah, e ko da pei tea toropusiana mau.

⁷Go eu pitua ki m̃ane paki mataisau maga ni vatu, go paki mataisau maga; go eu dua tea ni Sidon go tea ni Tair nakaniana go namunuana go naroro, naga euga viragi nakau sidar maga pae Lebanon umai paki elau ni Yoppa, dapala waina Sairus nawota ni Persia e suasua dua ra asa.

⁸Go doko natau kerua ni naumaiana adeada paki nasum̃a ki Sup̃e doko Yerusalem, atelagi kerua, Serubabel natu ni Shealtiel, go Yeshua natu ni Yosadak, nara ma taida tea viri maga go naworawora ni Levi, go tea ni tea viragi‐lua‐pavakotoana maga waina eu mamau puti liliu paki Yerusalem, eu atulake asa; go eu lawo ki naworawora ni Levi, tea maga waina natau adeada eu pei rualima dua go tea waina eu do liu, naga euga leo parati ki nawosiana ni nasum̃a ki Yehovah.

⁹Go Yeshua nara ma natuna maga go taina maga, go Kadmiel go natuna maga, Yudah natuna maga, eu pei tea leo‐paratiki maga dap̃au tea wosiwosi maga ni nasum̃a ki Sup̃e: nara ma Henadad natuna maga go naworawora ni Levi.

¹⁰Go ragi waina tea tavagi maga eu doropusi laketano ni nasum̃a ki Yehovah, tea viri maga eu rumai eu suni tea suniana adeada maga po dape paiga adeada maga, go naworawora ni Levi, Asaf natuna maga, eu pilake simbal maga, naga euga samasama ni Yehovah, dakiusi natip̃akiana ki David nawota ni Israel.

¹¹Go eu lega pilele dum̃ada paki da, doko samasama ni Yehovah po pasa dodo m̃ata ki nia, doko naga, Nalakena nae e p̃ia, go nadodomiana aneana e du mau du paki Israel. Go narei mamau puti eu darasa ki nararasaana warua ragi waina eu samasama ni Yehovah, nalakena laketano ni nasum̃a ki Yehovah e pei tea toropusiana.

¹²Ma tea viri maga go naworawora ni Levi go nap̃au maga ni nasum̃a maga ni tamada maga, tea matua maga waina eu pea punusi nasum̃a vea, tea laapa kakada eu dagi ki nadaleo kasua sikai ragi waina eu punusi naga eu doropusi laketano ni nasum̃a wanogoe namatada; go tea laapa eu darasa nalakena nalaelaeaana:

¹³Go dapala nogoe tea laapa eu mari sa dogo p̃otae namarip̃araiana ni nararasaana ni nalaelaeaana, go namarip̃araiana ni natagiana ki narei: nalakena narei eu darasa ki nararasaana kasua go namarip̃araiana kakana e pei tea rogoana uvea.