Read Nguna Togoa Etafe North ESRA 4 Bible Online

ESRA 4 - Nguna Togoa Etafe North bible

ESRA 4

¹Go ragi waina tea kokona maga ki Yudah go Benyamin eu dogo naga tea ni tea viragi‐lua‐pavakotoana maga eu magi Yehovah Sup̃e ki Israel davagi nasum̃a tapu sikai;

²Ragi wanogoe eu rumai paki m̃aladigi ki Serubabel go ki nap̃au maga ni nasum̃a maga ni tamada maga, po noa ki da, eu naga, Tuga mamau davagi a: nalakena kinami au lotu ki Sup̃e animu dapala waina nimu ku mari a; go au mari naviriana maga paki nia pae ragi ni naaleatia maga waina Esar‐haddon nawota ni Assiria e piragi lua gami sake umai paki nea, pa pa paki masoso.

³Ma Serubabel go Yeshua, go nap̃au maga ni nasum̃a maga ni tamada maga ni Israel, eu noa ki da, eu naga, E da pei tea animu mau naga tuga mamau magi Sup̃e aginami davagi nasum̃a sikai; ma kinami auga wo masikigami magi Yehovah, Sup̃e ki Israel, davagi a, dapala natip̃akiana ki Sairus nawota ni Persia, waina e dip̃aki gami asa.

⁴Ragi wanogoe naatam̃oli maga ni navanua eu mari nap̃op̃o ni narei ni Yudah e dodosua, po mari ra eu m̃anaunau doko nawosiana ni natavagiana,

⁵Po pasadapui tea vusum̃aki maga waina eu sa ki da, naga euga mari pinovinoi ki namidodoana adeada sara naaleatia ni ragi ki Sairus nawota ni Persia, pa pa paki ragi ni namaramaraana ki Darius nawota ni Persia.

⁶Go ragi ni namaramaraana ki Ahasuerus, ragi ni naatulakeana ni namaramaraana aneana, eu midiri tusi sikai po pasa dip̃a naatam̃oli maga ni Yudah go Yerusalem.

⁷Go doko naaleatia maga ki Artakserses, Bishlam, Mithredath, Tabeel go tea adeada maga, eu midiri tusi sikai paki Artakserses, nawota ni Persia; go tusi wanogoe e pei tea midiriana pae navasaana ni Siria, po pei tea tapedoaana pae masileo ni Siria.

⁸Rehum tea tip̃akiana, go Shimshai tea midiri, ero midiri tusi sikai paki nawota Artakserses po pasa dip̃a Yerusalem dapala nea:

⁹Rehum tea tip̃akiana, go Shimshai tea midiri, go tea adeada maga eu midiri tea waia; tea vasap̃otae maga, tea maramara maga, tea maraki maga, tea ni Persia, naatam̃oli maga ni Erek, tea ni Babelon, naatam̃oli maga ni Shushan, tea ni Elam,

¹⁰Go nalauna maga mamau puti waina eu doko, waina Osnapper naatam̃oli warua go vakilagi e piragi lua ra pano po mari ra eu doko natokoana maga ni Samaria go tokora p̃ota maga ni navanua taleva kerua ni Noaisara.

¹¹Tusi waia e pei tea vataka sikai ma tusi waina eu midiri dua nawota Artakserses asa; Tea suasua anigo maga, naatam̃oli maga waina au doko taleva kerua ni Noaisara, au naga, P̃a laelaea.

¹²Ega vei tea ataeana paki nawota naga tea ni Yudea waina eu pae ako sake umai, eu rumai punusi gami Yerusalem; eu do davagi piri natokoana p̃auluulu go sa wanogoe, go eu sike sua p̃aaka maga, po mari pau ki laketano kakana maga.

¹³Go ega vei tea ataeana paki nawota ragi waia naga waina natokoana wanogoe e pe vei tea tavagiana, go p̃aaka maga eu pe vei tea marisuaana, nara eu pe wo da pitua ki shekel magovai, nasautoga go takis, go dapala nogoe tea taluaana ki nawota maga ega wo pakitano.

¹⁴Go nalakena au do gani natasimena ni nasum̃a ki nawota, go e da p̃ia naga auga vunusi nadododaoana ki nawota mau, nalakena tea wanogoe au po dip̃aki lua po noakisai nawota asa;

¹⁵Naga euga leousiusi tusi ni nanoasokisokiana maga ki nawota maga waina eu doko pea ki‐go: go p̃a wo pap̃ai a doko tusi ni nanoasokisokiana maga wanogoe, po atae naga natokoana wanogoe e pei natokoana p̃auluulu sikai, go e sa ki nawota maga go navanua maga, go naga eu sike natuleanaana maga doko asa pae ragi ni tuai: tea wanogoe e pei nalakena natokoana wanogoe e pei tea marisakiana.

¹⁶Kinami au pasasokisoki paki nawota naga waina natokoana wanogoe e pe vei tea tavagi‐piri‐ana, go waina p̃aaka maga eu pe nopu, ragi wanogoe p̃a wo da peani te matele mau taleva kerua ni noaisara.

¹⁷Go nawota e dip̃aki lua navasadaraana sikai paki Rehum tea tip̃akiana, go paki Shimshai tea midiri, go paki tea adeada maga waina eu sikoti ra doko Samaria go navanua waina e doko taleva kerua ni noaisara, e naga, Natam̃ateana ega sikoti mu.

¹⁸Tusi waina nimu ku dip̃aki lua e paki gami, e po pei tea veveana lina naraegu.

¹⁹Go a pitip̃aki, go eu leousiusi po pap̃ai naga pae tuai natokoana wanogoe e mari natuleanaana dip̃a nawota maga, go naga namarip̃auluulu‐ana go namari‐piri‐ana ero pei tea mariana doko asa.

²⁰Go nawota marimatua maga waina eu pea doko, eu maramara dap̃au Yerusalem go eu maramara dap̃au navanua mamau taleva kerua ni noaisara; go shekel magovai, go nasautoga, go takis eu pei tea vituakiana paki da.

²¹Nalakena tea wanogoe p̃a mari natawonakiana sikai naga naatam̃oli maga wanogoe euga makoto ki nawosiana, go naga natokoana wanogoe ega ta pei tea tavagi‐piri‐ana mau, pa pa kinau aga wo dum̃agu mari natawonakiana sikai.

²²Go kuga vavaigoro naga kuga ta dodosua asa mau: ekasana namarisakiana ega risurisu po mari sa ki nawota maga?

²³Go ragi waina tusi waina e pei tea vataka sikai ma tusi waina nawota Artakserses e midiri a, e pei tea veveana narae ni Rehum, go ni Shimshai tea midiri, go ni tea adeada maga waina eu sikoti ra, eu mari m̃araverave po paki Yerusalem pano punusi tea ni Yudea maga, go pae namari‐kasua‐kiana go namarimatuaana, eu mari ra eu makoto ki nawosiana.

²⁴Go nawosiana ni nasum̃a ki Sup̃e waina e doko Yerusalem e makoto; go e da moro pei tea mariana mau pa pa paki natau kerua ni namaramaraana ki Darius nawota ni Persia.