Read Nguna Togoa Etafe North ESRA 5 Bible Online

ESRA 5 - Nguna Togoa Etafe North bible

ESRA 5

¹Go profeta maga, Hakai go Sekariah natu ni Iddo, ero peanoasai paki tea ni Yudea maga waina eu doko Yudah go Yerusalem; pae nagisa ni Sup̃e ki Israel ero peanoasai paki da.

²Go Serubabel natu ni Shealtiel, go Yeshua natu ni Yosadak, ero duleana po atulake davagi piri nasum̃a ki Sup̃e waina e doko Yerusalem; go profeta maga ki Sup̃e eu sikoti ra doko po silae ra.

³Ragi sikai maau wanogoe Tattenai tea maramara pae taleva kerua ni noaisara, go Shethar‐bosenai, go tea adeada maga waina eu sikoti ra, eu rumai po pasa paki da dapala nea, eu naga, Sei e dip̃aki mu naga kuga tavagi nasum̃a waia, po mari sua p̃aaka waia?

⁴Eu moro pusuusu paki da, eu naga, Naatam̃oli maga waina eu do davagi nasum̃a waia, nagisada sei maga?

⁵Ma namata ni Sup̃e adeada e paki tea matua maga ni tea ni Yudea, go eu da mari ra eu makoto mau pa pa naleo wanogoe e pei tea atusiana paki Darius, go navasadaraana sikai nalo kakana e liliu paki da pae tusi sikai.

⁶Tusi waina e pei tea vataka sikai ma tusi waina Tattenai tea maramara pae taleva kerua ni noaisara, go Shethar‐bosenai, go tea adeada maga waina eu sikoti ra, tea maramara maga waina eu doko taleva kerua ni noaisara eu midiri a po dip̃aki lua e paki nawota Darius:

⁷Eu dip̃aki lua tusi sikai pano paki nia, go eu midiri a e dapala nea; Paki nawota Darius, natam̃ateana ega sikoti ko doko.

⁸Ega vei tea ataeana paki nawota naga kinami au paki navanua ni Yudah pano, paki nasum̃a ki Sup̃e warua waina e pei tea tavagiana ki vatu warua maga, go napapa maga eu pei tea lawokiana namalona maga, go nawosiana wanogoe e do pei tea mariana ki nam̃arekarekaana go e do disu p̃ia doko nam̃elearuda maga.

⁹Go au pusuusu paki tea matua maga wanogoe, po pasa dapala nea, au naga, Sei e dip̃aki mu naga kuga tavagi nasum̃a waia, go naga kuga mari sua p̃aaka waia?

¹⁰Au moro pusuusu paki da ki nagisada maga, naga auga noakisai ko asa, naga auga midiri soki nagisa maga ni naatam̃oli maga waina eu pei nap̃auda.

¹¹Go eu pasadara gami dapala nea, eu naga, Kinami au pei tea suasua maga ki Sup̃e ni nakoroatelagi go maramana, go au moro davagi nasum̃a waina e pea pei tea tavagiana tuai, waina nawota warua sikai ni Israel e pea davagi a po mari sua e.

¹²Ma nalakena tamagami maga eu pakadali Sup̃e ni nakoroatelagi po mari a e maeto p̃arua, e pitua ki da paki nam̃elearu ni Nebukadnessar nawota ni Babelon, naatam̃oli sikai ni Kaldea, waina e mari sa sa ki nasum̃a waia po pua pavakoto ki narei maga pano paki Babelon.

¹³Ma doko natau vea ki Sairus nawota ni Babelon, nawota Sairus e mari natawonakiana sikai naga nasum̃a ki Sup̃e waia ega moro pei tea tavagi‐piri‐ana.

¹⁴Go lasa maga ni kold go ni silver, tea ni nasum̃a ki Sup̃e, waina Nebukadnessar e dape lua ra m̃elu dua ki nasum̃a tapu waina e doko Yerusalem, po piragi ra umai paki nasum̃a tapu ni Babelon, tea maga wanogoe nawota Sairus e dape lua ra m̃elu dua ki nasum̃a tapu ni Babelon, go eu pitua ki da paki naatam̃oli sikai, nagisana Sheshbassar, waina e mari a e pei tea maramara sikai;

¹⁵Go e noa ki nia, e naga, P̃a vuati lasa maga waia, go p̃a vano po doropusi ra euga wo doko nasum̃a tapu waina e doko Yerusalem, go nasum̃a ki Sup̃e ega moro pei tea tavagiana ega toko naliana.

¹⁶Go Sheshbassar wanogoe e umai, po doropusi laketano maga ni nasum̃a ki Sup̃e waina e doko Yerusalem: go pae ragi wanogoe pa pa paki ragi waia, nawosiana ni natavagi‐a‐ana e do pei tea mariana, ma e ko da nopu mau.

¹⁷Go nalakena tea wanogoe, waina nawota e pe midoaki nia naga e p̃ia, go euga wo leousiusi pae nasum̃a ni natauakiana ki nawota waina e doko tokora wanogoe doko Babelon, naga e pe vei lomau natawonakiana sikai e pei tea mariana pae nawota Sairus naga euga tavagi nasum̃a ki Sup̃e wanogoe doko Yerusalem, go nawota ega tip̃aki lua navasaana po noa ki gami namasauana aneana nalo kakana.