Read Nguna Togoa Etafe North ESRA 6 Bible Online

ESRA 6 - Nguna Togoa Etafe North bible

ESRA 6

¹Go nawota Darius e mari natawonakiana sikai, go eu leousiusi doko nasum̃a ni tusi maga, tokora waina tea tauakiana maga eu doko asa doko Babelon.

²Go eu pap̃ai tusi lulukiana sikai Akmetha, nasum̃a ki nawota waina e doko navanua ni Media, go nanoasokisokiana sikai e pei tea midiriana e doko asa, e dapala nea.

³Doko natau vea ki nawota Sairus, nawota Sairus wanogoe e mari natawonakiana sikai: nalo ni nasum̃a ki Sup̃e doko Yerusalem, nasum̃a wanogoe ega vei tea tavagiana tokora waina eu do pitua ki naviriana maga asa, go euga wo doropusi kasua ki laketano kakana maga; navakilagiana kakana ega vei kubit rualima latesa, go naweleweleana kakana ega vei kubit rualima latesa:

⁴Go vatu warua maga ovara dolu, go napapa vau ovara sikai: go navakokotoana kakana ega vei tea vituakiana m̃elu nasum̃a ki nawota:

⁵Go lasa maga ni kold go ni silver ni nasum̃a ki Sup̃e, waina Nebukadnessar e dape lua ra m̃elu dua ki nasum̃a tapu waina e doko Yerusalem, po dape ra paki Babelon pano, lasa maga wanogoe euga vei tea tape‐liliua‐kiana po moro pei tea viragiana umai paki nasum̃a tapu waina e doko Yerusalem, euga sikasikai sarasara ra paki tokora adeada, go p̃a toropusi ra euga toko ekopu ni nasum̃a ki Sup̃e.

⁶Go nalakena tea wanogoe nigo Tattenai tea maramara pae taleva kerua ni noaisara, go nigo Shetharbosenai, go tea animu maga tea maramara maga, waina eu doko taleva kerua ni noaisara, kuga toko uvea ki tokora wanogoe:

⁷Kuga toropusi nawosiana ni nasum̃a waia ki Sup̃e ega toko; kuga toropusi tea maramara ki tea ni Yudea maga, go tea matua maga ki tea ni Yudea euga tavagi nasum̃a waia ki Sup̃e ega toko naliana.

⁸Go a moro mari natawonakiana sikai nalo ni tea waina kuga wo magi tea matua maga ni Yudea mari a nalo ni natavagiana ni nasum̃a waia ki Sup̃e: naga naloriki maga ki nawota, nasautoga pae taleva kerua ni noaisara, kuga tape namagovai po m̃arekareka pitua ki nia paki naatam̃oli maga wanogoe, ega vei navakokotoana kakana naga euga ta pei tea tugoroana mau.

⁹Go tea waina eu masauna, kau natuna tureai maga, go shiip anoai maga, go shiip natuna maga, raki naviriana tap̃arakiana maga paki Sup̃e ni nakoroatelagi, whiit, natasimena, waine, go naroro, pataka ni navasaana ki tea viri maga waina eu doko Yerusalem, euga vei tea vituakiana paki da sara naaleatia, euga ta dika mau:

¹⁰Naga euga vitua ki naviriana maga tea ni nap̃o lolo paki Sup̃e ni nakoroatelagi, po magi nawota go natuna maga dapasavasa nalo ni namauriana adeada.

¹¹Go a moro mari natawonakiana sikai, naga naata waina ega mari navasaana waia ega vanop̃ota, tea walagoto sikai ega vei tea tapeluaana pa dua ki nasum̃a aneana, go nae ega vei tea tapeana sake po pei tea vuri‐sai‐ana asa; go nasum̃a aneana ega vei tea mariana ega vei natap̃ata sikai nalakena tea wanogoe:

¹²Go Sup̃e waina e mari nagisana e doko tokora wanogoe doko, ega tap̃olosiwo ki nawota kite narei waina eu pe sai ki nam̃elearuda naga euga mari tea wanogoe ega vanop̃ota, naga euga mari sa ki nasum̃a waia ki Sup̃e waina e doko Yerusalem. Kinau Darius a po mari natawonakiana sikai; ega vei tea mariana ki nam̃arekarekaana.

¹³Go dapala waina nawota Darius e pitip̃aki asa, dapala nogoe Tattenai tea maramara pae taleva kerua ni noaisara, go Shethar‐bosenai, go tea adeada maga waina eu sikoti ra, eu mari m̃arekareka asa.

¹⁴Go tea matua maga ni Yudea eu davagi nasum̃a go eu disu p̃ia asa, nalakena naveanoasaiana ki profeta Hakai, go Sekariah natu ni Iddo. Go eu davagi a po mari sua e, dapala natip̃akiana ki Sup̃e ki Israel, go dapala natawonakiana ki Sairus, go Darius, go Artakserses nawota ni Persia.

¹⁵Go nasum̃a wanogoe e nopu naaleatia ketolu ni atelagi Adar, ni natau kelatesa ni namaramaraana ki nawota Darius.

¹⁶Go Israel natuna maga, tea viri maga, go naworawora ni Levi, go tea ni tea viragi‐lua‐pavakotoana maga waina eu doko, eu pavaigoro ragi ni natapugoroana ni nasum̃a wanogoe ki Sup̃e pilake nalaelaeaana.

¹⁷Go ragi ni natapugoroana ni nasum̃a wanogoe ki Sup̃e, eu pitua ki kau anoai p̃onotia sikai, shiip anoai p̃onotia dua, go shiip natuna p̃onotia pati; go eu pitua ki naninani anoai rualima sikai tamate dua eu magi Israel mamau pei navituaana ni namarinaleosaana, pataka ni naveveana ni naworawora maga ni Israel.

¹⁸Go eu dap̃otawotae tea viri maga eu doko tokora visarasara adeada maga, go tea ni naworawora ni Levi eu doko nawosiana visarasara adeada maga, raki nasuasuaana ni nasum̃a ki Sup̃e waina e doko Yerusalem; dapala waina e pei tea midiriana doko tusi ki Moses.

¹⁹Go tea ni tea viragi‐luapavakotoana maga eu mari navakalauana naaleatia kerualima sikai tamate pati ni atelagi vea.

²⁰Tea viri maga go naworawora ni Levi eu paka sikai dum̃ada mari dautau ki da; eu dautau puti: go eu mari punue navakalauana raki tea ni tea viragi‐lua‐pavakotoana maga, go raki taida tea viri maga, go dum̃ada raki da.

²¹Go Israel natuna maga, tea ni tea viragi‐luapavakotoana maga waina eu liliu umai, go tea maga mamau puti waina eu sikoti ra, waina eu dum̃ada p̃otae ra pa dua ki tea mamaragokiana ki nalauna maga ni navanua, naga euga lotu ki Yehovah Sup̃e ki Israel,

²²nara eu ganikani, Po mari nasaisaiana ni bred waina leven e dika asa naaleatia larua pilake nalaelaeaana: nalakena Yehovah e mari ra eu laelaea po doa nap̃op̃o ni nawota ni Assiria e p̃ia ki da, naga ega mari nam̃elearuda maga euga kasua doko nawosiana ni nasum̃a ki Sup̃e, Sup̃e ki Israel.