Read Nguna Togoa Etafe North ESRA 7 Bible Online

ESRA 7 - Nguna Togoa Etafe North bible

ESRA 7

¹Go edaku ki naleo maga wanogoe, doko ragi ni namaramaraana ki Artakserses nawota ni Persia, Esra natu ni Seraiah, natu ni Asariah, natu ni Hilkiah,

²Natu ni Shallum, natu ni Sadok, natu ni Ahitub,

³Natu ni Amariah, natu ni Asariah, natu ni Meraioth,

⁴Natu ni Serahiah, natu ni Ussi, natu ni Bukki,

⁵Natu ni Abishua, natu ni Finehas, natu ni Eleasar, natu ni Aaron tea viri warua liu:

⁶Esra wanogoe e pae Babelon sake pano; go e pei naatam̃oli midiri wia go atae nawotaeana ki Moses, waina Yehovah Sup̃e ni Israel e pitua ki nia: go nawota e dua e tea mamau puti waina e datago asa, nalakena nam̃elearu ni Yehovah Sup̃e aneana e doko asa doko.

⁷Go Israel natuna maga seara kakada eu mamau pano, go tea viri maga seara, go naworawora ni Levi, go tea lega maga, go tea leo parati ki namata maga, go tea suasua maga ni nasum̃a tapu, eu sake paki Yerusalem pano, natau kelarua ki nawota Artakserses.

⁸Go e umai paki Yerusalem atelagi kelima, natau kelarua ki nawota.

⁹Doko naaleatia vea ni atelagi vea, e atulake sake pae Babelon pano, go doko naaleatia vea ni atelagi kelima, e umai paki Yerusalem, nalakena nam̃elearu wia ni Sup̃e aneana e doko asa doko.

¹⁰Nalakena Esra e lawo ki nap̃op̃ona naga ega laaga parati ki nawotaeana ki Yehovah naga ega mari patakana, go naga ega vasa pisei ki natawonakiana maga go navasap̃otaeana maga Israel.

¹¹Go tusi waia e pei tea vataka sikai ma tusi waina nawota Artakserses e dua Esra tea viri go tea midiri asa, tea midiri navasaana maga ni natip̃akiana maga ki Yehovah, go ni natawonakiana aneana maga paki Israel.

¹²Artakserses nawota ki nawota maga, paki Esra tea viri, tea midiri nawotaeana ki Sup̃e ni nakoroatelagi, Natam̃ateana.

¹³Kinau a mari natawonakiana sikai, naga tea maga mamau puti ni narei ni Israel, go tea viri adeada maga, go naworawora ni Levi, waina eu doko namarakiana aginau doko, waina eu dum̃ada masauna naga euga vaki Yerusalem, euga sikoti ko pano.

¹⁴Nalakena nigo ku pei tea tip̃aki‐lua‐ana pano pae navasaana ki nawota go ki tea vusum̃aki larua aneana, naga p̃a vusuusu parati ki nalo ni Yudah go Yerusalem, dapala nawotaeana ki Sup̃e anigo, waina e doko nam̃elearum̃a;

¹⁵Go naga p̃a wo dapetape silver go kold pano, waina nawota go tea vusum̃aki aneana maga eu pitua ki da eu pei navituaana suasuakiana paki Sup̃e ki Israel, waina malo tokoana aneana e doko Yerusalem;

¹⁶Go silver go kold mamau puti waina p̃a wo pap̃ai a navanua mamau ni Babelon, pilake navituaana suasuakiana ki narei maga go ki tea viri maga, navituaana suasuakiana raki nasum̃a ki Sup̃e adeada waina e doko Yerusalem doko;

¹⁷Nalakena tea wanogoe p̃a mari m̃arekareka po pakotovi ki m̃ane wanogoe kau anoai maga, shiip anoai maga, shiip natuna maga, pilake navituaana ni flaur adeada maga, go navituaana takiana adeada maga, po pitua ki da wede ni naviriana ni nasum̃a ki Sup̃e animu waina e doko Yerusalem doko.

¹⁸Go tea waina nimu ma taim̃a maga ku midoaki nia naga e p̃ia nalo ni namagovai ni silver go ni kold waina e ko doko, tea wanogoe p̃a mari a, pataka ni namasauana ki Sup̃e animu.

¹⁹Go lasa maga waina euga vei tea vituakiana paki‐go raki nawosiana ni nasum̃a tapu ki Sup̃e anigo, p̃a vitua ki da paki narae ni Sup̃e waina e doko Yerusalem.

²⁰Go te navatuna p̃ota sikai e ko puoli raki nasum̃a ki Sup̃e anigo, waina e pei tea anigo naga p̃a vitua ki nia, tea wanogoe p̃a vitua ki nia pae nasum̃a ni natauakiana ni naleo wia ki nawota.

²¹Go kinau nawota Artakserses, kinau a mari natawonakiana sikai paki tea leo parati ki maga ni naleo wia tauakiana maga mamau puti waina eu doko taleva kerua ni noaisara, naga te navatuna sikai e pe toko waina Esra tea viri, tea midiri nawotaeana ki Sup̃e ni nakoroatelagi, e pe masauna pae mu, tea wanogoe ega vei tea mari‐m̃ata‐kiana,

²²Silver e pe vei talenta p̃onotia sikai, go whiit e pe vei totowo p̃onotia sikai, go waine e pe vei bath p̃onotia sikai, go naroro e pe vei bath p̃onotia sikai, go natasimena masale ki narowogiana.

²³Te navatuna sikai waina Sup̃e ni nakoroatelagi e pe vitip̃aki asa, tea wanogoe ega vei tea mari‐m̃ata‐kiana raki nasum̃a ki Sup̃e ni nakoroatelagi; mase namaritausuana aneana e pe vavaga dip̃a namarakiana ki nawota go natuna maga.

²⁴Go au moro noasokisoki paki mu naga e da pae nawotaeana mau naga ega vei tea toropusiana paki tea viri maga go naworawora ni Levi, go tea lega maga, go tea leo parati ki namata maga, go tea suasua maga ni nasum̃a tapu, kite tea suasua maga ni nasum̃a wanogoe ki Sup̃e, naga euga vitua ki shekel magovai, nasautoga, kite takis.

²⁵Go nigo Esra, ega vae namanumatuaana ki Sup̃e anigo waina e doko nam̃elearum̃a, p̃a lawo ki tea maraki maga go tea vasap̃otae maga, naga euga vasap̃otae narei maga mamau puti waina eu doko taleva kerua ni noaisara, tea maga mamau puti waina eu atae nawotaeana maga ki Sup̃e anigo; go p̃a vasa pisei ki tea waina e da atae ra mau.

²⁶Go naata waina ega wo da dogo parati ki nawotaeana ki Sup̃e anigo mau, go nawotaeana ki nawota, navasap̃otaeana ega vei tea marileana‐kiana m̃araverave paki naata wanogoe, e pe vei namateana, kite natip̃aki‐lua‐ana, kite natape‐lua‐ana ni naleo aneana maga, kite nasoli soliana.

²⁷Yehovah Sup̃e ki tamagida maga ega vei tea vasap̃iakiana, waina e doropusi naleo tapala nogoe e doko nap̃op̃o ni nawota, naga ega rekei ki nasum̃a ki Yehovah waina e doko Yerusalem doko;

²⁸Go waina e pap̃ai nasaup̃iaana narae ni nawota go tea vusum̃aki aneana maga, go narae ni tea maraki vakilagi maga ki nawota. Go nap̃op̃ogu e marasike nalakena nam̃elearu ni Yehovah Sup̃e aginau e doko au doko, go a matadoa naatam̃oli vakilagi maga m̃elu Israel, naga euga sikoti au sake pano.