Read Nguna Togoa Etafe North ESRA 9 Bible Online

ESRA 9 - Nguna Togoa Etafe North bible

ESRA 9

¹Go ragi waina naleo maga wanogoe eu nopu, tea maraki maga eu rumai paki m̃aladigi ki nau, eu naga, Narei ni Israel, go tea viri maga go naworawora ni Levi, eu da dum̃ada doko uvea ki narei maga ni navanua maga mau; eu do mari tea mamaragokiana adeada, dakiusi tea ni Kanaan, go tea ni Heth, go tea ni Peris, go tea ni Yebus, go tea ni Ammon, go tea ni Moab, go tea ni Ityipt, go tea ni Amor.

²Nalakena eu piragi natuda nagoroi maga eu pei tea adeada go tea ki natuda naanoai maga; dapala nogoe naworawora tapu eu dum̃ada mari ra eu pei tea mari‐sarisari‐ana pilake narei maga ni navanua maga: go nam̃elearu ni tea maraki maga go tea maramara maga e pei tea vea doko natapiriana wanogoe.

³Go ragi waina a dogo naleo wanogoe, a puap̃orae sugoro aginau go sugoro kovagoro aginau, po pualua nalolu ni nap̃augu go ni nasigu, po doko natano, a mataku p̃arua.

⁴Go sara naatam̃oli waina eu duruuru nawotaeana ki Sup̃e ki Israel, nalakena natapiriana ki tea ni tea viragi‐lua‐pavakotoana maga, eu pei tea viragi‐saisai‐kiana umai punusi au; go a mataku po doko natano pa pa paki ragi ni naviriana ni ragi melu.

⁵Go ragi ni naviriana ni ragi melu, a duleana m̃elu dua ki navaliana aginau, sugoro aginau go sugoro kovagoro aginau ero pei tea vuap̃oraeana; go a ditip̃atua, po darasike nam̃elearugu maga paki Yehovah Sup̃e aginau;

⁶Go a naga, Sup̃e aginau O, namatagu ero miala go a maliere asa naga aga leo sake punusi ko, Sup̃e aginau: nalakena namarinaleotageleana aginami maga eu pakilagi liu nap̃augami, go natapiriana aginami e p̃arua paki nakoroatelagi maga.

⁷Pae naaleatia maga ki tamagami maga pa pa paki naaleatia waia, natap̃aroana aginami e p̃arua; go nalakena namarinaleotageleana aginami maga, kinami ma nawota aginami maga, go tea viri aginami maga, au pei tea vituakiana paki nam̃elearu ni nawota maga ni navanua maga, paki lova, paki naviragilua‐pavakotoana, go paki natapepavakotoana, go paki namaliereana warua, e dapala waina e doko naaleatia waia.

⁸Ma ragi kiki waia nasaup̃iaana e pae Yehovah Sup̃e aginami umai, naga ega toropusi namagovai kakagami auga wia doko, go naga ega tua gami tuturi sikai tokora tapu aneana, naga Sup̃e aginami ega mari namatagami maga euga marama po dua gami navakamauriana kiki doko navei‐navitiana aginami.

⁹Nalakena au pei naviti maga; go Sup̃e aginami e da doropusi gami mau doko naveinavitiana aginami, ma e dua gami nadodomiana narae ni nawota maga ni Persia, naga ega tua gami navakamauriana naga auga sike lawo ki nasum̃a ki Sup̃e aginami, go naga auga tavagi piri tea sapura‐ki‐one kakana maga, go naga ega tua gami p̃aaka sikai doko Yudah go doko Yerusalem.

¹⁰Go ragi waia, Sup̃e aginami O, auga moro noa nasava? Nalakena au po doropusi natip̃akiana anigo maga,

¹¹Waina nigo ku pitip̃aki ara pae tea suasua anigo profeta maga, doko do naga, Navanua waina kuga wo paki asa po peani a, e pei navanua waina e da dautau, nalakena sara naloaana ki narei maga ni navanua maga, nalakena tea mamaragokiana adeada maga, waina eu mari a e pura ki naloaana adeada pae namatap̃agona sikai pa pa paki namatap̃agona kerua.

¹²Nalakena tea wanogoe kuga ta pitua ki natumu nagoroi maga dua natuda naanoai maga ara, kite piragi natuda nagoroi maga dua natumu naanoai maga ara, go kuga ta laaga natam̃ateana adeada, kite nawiaana adeada te ragi mau: naga kuga kasua, go kuga kani tea wia ni navanua, po doropusi a ega magi natumu maga pei naveanipiolikiana sikai pa pa ega tu mau du.

¹³Go waina tea mamau puti wanogoe eu pakilina ki gami nalakena natomariana sa aginami maga, go nalakena natap̃aroana warua aginami, go nigo Sup̃e aginami ku parati kiki ki gami, ma namarinaleotageleana aginami maga eu p̃arua, go ku maginami pitua ki namautiana warua dapala waia,

¹⁴Kinami auga moro dapiri natip̃akiana anigo maga, po dawiri sikoti narei maga waina eu do mari tea mamaragokiana maga wanogoe, kite? Nigo ku pe wo da maeto ki gami pa pa, po mari puoli ki gami, dapala waina namagovai ni naatam̃oli ega ta toko mau, go te seara euga ta pei tea mautiana mau, kite?

¹⁵Yehovah O, Sup̃e ni Israel, nigo ku leana; ku doropusi gami au pei namagovai ni naatam̃oli waina au mauri doko, dapala waina e doko naaleatia waia: p̃a leo, au pei tap̃aro maga doko naraem̃a; nalakena te naata sikai e da mariatae lawodu naraem̃a nalo ni tea wanogoe mau.