Read Nguna Togoa Etafe North NEHEMIA 1 Bible Online

NEHEMIA 1 - Nguna Togoa Etafe North bible

NEHEMIA 1

¹Navasaana maga ki Nehemiah, natu ni Hakaliah. Go e pakilina atelagi ni Kislef, doko natau kerualima dua, ragi waina kinau a doko Susa, natokoana ni naveinawotaana,

²E pakilina naga Hanani, taigu maga sikai kakada, e umai, nara ma naatam̃oli maga ni Yudah seara kakada; go a pusuusu paki da nalo ni naka ni Yudea, namagovai kakada waina eu pei tea toropusiana doko, waina eu da pei tea viragi lua pavakotoana pano mau, go nalo ni Yerusalem.

³Go eu noa ki nau, eu naga, Tea maga wanogoe waina eu pei tea toropusiana doko navanua, waina eu da pei tea viragi lua pavakotoana mau, eu sua narogokitesaana go namaliereana warua: p̃aaka ni Yerusalem e pei tea marip̃oraworaeana, go namata‐pua kakana maga eu pei tea tap̃arakiana ki nakapu.

⁴Go e pakilina ragi waina a dogo navasaana maga wanogoe, naga a do natano po dagi po susue naaleatia seara; go a pali po dapasavasa narae ni Sup̃e ni nakoroatelagi,

⁵Po naga, A pavara ni ko, Yehovah Sup̃e ni nakoroatelagi O, Sup̃e warua go tea mataukiana, waina ku pavaigoro navasasokiana go nadodomiana paki tea maga waina eu dodomi ko po pavaigoro natip̃akiana anigo maga:

⁶Nadaligam̃a ega taki dorogo, go namatam̃a eroga leleo, naga p̃a rogo natapasavasaana ki tea suasua anigo, waina a do magi tea suasua anigo Israel natuna maga dapasavasa asa naraem̃a ragi waia, aleati go p̃ogi, doko do noasai namarinaleosaana maga ki Israel natuna maga, waina au mari naleo sa asa dip̃a ko: io, kinami ma tea ni nasum̃a ki tamagu au mamau puti mari naleo sa.

⁷Au mari nasigisigileoana warua dip̃a ko, go au da pavaigoro natip̃akiana maga, kite natawonakiana maga, kite navasap̃otaeana maga, waina ku dip̃aki tea suasua anigo Moses asa.

⁸P̃a midoa ki parati ki, a pavara ni ko asa, navasaana waina ku dip̃aki tea suasua anigo Moses asa, doko do naga, Ku pe tapiri, a pe wo daperavera ki mu usuraki nalauna maga:

⁹Ma ku pe maradoa liliu umai punusi au, po pavaigoro natip̃akiana aginau maga po mari pataka da; tea taperaverakiana animu maga eu pe toko namatap̃ago edaku mau etano ni nakoroatelagi, ma kinau a pe wo piragi saisai ki da m̃elu dua ki tokora wanogoe, po piragi ra umai paki tokora waina a matadoa e naga aga mari nagisagu ega toko asa.

¹⁰Go nara wanogoe eu pei tea suasua anigo maga go narei anigo, waina nigo ku daulua ra pae namarimatuaana warua anigo, go pae nakasuaana ni nam̃elearum̃a.

¹¹Yehovah O, a pavara ni ko, nadaligam̃a ega taki dorogo paki natapasavasaana ki tea suasua anigo, go paki natapasavasaana ki tea suasua anigo maga, waina eu maro naga euga matau ki nagisam̃a: go p̃a mari tea suasua anigo ega veani narisup̃iaana naaleatia waia, a pavara ni ko asa, go p̃a vitua ki namaritadodomiana paki nia narae ni naatam̃oli waia. (Go kinau a pei tea tape lasa munu ki nawota.)