Read Nguna Togoa Etafe North NEHEMIA 10 Bible Online

NEHEMIA 10 - Nguna Togoa Etafe North bible

NEHEMIA 10

¹Go tea maga waina eu pulusoki a eu pei Nehemiah tea maraki, natu ni Hakaliah, go Sedekiah;

²Seraiah, Asariah, Yeremiah;

³Pashur, Amariah, Malkiyah;

⁴Hattush, Shebaniah, Malluk;

⁵Harim, Meremoth, Obadiah;

⁶Daniel, Cineton, Baruk,

⁷Meshullam, Abiyah, Miyamin;

⁸Maasiah, Bilkai, Shemaiah: nara eu pei tea viri maga.

⁹Go naworawora ni Levi: Yeshua natu ni Asaniah, Binnui, Henadad natuna maga sikai kakada, Kadmiel;

¹⁰Go taida maga Shebaniah, Hodiah, Kelita, Pelaiah, Hanan;

¹¹Maika, Rehob, Hashabiah;

¹²Sakkur, Sherebiah, Shebaniah;

¹³Hodiah, Bani, Beninu.

¹⁴Tea vakilagi maga ki narei: Parosh, Pahath‐moab, Elam, Sattu, Bani;

¹⁵Bunni, Askad, Bebai,

¹⁶Adoniyah, Bikvai, Adin;

¹⁷Ater, Hesekiah, Assur;

¹⁸Hodiah, Hashum, Besai,

¹⁹Harif, Anathoth, Nobai;

²⁰Makpiash, Meshullam, Hesir;

²¹Meshesabel, Sadok, Yadua;

²²Pelatiah, Hanan, Anaiah;

²³Hoshea, Hananiah, Hasshub;

²⁴Hallohesh, Pilha, Shobek,

²⁵Rehum, Hasabnah, Maaseiah;

²⁶Go Ahiah, Hanan, Anan;

²⁷Malluk, Harim, Baanah.

²⁸Go narei mamau puti, tea viri maga, naworawora ni Levi, tea vavaigoro maga ni namata‐pua maga, tea lega maga, tea suasua maga ni nasum̃a tapu, go tea maga mamau puti waina eu dum̃ada p̃otae lua ra m̃elu dua ki narei maga ni navanua maga paki nawotaeana ki Sup̃e, adagoroi maga, natuda naanoai maga, go natuda nagoroi maga, tea maga mamau puti waina eu peani naataeana go namidoakiataeana;

²⁹Eu puluti taida maga, naatam̃oli vakilagi adeada maga, po mari navasasakiana sikai go navivisaana sikai, naga euga surata pae nawotaeana ki Sup̃e, waina e pei tea vituakiana pae Moses tea suasua ki Sup̃e, go naga euga vavaigoro po mari pataka ni natip̃akiana maga mamau puti ki Yehovah, Nawota anigida, go ni navasap̃otaeana aneana maga, go ni natawonakiana aneana maga;

³⁰Go naga tuga wo da pitua ki natugida nagoroi maga paki narei maga ni navanua, kite magi natugida naanoai maga piragi natuda nagoroi maga mau:

³¹Go waina narei maga ni navanua eu pe viragi naleo sosori dapala korn umai naaleatia ni sabbath naga eu pe sori a, tu pe wo da pakokoto kiada doko sabbath mau, kite doko naaleatia tapu sikai mau: go naga natau kelarua tuga wo doropusi nataluaana ni natano anigida ega m̃oli asa, go naga tuga wo magi tea maga mamau puti waina naleo anigida maga eu one ara one, tuga wo madeada midoakikorokoro e.

³²Go tu dum̃agida manigida mari natawonakiana maga naga sara natau tuga wo pitua ki shekel sikai namagovai ketolu kakana raki nasuasuaana ni nasum̃a ki Sup̃e anigida;

³³Raki bred tokorae, go raki navituaana ni flaur ni sara naaleatia, go raki navituaana tap̃arakiana ni sara naaleatia ni sabbath maga, go ni atelagi vau maga, go raki nasaisaiana tatutakiana maga, go raki naleo tapu maga, go raki navituaana maga ni namarinaleosaana naga euga magi Israel mari natap̃augoroana, go raki nawosiana mamau puti ni nasum̃a ki Sup̃e anigida.

³⁴Go tu nadi ki gole, tea viri maga, naworawora ni Levi, go narei, nalo ni navituaana ni nakapu naga tuga viragi a umai paki nasum̃a ki Sup̃e anigida, pae nasum̃a maga ni tamagida maga, doko ragi tatutakiana maga sara natau, naga ega vei tea tap̃arakiana wede ni naviriana ki Yehovah Sup̃e anigida, dapala waina e pei tea midiriana nawotaeana:

³⁵Go naga sara natau tuga wo piragi tea vea ni takavea maga ni natano anigida, go tea vea maga ni nawa maga mamau puti ni sara nakau visarasara umai paki nasum̃a ki Yehovah:

³⁶Go takalapa ni natugida naanoai maga, go ni katel anigida maga, dapala waina e pei tea midiriana nawotaeana, go takalapa ni navata ni katel anigida maga go ni navata ni shiip anigida maga, naga euga vei tea viragiana umai paki nasum̃a ki Sup̃e anigida, paki tea viri maga waina eu do mari nawosiana ni nasuasuaana ekopu ni nasum̃a ki Sup̃e anigida:

³⁷Go naga tuga wo piragi tea wialua ni flaur anigida, go navituaana sikosikoviana anigida maga, go nawa maga ni sara nakau visarasara, go waine go naroro umai paki tea viri maga, paki em̃ago maga ni nasum̃a ki Sup̃e anigida; go kekerualima maga ni natano anigida paki naworawora ni Levi; nalakena nara naworawora ni Levi, eu dape kekerualima maga ni sara natokoana ni nalalawoana anigida maga.

³⁸Go tea viri, Aaron natuna naanoai, ega wo sikoti naworawora ni Levi ragi waina naworawora ni Levi euga wo dape kekerualima maga: go naworawora ni Levi euga wo piragi kekerualima ni kekerualima maga sake umai paki nasum̃a ki Sup̃e anigida, paki em̃ago maga, paki nasum̃a ni natauakiana.

³⁹Nalakena Israel natuna maga go naworawora ni Levi euga wo piragi navituaana sikosikoviana ni korn, go ni waine, go ni naroro umai paki em̃ago maga, tokora maga waina lasa maga ni tokora tapu eu doko asa, go tea viri maga waina eu mari nawosiana ni nasuasuaana, go tea vavaigoro namata‐pua maga, go tea lega maga: go tuga wo da doropusi nasum̃a ki Sup̃e anigida mau.