Read Nguna Togoa Etafe North NEHEMIA 11 Bible Online

NEHEMIA 11 - Nguna Togoa Etafe North bible

NEHEMIA 11

¹Go tea maraki maga ni narei eu doko Yerusalem doko: go narei mamau puti eu nadi ki gole naga euga viragi naatam̃oli sikai ni rualima sikai umai naga ega toko Yerusalem natokoana tapu, ma naatam̃oli loveti kakada euga toko natokoana p̃ota maga.

²Go narei eu pasap̃ia ki naatam̃oli maga mamau puti waina eu suasua dum̃ada pitua ki da naga euga toko Yerusalem doko.

³Go tea maga waia eu pei nap̃au maga ni naatam̃oli maga ni navanua waina eu doko Yerusalem: ma doko natokoana maga ni Yudah eu doko tea veaniana adeada doko natokoana adeada maga sara naata sikasikai, Israel natuna maga, tea viri maga, go naworawora ni Levi, go tea suasua maga ni nasum̃a tapu, go tea suasua maga ki Solomon natuda maga.

⁴Go Yudah natuna maga seara kakada, go Benyamin natuna maga seara kakada, eu doko Yerusalem doko. Go ni Yudah natuna maga: Ataia natu ni Ussiah, natu ni Sekariah, natu ni Amariah; natu ni Shefatiah, natu ni Mahalalel, ni Peres natuna maga;

⁵Go Maaseiah natu ni Baruk, natu ni Kol‐hose, natu ni Hasaiah, natu ni Adaiah, natu ni Yoiarib, natu ni Sekariah, natu ni tea ni Shiloh.

⁶Peres natuna maga tea mamau puti kakada waina eu doko Yerusalem doko, eu pei naatam̃oli p̃onotia pati rualima takuna latesa tamate latolu, naatam̃oli marimatua maga.

⁷Go tea maga waia eu pei Benyamin natuna maga; Sallu natu ni Meshullam, natu ni Yoed, natu ni Pedaiah, natu ni Kolaiah, natu ni Maaseiah, natu ni Ithiel, natu ni Yeshaiah.

⁸Go namatarau aneana maga, naatam̃oli matua p̃onotia loveti rualima takuna dua tamate latolu.

⁹Go Yoel natu ni Sikri e pei tea leoparatiki kakada: go Yudah natu ni Hassenuah e pei kerua kakana dap̃au natokoana.

¹⁰Ni tea viri maga: Yedaiah natu ni Yoiarib,

¹¹Yakin, Seraiah natu ni Hilkiah, natu ni Meshullam, natu ni Sadok, natu ni Meraioth, natu ni Ahitub tea tap̃au dap̃au nasum̃a ki Sup̃e,

¹²Go taida maga waina eu mari nawosiana ni nasum̃a, naatam̃oli p̃onotia latolu rualima takuna dua tamate dua: go Adaiah natu ni Yeroham, natu ni Pelaliah, natu ni Amsi, natu ni Sekariah, natu ni Pashur,

¹³natu ni Malkiyah, Go taina maga, nap̃au maga ni nasum̃a maga ni tamada maga, naatam̃oli p̃onotia dua rualima takuna pati tamate dua: go Amasai natu ni Asarel, natu ni Asai, natu ni Meshillemoth, natu ni Immer.

¹⁴Go taida maga naatam̃oli kasua maga ni namarimatuaana p̃onotia sikai rualima takuna dua tamate latolu: go tea leoparatiki kakada e pei Sabdiel, natu ni Hakedolim.

¹⁵Go naworawora ni Levi: Shemaiah natu ni Hasshub, natu ni Asrikam, natu ni Hashabiah, natu ni Bunni;

¹⁶Go Shabbethai go Yosabad, ni nap̃au maga ni naworawora ni Levi, waina ero dap̃au nawosiana ni katama ni nasum̃a ki Sup̃e;

¹⁷Go Mattaniah natu ni Maika, natu ni Sabdi, natu ni Asaf, waina e pei tea maraki naga ega atulake navasadodom̃atakiana pae natapasavasaana, go Bakbukiah kerua kakana ni taina maga; go Abda natu ni Shammua, natu ni Calal, natu ni Yeduthun.

¹⁸Go naworawora ni Levi waina eu doko natokoana tapu, eu mamau puti pei naatam̃oli p̃onotia dua rualima takuna latolu tamate pati.

¹⁹Go tea vavaigoro maga ni namata‐pua maga, Akkub, Talmon, go taida maga waina eu leleogoro doko namata‐pua maga, eu pei naatam̃oli p̃onotia sikai rualima takuna larua tamate dua.

²⁰Go tea ni Israel maga waina eu madoko, ni tea viri maga, go ni naworawora ni Levi, eu doko natokoana maga mamau puti ni Yudah, eu doko tea veaniana adeada doko sara naata sikasikai.

²¹Ma tea suasua maga ni nasum̃a tapu eu doko Ofel: go Siha go Cispa ero pei tea tap̃au maga dap̃au tea suasua maga ni nasum̃a tapu.

²²Go tea leoparatiki dap̃au naworawora ni Levi doko Yerusalem e pei Ussi natu ni Bani, natu ni Hashabiah, natu ni Mattaniah, natu ni Maika, ni Asaf natuna maga, tea lega maga waina eu dap̃au nawosiana ni nasum̃a ki Sup̃e.

²³Nalakena e pei natip̃akiana ki nawota nalo kakada, naga matele sikai ega vei agi tea lega maga, pataka ni sara naaleatia.

²⁴Go Pethahiah natu ni Meshesabel, natu ni Serah natu ni Yudah, e doko nap̃irikia ni nawota nalo ni sara naleo mamau puti ni narei.

²⁵Go nalo ni natokoana maga, go napega kakada maga, Yudah natuna maga seara kakada eu doko Kiriath‐arba go natokoana kakana maga, go Dibon go natokoana kakana maga, go Yekabseel go natokoana kakana maga;

²⁶Go Yeshua, go Moladah, go Beth‐pelet;

²⁷Go Hasar‐shual, go Beersheba go natokoana kakana maga;

²⁸Go Siklak, go Mekonah go natokoana kakana maga;

²⁹Go En‐rimmon, go Sorah, go Yarmuth;

³⁰Sanoah, Adullam, go natokoana kakada maga, Lakish go napega kakana maga, Asekah go natokoana kakana maga. Dapala nogoe eu m̃enaki doko pae Beersheba pano pa pa liliu nap̃aloa ni Hinnom.

³¹Go Benyamin natuna maga eu doko Ceba po disurisu pano, eu doko Mikmas go Aiya, go Beth‐el go natokoana kakana maga.

³²Go Anathoth, Nob, Ananiah;

³³Hasor, Ramah, Cittaim;

³⁴Hadid, Seboim, Neballat;

³⁵Lod, go Ono, nap̃aloa ni naatam̃oli vei mataisau maga.

³⁶Go naworawora ni Levi, natap̃otawotaeana kakada maga seara eu doko Yudah go Benyamin.