Read Nguna Togoa Etafe North NEHEMIA 12 Bible Online

NEHEMIA 12 - Nguna Togoa Etafe North bible

NEHEMIA 12

¹Go tea maga waia eu pei tea viri maga go naworawora ni Levi waina eu sake pano sikoti Serubabel natu ni Shealtiel, go Yeshua: Seraiah, Yeremiah, Esra;

²Amariah, Malluk, Hattush;

³Shekaniah, Rehum, Meremoth;

⁴Iddo, Cinetoi, Abiyah;

⁵Miyamin, Maadiah, Bilkah,

⁶Shemaiah, go Yoiarib, Yedaiah;

⁷Sallu, Amok, Hilkiah, Yedaiah. Tea maga wanogoe eu pei nap̃au maga ni tea viri maga go ni taida maga doko naaleatia maga ki Yeshua.

⁸Go naworawora ni Levi: Yeshua, Binnui, Kadmiel, Sherebiah, Yudah, go Mattaniah, waina e pei tea tap̃au dap̃au navasadodom̃atakiana, nae go taina maga.

⁹Go Bakbukiah go Unno, taida maga, ero lawodu leana dip̃a ra pae natap̃otawotaeana kakada maga.

¹⁰Go Yeshua e pesi Yoiakim, go Yoiakim e pesi Eliashib, go Eliashib e pesi Yoiada,

¹¹Go Yoiada e pesi Yonathan, go Yonathan e pesi Yaddua.

¹²Go doko naaleatia maga ki Yoiakim, tea viri maga eu doko, waina eu pei nap̃au maga ni nasum̃a maga ni tamada maga: ni Seraiah, Meraiah; ni Yeremiah, Hananiah;

¹³Ni Esra, Meshullam; ni Amariah, Yehohanan;

¹⁴Ni Malluki, Yonathan; ni Shebaniah, Yosef;

¹⁵Ni Harim, Adna; ni Meraioth, Helkai;

¹⁶Ni Iddo, Sekariah; ni Cineton, Meshullam;

¹⁷Ni Abiyah, Sikri; ni Miniamin, ni Moadiah, Piltai;

¹⁸Ni Bilkah, Shammua; ni Shemaiah, Yehonathan;

¹⁹Go ni Yoiarib, Mattenai, ni Yedaiah, Ussi;

²⁰Ni Sallai, Kallai; ni Amok, Eber;

²¹Ni Hilkiah, Hashabiah; ni Yedaiah, Nethanel.

²²Doko naaleatia maga ki Eliashib, Yoiada, go Yohanan, go Yaddua, nap̃au maga ni nasum̃a maga ni tamada maga go tea viri maga eu pei tea midiriana Tusi ni Kronikel maga, doko ragi ni namaramaraana ki Darius, tea ni Persia.

²³Levi natuna maga, nap̃au maga ni nasum̃a maga ni tamada maga, eu pei tea midiriana Tusi ni Kronikel maga pa pa liliu naaleatia maga ki Yohanan natu ni Eliashib.

²⁴Go nap̃au maga ni naworawora ni Levi: Hashabiah, Sherebiah, go Yeshua natu ni Kadmiel, go taida maga waina eu lawodu leana dip̃a ra naga euga samasama po pitua ki navasadodom̃atakiana, pataka ni natip̃akiana ki David, naatam̃oli ki Sup̃e, natap̃otawotaeana e leana dip̃a natap̃otawotaeana.

²⁵Mattaniah, go Bakbukiah, Obadiah, Meshullam, Talmon, Akkub, eu pei tea vavaigoro maga doko do pavaigoro nasum̃a maga ni natauakiana doko namatapua maga.

²⁶Nara wanogoe eu doko naaleatia maga ki Yoiakim, natu ni Yeshua, natu ni Yosadak, go doko naaleatia maga ki Nehemiah tea maramara, go ki Esra tea viri go tea midiri.

²⁷Go doko ragi ni naveakotokotomauana ni p̃aaka ni Yerusalem, eu laaga naworawora ni Levi naga euga viragi lua ra m̃elu dua ki naliada maga mamau puti umai paki Yerusalem naga euga vavaigoro naveakotokotomauana wanogoe ki nalaelaeaana, ki navasadodom̃atakiana maga, go ki nalegaana, ki simbal maga, ki salteri maga, go ki harp maga.

²⁸Go tea lega maga natuda maga eu dum̃ada saisai ki da m̃elu malo matemate waina e dalivirigoro Yerusalem, go m̃elu natokoana maga waina eu dalivirigoro Netofah;

²⁹Go pae Beth‐cilcal, go m̃elu napega maga ni Ceba go ni Asmaveth: nalakena tea lega maga eu dum̃ada madeada davagi natokoana maga dalivirigoro Yerusalem.

³⁰Go tea viri maga go naworawora ni Levi eu dum̃ada mari dautau ki da; go eu mari dautau ki narei, go ki namata‐pua maga, go ki p̃aaka.

³¹Go a piragi tea maraki maga ni Yudah sake umai paki nam̃asua ni p̃aaka, po pasa dawona ki taua warua dua waina euga vitua ki navasadodom̃atakiana, po pei taua doko nasurataana; go taua sikai kakada eu paki taleva ni matua po surata nam̃asua ni p̃aaka pano paki namata‐pua ni nasam̃a:

³²Go Hoshaiah e edakugoro ra pano, nara ma tea maraki maga ni Yudah seara kakada,

³³Go Asariah, Esra, go Meshullam, Yudah,

³⁴go Benyamin, go Shemaiah, go Yeremiah,

³⁵Go tea viri maga natuda maga seara kakada pilake paiga maga: Sekariah natu ni Yonathan, natu ni Shemaiah, natu ni Mattaniah, natu ni Mikaiah, natu ni Sakkur, natu ni Asaf;

³⁶Go taina maga, Shemaiah, go Asarel, Milalai, Cilalai, Maai, Nethanel, go Yudah, Hanani, pilake nagalo maga ni nalegaana ki David, naatam̃oli ki Sup̃e; go Esra tea midiri e doko kivea ki da:

³⁷Go eu surata pano paki namata‐pua ni namata noai, waina e doko leana dip̃a ra, po sake pae napua vavadu maga ni natokoana ki David, doko tokora ni nasakesakeana ni p̃aaka, elagi ki nasum̃a ki David pano pa pa liliu namata‐pua ni noai paki taleva ni elo sake.

³⁸Go taua kerua kakada waina eu pitua ki navasadodom̃atakiana, eu paki taleva ni mawiri po surata, go kinau a dausi ra pano, kinami ma namagovai ni narei doko nam̃asua ni p̃aaka, elagi ki nasum̃a vakilagi ni upu maga ni nakapu pano pa pa liliu p̃aaka welewelea;

³⁹Go eu surata liu namata‐pua ni Efraim, go namata‐pua ni tuai, go namata‐pua ni naika, go nasum̃a vakilagi ni Hananel, go nasum̃a vakilagi ni Hammeah, pano pa pa liliu namatapua ni shiip: go eu lawodu dorogo doko namata‐pua ni tea vavaigoro maga.

⁴⁰Dapala nogoe taua dua wanogoe waina eu pitua ki navasadodom̃atakiana eu lawodu doko nasum̃a ki Sup̃e, go kinau, go namagovai ni tea maraki maga au mamau doko:

⁴¹Go tea viri maga, Eliakim, Maaseiah, Miniamin, Mikaiah, Elioenai, Sekariah, go Hananiah, pilake paiga maga;

⁴²Go Maaseiah, go Shemaiah, go Eleasar, go Ussi, go Yehohanan, go Malkiyah, go Elam, go Eser. Go tea lega maga eu lega kasua go Yesrahiah e pei tea tap̃au dap̃au ra.

⁴³Go eu pitua ki naviriana warua maga naaleatia wanogoe, doko laelaea; nalakena Sup̃e e mari ra eu laelaea ki nalaelaeaana warua; go nagoroi maga nara ma piakirikiri maga eu laelaea: go nalaelaeaana waina e doko Yerusalem e pei tea rogoana uvea.

⁴⁴Go doko naaleatia maga wanogoe naatam̃oli maga eu pei tea lawokiana dap̃au em̃ago maga ni natauakiana maga, go ni navituaana sikosikoviana maga, go ni nawa vea maga, go ni kekerualima maga, waina euga vei tea saisaikiana paki ara, m̃elu napega maga ni natokoana maga, matele maga agi tea viri maga, go agi naworawora ni Levi: nalakena Yudah eu laelaea nalo ni tea viri maga go nalo ni naworawora ni Levi waina eu mari nawosiana ni nasuasuaana.

⁴⁵Go eu pavaigoro nawosiana ni nasuasuaana ki Sup̃e adeada, go nawosiana ni nasuasuaana ni namaridautua‐kiana, nara ma tea lega maga go tea vavaigoro maga ni namata‐pua maga eu mamau, pataka ni natip̃akiana ki David, go ki natuna Solomon.

⁴⁶Nalakena doko naaleatia maga ki David, Asaf e pei nap̃au ni tea lega maga, go e dap̃au ra nalegaana maga ni nasamasamaana go ni navasadodom̃atakiana paki Sup̃e.

⁴⁷Go doko naaleatia maga ki Serubabel, go doko naaleatia maga ki Nehemiah, Israel mamau puti eu dua tea lega maga go tea vavaigoro maga ni namata‐pua maga, matele adeada sikasikai sara naaleatia: go eu mari masale ki tea waina e pei agi naworawora ni Levi; go naworawora ni Levi eu mari masale ki tea waina e pei agi Aaron natuna maga.