Read Nguna Togoa Etafe North NEHEMIA 13 Bible Online

NEHEMIA 13 - Nguna Togoa Etafe North bible

NEHEMIA 13

¹Doko naaleatia maga wanogoe eu peve tusi ki Moses, go narei eu dogo e; go e pei tea vap̃aiana e pei tea midiriana asa, naga naworawora ni Ammon go naworawora ni Moab te sikai kakada ega wo da sili paki nasaisaiana ki Sup̃e mau;

²Nalakena eu da sua Israel natuna maga po da dua ra navinaga go noai mau, ma eu pasadapui Balaam naga ega mari dip̃a ra, naga ega vasa sa ki da: ma Sup̃e anigida e doa navasasakiana wanogoe e pei navasap̃iakiana sikai.

³Go e pakilina, ragi waina eu dogo sua nawotaeana, naga eu mari p̃otae ki naatam̃oli sarisari maga mamau puti m̃elu dua ki Israel.

⁴Ma pea ki tea wanogoe, Eliashib tea viri waina e pei tea lawosokiana dap̃au em̃ago maga ni nasum̃a ki Sup̃e anigida, go e pei namatarau m̃aladigi ki Tobiah,

⁵E maneana mari m̃ata ki em̃ago warua sikai doko tokora waina eu doropusi navituaana maga ni korn asa sala vea, go libano, go lasa maga, go kekerualima maga ni korn, go ni waine, go ni naroro, waina eu pei tea vituakiana pae natip̃akiana paki naworawora ni Levi, go paki tea lega maga, go paki tea vavaigoro maga ni namatapua maga; go navituaana sikosikoviana maga agi tea viri maga.

⁶Ma doko ragi mamau wanogoe kinau a da doko Yerusalem doko mau: nalakena doko natau kerualima dolu tamate kerua ki Artakserses, nawota ni Babelon, kinau a pano punusi nawota, go edaku ki naaleatia seara a datagovi a ragi ni namaromaroana sikai:

⁷Go a po umai paki Yerusalem, po leo atae tea sa waina Eliashib e mari a paki Tobiah, naga e maneana mari m̃ata ki em̃ago sikai doko roara maga ni nasum̃a ki Sup̃e.

⁸Go a maeto p̃arua: nalakena tea wanogoe a nadi ki naloriki maga mamau puti ki Tobiah m̃elu dua ki em̃ago wanogoe pano.

⁹Go a pitip̃aki, go eu mari dautua ki em̃ago maga: go a moro piragi liliua ki lasa maga ni nasum̃a ki Sup̃e, pilake navituaana maga ni korn, go libano.

¹⁰Go a pap̃ai naga matele maga agi naworawora ni Levi eu da pei tea vituakiana paki da mau; go naga naworawora ni Levi, go tea lega maga waina eu mari nawosiana, eu sava pano, sara naata sikasikai paki vanua adeada.

¹¹Go a pasa kasua paki tasiga maga, po naga, Ekasana nasum̃a ki Sup̃e e pei tea toropusiana doko? Go a piragi saisai ki da po lawo ki da naliada.

¹²Go Yudah mamau puti eu piragi kekerualima ni korn, go ni waine, go ni naroro, umai paki nasum̃a maga ni natauakiana.

¹³Go a lawo ki tea leoparatiki maga dap̃au nasum̃a maga ni natauakiana, Shelemiah tea viri, go Sadok tea midiri, go Pedaiah ni naworawora ni Levi: go kerua kakada e pei Hanan natu ni Sakkur, natu ni Mattaniah: nalakena nara eu pei tea midoakiana naga eu pei tea vei lomau maga, go nawosiana adeada e pei naga euga tap̃otawotae dua taida maga.

¹⁴Sup̃e aginau O, p̃a midoa ki nau nalo ni tea wanogoe, go p̃a ta kasi lua natomariana wia aginau maga mau, waina a mari ra paki nasum̃a ki Sup̃e aginau, go paki nasuasuaana kakana.

¹⁵Doko naaleatia maga wanogoe a punusi naatam̃oli maga ni Yudah seara kakada waina eu pasi m̃oru ni navasokiana ni nawa ni vaine, doko naaleatia ni sabbath, go waina eu dapetape napu maga umai, doko do sawa ki da nam̃adu ni ass; dapala nogoe nalo ni waine, go nawa maga ni vaine, go napuliva maga, go natapetapeana visarasara maga waina eu dape ra umai paki Yerusalem naaleatia ni sabbath: go a noasokisoki dip̃a ra naaleatia wanogoe ragi waina eu sori navinaga.

¹⁶Go naatam̃oli maga ni Tair nara ma eu doko natokoana wanogoe, waina eu piragi naika umai, go sara naleo visarasara, po sori ra naaleatia ni sabbath paki Yudah natuna maga, go doko natokoana ni Yerusalem.

¹⁷Go a pasa kasua paki tea vakilagi maga ni Yudah, po noa ki da, a naga, Naleo sa nasava waia waina ku do mari a, doko do mari sabbath e pei tea m̃oli?

¹⁸Tamamu maga eu da mari dapala nogoe mau, go Sup̃e anigida e da piragi tea sa mamau puti waia umai paki gami, go paki natokoana waia mau, kite? Ma nimu ku mari namaritausuana e moro umai paki Israel, nalakena ku mari sabbath e pei tea m̃oli.

¹⁹Go e pakilina ragi waina e atulake maligo namata‐pua maga ni Yerusalem pea ki sabbath, naga a pitip̃aki naga namata maga euga wo pei tea kokoroana, go a pitip̃aki naga euga wo da pei tea wolagatiana mau pa pa sabbath ega wo nopu: go a lawo ki tea suasua aginau maga seara kakada dap̃au namata‐pua maga, dapala waina natapetapeana sikai ega wo da pei tea viragiana umai naaleatia ni sabbath mau.

²⁰Dapala nogoe tea vakokoto maga, go tea sosori naleo visarasara maga, eu m̃enaki doko etaku ni Yerusalem paka rua kite paka tolu.

²¹Go a noasokisoki dip̃a ra, po noa ki da, a naga, Ekasana ku m̃enaki doko kivea ki p̃aaka? Ku pe moro mari dapala nogoe, a pe wo nadi ki nam̃elearugu maga paki mu. Go pae ragi wanogoe pa pa pa eu da moro umai naaleatia ni sabbath mau.

²²Go a dip̃aki naworawora ni Levi naga euga wo dum̃ada mari dautau ki da, go naga euga wo umai po pavaigoro namata‐pua maga naga euga vavaigoro naaleatia ni sabbath naga ega tapu. Sup̃e aginau O, p̃a moro midoa ki nau nalo ni tea wanogoe, go pae nawaruaana ni nadodomiana anigo, p̃a mauti au.

²³Go doko naaleatia maga wanogoe, a moro punusi naka ni Yudea waina eu dawiri nagoroi maga ni Ashdod, go ni Ammon, go ni Moab:

²⁴Go natuda maga namagovai kakada eu pasa ki masileo ni Ashdod, kite ki masileo ni narei p̃ota maga sikai kakada, ma eu da mariatae pasa ki masileo ni Yudah mau.

²⁵Go a pasa kasua paki da, po pasa sa ki da, po atugi ra seara kakada, po paku lua naloluda, po mari ra eu pivisa pae nagisa ni Sup̃e, po naga, Kuga wo da pitua ki natumu nagoroi maga paki natuda naanoai maga mau, kite magi natumu naanoai maga piragi natuda nagoroi maga euga vei adeada, kite euga vei animu mau.

²⁶Solomon nawota ni Israel, e da mari naleo sa ki naleo maga wanogoe kite? Nawota maga ni nalauna laapa te sikai kakada e da dakiusi a mau, go e pei tea dodomiana ki Sup̃e aneana, go Sup̃e e mari a e pei nawota dap̃au Israel mamau puti: ma nagoroi p̃ota maga eu pei nalakena nae e mari naleo sa.

²⁷Go e one gami one naga auga wo dogo tea waina eu noa e naga nimu ma ku do mari tea sa warua wanogoe, doko do dawiri nagoroi p̃ota maga, po do mari malauweluki dip̃a Sup̃e anigida, kite?

²⁸Go Yoiada natuna naanoai maga sikai kakada, natu ni Eliashib tea viri warua liu, e pei m̃o ni Sanballat naatam̃oli ni Bethhoron: nalakena tea wanogoe a kopasi lua e m̃elu dua ki nau pano.

²⁹Sup̃e aginau O, p̃a midoa ki da, nalakena eu mari sa ki navei‐tea‐viriana, go navasasokiana ni navei‐teaviri‐ana go ni naworawora ni Levi.

³⁰Nalakena tea wanogoe a mari dautau ki da m̃elu dua ki tea ni nalauna p̃ota maga mamau puti, po lawosoki tea viri maga, go naworawora ni Levi, eu doko nawosiana adeada;

³¹Go a marisokisoki nalo ni navituaana ni nakapu, ragi tatutakiana kakana maga, go nalo ni nawa vea maga. Sup̃e aginau O, p̃a midoa ki nau, raki tea waina e p̃ia.