Read Nguna Togoa Etafe North NEHEMIA 2 Bible Online

NEHEMIA 2 - Nguna Togoa Etafe North bible

NEHEMIA 2

¹Go e pakilina atelagi ni Nisan, doko natau kerualima dua ki nawota Artakserses, ragi waina waine e doko naraena, naga kinau a dape dakati waine wanogoe, po dua nawota asa. Go a da pea mata susue doko naraena sala vea mau.

²Go nawota e noa ki nau, e naga, Ekasana ku mata susue, go ku da masake mau? E da pei te navatuna, ma nasusueana ni nap̃op̃om̃a e sikina. Go kinau a mataku p̃arua.

³Go a noa ki nawota, a naga, Nawota ega mauri pa pa ega tu mau du: ekasana aga wo da mata susue ragi waina natokoana, tokora waina matigo maga ni tamagu maga eu doko asa, e makaka one, go namata‐pua kakana maga eu pei tea tap̃arakiana ki nakapu.

⁴Go nawota e noa ki nau, e naga, Natatagoana anigo e pei nasava? Go a dapasavasa paki Sup̃e ni nakoroatelagi.

⁵Go a noa ki nawota, a naga, Nawota e pe midoa ki m̃ata ki nia, go tea suasua anigo e pe vap̃ai nasaup̃iaana namatam̃a, p̃a tip̃aki lua au pano paki Yudah, paki natokoana ni matigo maga ni tamagu maga, naga aga tavagi piri a.

⁶Go nawota e noa ki nau, (go nawota nagoroi e dasake doko nap̃irikiana,) e naga, Nasurataana anigo ega wo parau, kite? Go seve ragi p̃a wo moro liliu umai? Go e p̃ia namata ni nawota naga ega tip̃aki lua au pano; go a datuta ki ragi sikai.

⁷Go a moro noa ki nawota, a naga, Nawota e pe midoa ki m̃ata ki nia, go euga tua au tusi midiriana maga paki tea maramara maga waina eu doko taleva kerua ni noaisara, naga euga suasua ki nau naga aga surata duagoto paki Yudah pano;

⁸Go tusi midiriana sikai paki Asaf, tea vavaigoro maala ni nakau ki nawota, naga ega tua au nakau maga naga aga mari tea walagoto maga raki namata‐pua maga ni tokora kasua ni nasum̃a tapu, go raki p̃aaka ni natokoana, go raki nasum̃a waina aga wo doko asa. Go nawota e dua au tea waina a datagovi a asa, nalakena nam̃elearu wia ni Sup̃e aginau waina e doko au.

⁹Go a pa punusi tea maramara maga taleva kerua ni noaisara, po dua ra tusi midiriana maga ki nawota. Go nawota e dip̃aki lua sikoti au tea maraki maga ni naatam̃oli navakalo, go naatam̃oli sakesaake horse maga.

¹⁰Ma ragi waina Sanballat, naatam̃oli ni Beth‐horon, go tea suasua Tobiah, naworawora ni Ammon sikai kakada, ero dogo narogorogoana nalo kakana, ero midoa ki sa ki p̃arua ki nia, nalakena naatam̃oli sikai e po umai naga ega magi Israel natuna maga laaga nawiaana adeada.

¹¹Go a paki Yerusalem, po doko asa doko naaleatia dolu.

¹²Go a duleana p̃ogi, kinami ma naatam̃oli seara au mamau; go a da noa ki te naata sikai mau tea waina Sup̃e aginau e doropusi a paki nap̃op̃ogu naga aga mari a Yerusalem: go a da pilake te nalo tuavati mau, ma tea waina a sakesaake asa e sikina.

¹³Go a dave pano p̃ogi pae namata‐pua ni nap̃aloa paki namata noai ni drakon, go paki namata‐pua ni nasam̃a, po leousiusi p̃aaka maga ni Yerusalem, waina eu pei tea mari‐p̃oraworaeana, go namata‐pua kakana maga waina eu pei tea tap̃arakiana ki nakapu.

¹⁴Go a disu pano paki namata‐pua ni namata noai, go paki luku noai ki nawota: ma tokora waina nalo tuavati waina a sakesaake asa ega surata asa e dika.

¹⁵Go a sake pano p̃ogi pae nap̃ap̃a noaisara, po leousiusi p̃aaka; go a maradoa liliu, po sili pae namata‐pua ni nap̃aloa, go dapala nogoe a moro liliu.

¹⁶Go tasiga maga eu da atae tokora waina a paki asa pano, kite tea waina a mari a mau; go a da noa ki tea ni Yudea maga mau, kite ki tea viri maga, kite ki navarapule maga, kite ki tasiga maga, kite ki tea maga waina eu p̃osiwosi ki nawosiana.

¹⁷Go a noa ki da, a naga, Ku punusi naga tu doko sa doko; Yerusalem e makaka one, go namata‐pua kakana maga eu pei tea tap̃arakiana ki nakapu: kuga umai go tuga tavagi piri p̃aaka ni Yerusalem, naga tuga ta moro pei tea vasapinoakiana asa mau.

¹⁸Go a noa ki da nalo ni nam̃elearu ni Sup̃e aginau waina e p̃ia paki nau; go nalo ni navasaana maga ki nawota waina e pasa asa paki nau. Go eu naga, Tuga wo duleana po davagi. Go eu dum̃ada mari nam̃elearuda maga eu kasua, naga euga mari nawosiana wia wanogoe.

¹⁹Ma ragi waina Sanballat, naatam̃oli ni Beth‐horon, go tea suasua Tobiah, naworawora ni Ammon sikai kakada, go Ceshem naka ni Arabia, eu dogo e, eu muru ki saudoa ki gami, po pasadao gami, po naga, Nasava waia waina ku do mari a? Kuga wo mari p̃auluulu dip̃a nawota, kite?

²⁰Go a pasadara ra, po noa ki da, a naga, Sup̃e ni nakoroatelagi nae ega wo mari gami auga risu p̃ia; nalakena tea wanogoe kinami tea suasua aneana maga, auga wo duleana po davagi: ma nimu ku da peani te matele mau, kite te navei‐nawota‐ana sikai, kite te namidoaki‐lagati‐ana sikai doko Yerusalem mau.