Read Nguna Togoa Etafe North NEHEMIA 3 Bible Online

NEHEMIA 3 - Nguna Togoa Etafe North bible

NEHEMIA 3

¹Go Eliashib tea viri warua liu e duleana, nara ma taina maga tea viri maga, go eu davagi namata‐pua ni shiip; eu dapugoro e, po sike namata kakana maga; eu dapugoro e pano pa pa liliu nasum̃a varau pakilagi ni Hammeah, pa pa liliu nasum̃a varau pakilagi ni Hananel.

²Go doko nap̃irikiana naatam̃oli maga ni Yeriko eu davagi. Go doko nap̃irikiada Sakkur natu ni Imri e davagi.

³Go Hassenaah natuna naanoai maga eu davagi namata‐pua ni naika; eu nadi ki sila kakana maga, po sike namata kakana maga, go nasaga kakana maga, go tea walagoto kakana maga.

⁴Go doko nap̃irikiada Meremoth natu ni Uriah natu ni Hakkos e davagi piri. Go doko nap̃irikiada Meshullam natu ni Berekiah, natu ni Meshesabel e davagi piri. Go doko nap̃irikiada Sadok natu ni Baana e davagi piri.

⁵Go doko nap̃irikiada naka ni Tekoa eu davagi piri; ma naatam̃oli vakilagi adeada maga eu da lawo ki nanoada paki nawosiana ki nawota adeada mau.

⁶Go Yoiada natu ni Paseah, go Meshullam natu ni Besodeiah ero davagi piri namata‐pua ni tuai; ero nadi ki sila kakana maga, po sike namata kakana maga, go nasaga kakana maga, go tea walagoto kakana maga.

⁷Go doko nap̃irikiada Melatiah tea ni Cibeon, go Yadon tea ni Meronoth eu davagi piri, nara ma naatam̃oli maga ni Cibeon go ni Mispah, waina eu doko etano ki navei‐nawota‐ana ki tea maramara ni taleva kerua ni noaisara.

⁸Doko nap̃irikiada Ussiel natu ni Harhaiah, waina ero dua pei mataisau maga ni kold, e davagi piri. Go doko nap̃irikiana Hananiah, tea mari naroro lolo maga sikai kakada, e davagi piri, go dapala nogoe eu p̃aakagoro Yerusalem pano pa pa liliu p̃aaka welewelea.

⁹Go doko nap̃irikiada, Refaiah natu ni Hur, tea maraki dap̃au namagovai ni Yerusalem e davagi piri.

¹⁰Go doko nap̃irikiada, Yedaiah natu ni Harumaf, e davagi piri tokora waina e doko leana dip̃a nasum̃a aneana. Go doko nap̃irikiana, Hattush natu ni Hashabneiah, e davagi piri.

¹¹Malkiyah natu ni Harim, go Hasshub natu ni Pahath‐moab, ero davagi piri malo mamau sikai, go nasum̃a varau pakilagi ni upu maga.

¹²Go doko nap̃irikiana, Shallum natu ni Hallohesh, tea maraki dap̃au namagovai ni Yerusalem, e davagi piri, nara ma natuna nagoroi maga.

¹³Hanun go naatatoko maga ni Sanoah eu davagi piri namata‐pua ni nap̃aloa; eu davagi a, po sike namata kakana maga, go nasaga kakana maga, go tea walagoto kakana maga, go eu moro davagi piri p̃aaka pano pa pa liliu namata‐pua ni nasam̃a, kubit manu sikai.

¹⁴Go Malkiyah natu ni Rekab, tea maraki dap̃au Beth‐hakerem, e davagi piri namatapua ni nasam̃a; e davagi a, po sike namata kakana maga, go nasaga kakana maga, go tea walagoto kakana maga.

¹⁵Go Shallum natu ni Kol‐hose, tea maraki dap̃au Mispah, e davagi piri namata‐pua ni namata noai; e davagi a, po dap̃augoro e, po sike namata kakana maga, go nasaga kakana maga, go tea walagoto kakana maga; go e davagi piri p̃aaka pae luku noai ni Shelah, nadigi ni roara ki nawota pano pa pa liliu napua vavadu maga waina eu siwosiwo pano pae natokoana ki David.

¹⁶Edaku ki nia, Nehemiah natu ni Asbuk, tea maraki dap̃au namagovai ni Beth‐sur, e davagi piri a pano pa pa liliu tokora waina e doko leana dip̃a matigo maga ki David, go pa pa liliu luku noai waina naatam̃oli maga eu dum̃ada mari a, go pa pa liliu nasum̃a ki naatam̃oli marimatua maga.

¹⁷Edaku ki nia, naworawora ni Levi eu davagi piri: Rehum natu ni Bani; edaku ki nia, Hashabiah tea maraki dap̃au namagovai ni Keilah e davagi piri matele aneana.

¹⁸Edaku ki nia, taida maga eu davagi piri: Bavai natu ni Henadad, tea maraki dap̃au namagovai ni Keilah;

¹⁹Go edaku ki nia, Eser natu ni Yeshua, tea maraki dap̃au Mispah e davagi piri matele mamau sikai doko leana dip̃a tokora ni nasakesakeana paki nasum̃a ni nalikau maga, tokora waina p̃aaka e pei tea welu‐ki‐doa‐ana asa.

²⁰Edaku ki nia Baruk natu ni Sabbai e davagi piri matele mamau sikai, pae tokora waina p̃aaka e pei tea welu‐ki‐doa‐ana asa pano pa pa liliu namata duaduru ni nasum̃a ki Eliashib, tea viri warua liu.

²¹Edaku ki nia, Meremoth natu ni Uriah natu ni Hakkos, e davagi piri matele mamau sikai, pae namata duaduru ni nasum̃a ki Eliashib pano pa pa liliu namatap̃ago ni nasum̃a ki Eliashib.

²²Go edaku ki nia, tea viri maga naatam̃oli maga ni m̃aladigi, eu davagi piri.

²³Edaku ki da, Benyamin go Hasshub ero davagi piri tokora waina e doko leana dip̃a nasum̃a adeada. Edaku ki da, Asariah natu ni Maaseiah natu ni Ananiah e davagi piri matele waina e doko nap̃irikia ni nasum̃a aneana.

²⁴Edaku ki nia Binnui natu ni Henadad e davagi piri matele mamau sikai, pae nasum̃a ki Asariah pano pa pa liliu tokora waina p̃aaka e pei tea welu‐ki‐doa‐ana asa.

²⁵Palal natu ni Usai e davagi piri matele waina e doko leana dip̃a tokora waina p̃aaka e pei tea welu‐ki‐doa‐ana asa, go nasum̃a varau pakilagi waina e sokari nasum̃a ki nawota pakilagi, waina e doko roara ki tea vavaigoro maga.

²⁶Edaku ki nia, Pedaiah natu ni Parosh e davagi piri pano pa pa liliu tokora waina e doko leana dip̃a namata‐pua ni noai paki taleva ni elo sake, go nasum̃a varau pakilagi waina e sokari nasum̃a ki nawota.

²⁷Edaku ki nia naka ni Tekoa eu davagi piri matele mamau sikai, doko leana dip̃a nasum̃a varau pakilagi waina e sokari nasum̃a ki nawota, go pano pa pa liliu p̃aaka ni Ofel. Go tea suasua maga ni nasum̃a tapu eu doko Ofel doko.

²⁸Tea viri maga eu davagi piri elagi ni namata‐pua ni horse, sara naata sikasikai leana dip̃a nasum̃a adeada.

²⁹Edaku ki da Sadok natu ni Immer e davagi piri matele waina e doko leana dip̃a nasum̃a aneana. Go edaku ki nia, Shemaiah natu ni Shekaniah, tea vavaigoro namata‐pua ni taleva ni elo sake, e davagi piri.

³⁰Edaku ki nia, Hananiah natu ni Shelemiah, go Hanun, Salaf natuna naanoai kelatesa, ero davagi piri matele mamau sikai. Edaku ki nia, Meshullam natu ni Berekiah, e davagi piri matele waina e doko leana dip̃a esum̃a kiana.

³¹Edaku ki nia, Malkiyah mataisau maga ni kold sikai kakada, e davagi piri pano pa pa liliu nasum̃a ki tea suasua maga ni nasum̃a tapu, go ki tea vakokoto maga, doko leana dip̃a namata‐pua ni Hammifkad, pano pa pa liliu em̃ago vakilagi ni naweluki.

³²Go tea mataisau maga ni kold go tea vakokoto maga eu davagi piri tokora waina e doko namawota ni em̃ago vakilagi ni naweluki go ni namata‐pua ni shiip.