Read Nguna Togoa Etafe North NEHEMIA 5 Bible Online

NEHEMIA 5 - Nguna Togoa Etafe North bible

NEHEMIA 5

¹Go nakuapiosoana warua sikai e sake m̃elu m̃aleoputo ni narei go ni nagoroi adeada maga dip̃a taida maga naka ni Yudea.

²Nalakena te seara eu doko waina eu naga, Au do pitua ki natugami naanoai maga go natugami nagoroi maga eu pei nanadisokiana, naga auga veani korn naga auga kanikani po mauri.

³Go te seara eu doko waina eu naga, Au do surupioli ki vanua aginami maga, go roara maga ni vaine aginami maga, go nasum̃a aginami maga raki korn nalakena navitoloana.

⁴Go tea p̃ota seara eu doko waina eu naga, Au sea ki m̃ane dip̃a vanua aginami maga go roara ni vaine aginami maga, naga auga vitua ki nasautoga ki nawota.

⁵Nadagami e dapala nada ni taigami maga go natugami maga go natuda maga: go p̃a leo, au mari natugami naanoai maga go natugami nagoroi maga eu pei naviti maga, go eu mari natugami nagoroi maga seara kakada eu one natano: go e da doko navei‐nawota‐ana aginami naga auga taulua ra mau; nalakena naatam̃oli p̃ota maga eu pei talakea ni vanua aginami maga go roara ni vaine aginami maga.

⁶Go a maeto p̃arua ragi waina a dogo nakuapiosoana adeada go navasaana maga wanogoe.

⁷Go a dum̃agu midoakiusiusi a, go a pasa kasua paki naatam̃oli vakilagi maga go tasiga maga, po noa ki da, a naga, Nimu ku dape lua narogoviana ki taimu maga sara naata kakamu. Go a soso saisai ki nasaisaiana warua sikai dip̃a ra.

⁸Go a noa ki da, a naga, Kinami pataka ni namariataeana aginami, au daulua taigami naka ni Yudea, waina eu pei tea soriana paki nalauna p̃ota maga; go nimu, kuga wo sori taimu maga naga auga wo daulua ra, kite? Go eu punuta doko, eu da pap̃ai te navasaana sikai naga euga noa e mau.

⁹Go a moro naga, Tea waina ku do mari a e da p̃ia mau: e da one mu one naga kuga matau ki Sup̃e anigida mau, nalakena navasapinoaana ki nalauna p̃ota maga, tea kokona ki gida maga, kite?

¹⁰Kinami ma namatarau m̃aladigi kinau, go tea suasua aginau maga au do dua ra tea seakiana ni m̃ane go ni korn. A pavara ni mu, tuga makoto ki narogoviana waina tu doropusi a doko ara.

¹¹Kuga vitua liliua ki vanua adeada maga, go roara ni vaine adeada maga, go roara ni oliva adeada maga, go nasum̃a adeada maga naaleatia waia, a pavara ni mu asa, ega vilake nanadisokiana maga waina ku dape lua ra kiada raki tea seakiana ni m̃ane, go ni korn, ni waine, go ni naroro.

¹²Go eu naga, Auga wo pitua liliua ki tea mamau puti paki da, go auga wo da datagovi ra te navatuna mau; dapala waina ku noa e, dapala nogoe auga wo mari a. Go a soso tea viri maga umai, go a dape navivisaana ki tea surupioli m̃ane, naga euga mari pataka ni nasaiana adeada wanogoe.

¹³Go a pua silasila ki sugoro aginau, po naga, Dapala nogoe Sup̃e ega sila ki sara naatam̃oli waina eu da pakavuro nasaiana waia m̃elu dua ki nasum̃a adeada go m̃elu dua ki nawosiana adeada; dapala nogoe euga wo pei tea silasilakiana po pei tea toropusiana euga wo p̃alo doko. Go nasaisaiana mamau puti eu naga, Amen; po samasama ni Yehovah. Go narei eu mari pataka ni nasaiana wanogoe.

¹⁴Go pae naaleatia waina a pei tea matadoaana naga aga vei tea maramara adeada doko navanua ni Yudah, pae natau kerualima dua pa pa paki natau kerualima dolu tamate dua ki nawota Artakserses, e pei natau rualima sikai tamate dua, kinau go taigu maga au da gani navinaga agi tea maramara mau.

¹⁵Tea maramara vea maga waina eu pea ki nau, eu pei tea madaga one narei, go eu dape lua kiada shekel ni silver rualima pati sara naaleatia sikasikai raki navinaga adeada; go tea suasua adeada maga nara ma eu peani p̃otae navei‐nawota‐ana dap̃au narei: ma kinau a da mari dapala nogoe mau, nalakena a matau ki Sup̃e.

¹⁶Go a doko nawosiana ni p̃aaka waia, go a da pei talakea ni natano mau: go tea suasua aginau maga mamau puti eu pei tea saisaikiana tokora wanogoe doko nawosiana.

¹⁷Go naatam̃oli p̃onotia sikai rualima takuna lima eu doko wede ni nakaniana aginau, naka ni Yudea tasiga maga, masale ki tea maga waina eu rumai punusi gami m̃elu m̃aleoputo ni nalauna p̃ota maga waina eu doko dalivirigoro gami.

¹⁸Go tea waina e pei tea mari‐m̃atakiana sara naaleatia sikasikai, e pei oks sikai, go shiip wia latesa; go manu maga nara ma eu maginau pei tea mari‐m̃ata‐kiana, go paka sikai naaleatia rualima sikai a pitua ki nawili maga ni waine eu laapa: a pitua ki tea laapa wanogoe, ma a da datago navinaga agi tea maramara mau, nalakena nasuasuaana e madaga one narei waia.

¹⁹P̃a midoa ki parati ki tea mamau puti waina a magi narei waia mari a, po saup̃ia ki nau, Sup̃e aginau O.