Read Nguna Togoa Etafe North NEHEMIA 6 Bible Online

NEHEMIA 6 - Nguna Togoa Etafe North bible

NEHEMIA 6

¹Go e pakilina ragi waina Sanballat go Tobiah, go Ceshem naatam̃oli ni Arabia, go tea kokona ki gami maga mamau puti eu dogo naga a davagi sua p̃aaka wanogoe, go naga te malo mari‐p̃oraeana e da moro doko asa mau; (ma a ko da sike lawo ki namata duaduru maga ni namata‐pua maga mau:)

²E pakilina naga Sanballat go Ceshem ero dip̃aki lua po noa ki nau, ero naga, P̃a umai, tuga saisai natokoana sikai ni malo matemate ni Ono. Ma ero midoa ki nia naga eroga mari sa ki nau.

³Go a dip̃aki lua tea tautauana maga pa punusi ra, doko do naga, Kinau a do mari nawosiana warua sikai, go a mari sa siwo paloti: ekasana nawosiana ega wo makoto, go aga wo doropusi a po siwo paloti punusi mu?

⁴Go eu dip̃aki lua umai punusi au paka vati dapala nogoe; go a pasadara ra dapala nogoe.

⁵Go Sanballat e dip̃aki lua tea suasua aneana umai punusi au dapala nogoe sala kelima, tusi midiriana sikai waina eu da pulusoki a mau e doko nam̃elearuna;

⁶Go tea waina e pei tea midiriana asa e naga, E pei tea rogorogokiana usuraki nalauna p̃ota maga, go Cashmu e noa e, naga nimu ma naka ni Yudea ku midoa ki nia naga kuga wo mari p̃auluulu; nalakena tea wanogoe ku do davagi p̃aaka wanogoe: go naga ku masauna naga p̃a vei nawota adeada.

⁷Go ku lawo ki profeta maga naga euga rogorogo nalo kakam̃a doko Yerusalem, doko do naga, Nawota sikai e doko Yudah: go ega ta pei tuai go nawota ega wo dogo e. Nalakena tea wanogoe p̃a umai, go tuga saisai pusum̃aki.

⁸Go a dip̃aki lua po noa ki nia, a naga, Naleo maga waina ku noa e, te sikai kakada e da pei tea mariana mau, ma e pei namidoakisap̃o‐ana ni nap̃op̃om̃a.

⁹Nalakena eu maridogo mari gami namatakuana, doko do naga, Nam̃elearuda maga euga wo doropusi nawosiana, go ega wo da pei tea mari‐sua‐ana mau. Ma a dum̃agu mari nam̃elearugu maga ero moro kasua liu.

¹⁰Go a pa punusi Shemaiah natu ni Delaiah natu ni Mehetabel waina e pei tea kokoroana doko; go nae e naga, Toroga saisai nasum̃a ki Sup̃e, ekopu ni nasum̃a tapu, go toroga kokoro p̃onoti namata kakana maga: nalakena euga wo umai naga euga mari punue ko; io, euga wo umai p̃ogi naga euga mari punue ko.

¹¹Go a naga, Naatam̃oli waina e dakiusi au ega wo sava pano, kite? Go sei e doko waina e pe takiusi au go e pe wo paki ekopu ni nasum̃a tapu naga e pe wo mauri? Kinau aga wo da sili paki asa mau.

¹²Go a atae naga p̃a leo, Sup̃e e da dip̃aki lua e umai mau: ma e dum̃ana noasai naveanoasaiana wanogoe dip̃a au: go Tobiah nara ma Sanballat ero pasadapui a asa.

¹³Tea waia e pei nalakena e pei tea vasadapuiana, naga kinau aga mataku, po mari dapala nogoe po mari naleo sa, go naga euga veani navatuna naga euga mari narogorogoana sa sikai, naga euga vasa pinoa ki nau asa.

¹⁴Sup̃e aginau O, p̃a midoa ki Tobiah go Sanballat pataka ni natomariana adeada maga waia, go p̃a moro midoa ki profeta nagoroi Noadiah, go profeta maga mamau puti waina eu masauna naga euga mari au aga mataku.

¹⁵Dapala nogoe eu davagi piri p̃aaka wanogoe; eu p̃osiwosi asa naaleatia rualima lima tamate dua go e nopu: eu mari sua e naaleatia kerualima dua tamate lima ni atelagi Elul.

¹⁶Go e pakilina ragi waina tea kokona ki gami maga mamau puti eu dogo e, go ragi waina tea ni nalauna p̃ota maga mamau puti waina eu dalivirigoro gami eu punusi a, e pakilina naga e pei tea ni namagaana namatada maga, go eu atae naga nawosiana wanogoe e pei tea vakavuroana nalakena Sup̃e aginami.

¹⁷Go doko naaleatia maga wanogoe naatam̃oli vakilagi maga ni Yudah eu dip̃aki lua tusi midiriana laapa paki Tobiah, go tusi midiriana maga ki Tobiah eu rumai paki da.

¹⁸Nalakena tea laapa ni Yudah eu pivisa paki nia, nalakena e pei napurum̃a ki Shekaniah natu ni Arah; go natuna Yehohanan e dawiri natu nagoroi ni Meshullam natu ni Berekiah.

¹⁹Go eu pasa naraegu nalo ni natomariana wia aneana maga, po noakisai a ki navasaana aginau maga. Go Tobiah e dip̃aki lua tusi midiriana maga naga ega mari au aga mataku.