Read Nguna Togoa Etafe North NEHEMIA 8 Bible Online

NEHEMIA 8 - Nguna Togoa Etafe North bible

NEHEMIA 8

¹Go narei mamau puti eu dum̃ada saisai ki da dapala naatam̃oli sikai maau paki tokora welewelea waina e doko kivea ki namata‐pua ni noai; go eu noa ki Esra, tea midiri, naga ega viragi umai tusi ni nawotaeana ki Moses waina Yehovah e pitua ki nia paki Israel.

²Go doko nakup̃a vea ni atelagi kelarua, Esra tea viri, e dape tusi ni nawotaeana umai paki narae ni nasaisaiana mamau puti, naanoai go nagoroi, go ni tea maga mamau puti waina eu mariatae daki dorogo ki namidoaki‐atae‐ana.

³Go e peve a doko tokora welewelea waina e doko kivea ki namata‐pua ni noai, pae malip̃ogi loaloa pa pa paki aleati matua, doko narae ni naanoai go nagoroi maga, go ni tea maga waina eu mariatae midoaki atae; go narei mamau puti eu daki nadaligada maga paki tusi ni nawotaeana wanogoe.

⁴Go Esra tea midiri e lawodu doko malo‐tuana sikai ni nakau waina eu mari a nalakena tea wanogoe; go tea maga waia, Mattithiah, go Shema, go Anaiah, go Uriah, go Hilkiah, go Maaseiah, eu lawodu nap̃irikiana ni matua; go tea maga waia, Pedaiah, go Mishael, go Malkiyah, go Hashum, go Hasbadana, go Sekariah, go Meshullam, eu lawodu nap̃irikiana ni mawiri.

⁵Go Esra e pukesi piri tusi wanogoe doko namata ni narei mamau puti: (nalakena e doko elagi ki narei mamau puti;) go ragi waina e pukesi piri a, narei mamau puti eu duleana:

⁶Go Esra e pasa p̃ia ki Yehovah, Sup̃e warua. Go narei mamau puti eu pasadara, po naga, Amen, Amen, doko do darasike nam̃elearuda maga: go eu kolo ki nap̃auda, po lotu ki Yehovah, eu kolo suai natano.

⁷Go Yeshua, go Bani, go Sherebiah, go Yamin, go Akkub, go Shabbethai, go Hodiah, go Maaseiah, go Kelita, go Asariah, go Yosabad, go Hanan, go Pelaiah, go naworawora ni Levi, eu silae narei naga euga midoaki atae nawotaeana: go narei eu du dorogo naliada.

⁸Go eu peve tusi ni nawotaeana ki Sup̃e doko do noap̃otae a; go eu dua ra namidoakip̃otae‐ana dapala waina eu midoaki atae naveveana wanogoe.

⁹Go Nehemiah nae waina e pei tea maraki, go Esra, tea viri go tea midiri, go naworawora ni Levi waina eu pasa pisei ki narei, eu noa ki narei mamau puti, eu naga, Naaleatia waia e dapu paki Yehovah Sup̃e animu; kuga ta susue kite dagi mau. Nalakena narei mamau puti eu dagi ragi waina eu dogo navasaana maga ni nawotaeana.

¹⁰Go e noa ki da, e naga, Kuga vae napua animu pano, kuga kani nam̃aladua, po munu tea gagadi, po pitua ki tea veani‐p̃otaeana paki naata waina te navatuna e da maneana pei tea mari‐m̃ata‐kiana mau: nalakena naaleatia waia e dapu paki Nawota anigida: go kuga ta dogokitesa mau; nalakena nalaelaeaana ki Yehovah e pei nakasuaana animu.

¹¹Dapala nogoe naworawora ni Levi eu mari narei mamau puti eu punuta, eu naga, Kuga vunuta, nalakena naaleatia waia e dapu; go kuga ta dogokitesa mau.

¹²Go narei mamau puti eu pae napua adeada pano naga euga kanikani, go naga euga munu, go naga euga vitua ki tea veani‐p̃otae‐ana maga, go naga euga mari nalaelaeaana warua, nalakena eu midoaki atae navasaana maga waina eu pei tea rogorogokiana paki da.

¹³Go doko naaleatia kerua, nap̃au maga ni nasum̃a maga ni tamada maga ni narei mamau puti, nara ma tea viri maga, go naworawora ni Levi, eu pei tea saisaikiana umai punusi Esra tea midiri, naga euga taki dorogo paki navasaana maga ni nawotaeana.

¹⁴Go eu pap̃ai e pei tea midiriana doko nawotaeana naga Yehovah e pitip̃aki asa pae Moses, naga Israel natuna maga euga wo doko tap̃aup̃au maga doko ragi ni nasaisaiana ni atelagi kelarua:

¹⁵Go naga euga wo dogorogo po noasai doko natokoana adeada maga mamau puti, go doko Yerusalem, euga wo naga, Kuga tave pano paki tava maga, po dape ara maga ni oliva umai, go ara maga ni oliva kau, go ara maga ni nasara, go ara maga ni paama, go ara maga ni nakau matolu maga, naga kuga mari tap̃aup̃au maga, dapala waina e pei tea midiriana.

¹⁶Nalakena tea wanogoe narei eu dave pano, po piragi ra umai, po dum̃ada madeada mari tap̃aup̃au maga, sara naata sikasikai doko nap̃au ni nasum̃a adeada maga, go doko roara adeada maga, go doko roara maga ni nasum̃a ki Sup̃e, go doko tokora welewelea ni namatapua ni noai, go doko tokora welewelea ni namata‐pua ni Efraim.

¹⁷Go nasaisaiana mamau puti ni tea maga waina eu pei tea viragi‐liliua‐kiana m̃elu dua ki naviragi‐lua‐pavakotoana, eu mari tap̃aup̃au maga, po doko tap̃aup̃au maga wanogoe doko: nalakena pae naaleatia maga ki Yeshua, natu ni Nun, pa pa paki naaleatia wanogoe, Israel natuna maga eu da mari dapala nogoe mau. Go e pei ragi ni nalaelaeaana warua.

¹⁸Go sara naaleatia, pae naaleatia vea pa pa paki naaleatia edaku mau, Esra e peve tusi ni nawotaeana ki Sup̃e. Go eu pavaigoro nasaisaiana naaleatia larua; go doko naaleatia kelatolu e pei nasoso‐saisaiana sikai, pataka ni natawonakiana kakana.