Read Nguna Togoa Etafe North NEHEMIA 9 Bible Online

NEHEMIA 9 - Nguna Togoa Etafe North bible

NEHEMIA 9

¹Go doko nakup̃a kerualima dua tamate kevati ni atelagi wanogoe, Israel natuna maga eu pei tea saisaikiana doko do pali, eu pilake nakulukulu ni sak, go natano e doko nap̃auda.

²Go naworawora ni Israel eu dum̃ada dap̃otawotae ra m̃elu dua ki nam̃enaki atatoko maga mamau puti, po lawodu po noasai namarinaleosaana adeada maga, go namarinaleotageleana maga ki tamada maga.

³Go eu lawodu doko naliada, go namagovai kevati sikai ni naaleatia wanogoe eu peve tusi ni nawotaeana ki Yehovah Sup̃e adeada; go namagovai kevati p̃ota sikai eu noasai namarinaleosaana adeada maga, po lotu ki Yehovah Sup̃e adeada.

⁴Go Yeshua go Bani, Kadmiel, Shebaniah, Bunni, Sherebiah, Bani, go Kenani eu lawodu napua vavadu ki naworawora ni Levi, po pioso ki nadaleo kasua sikai paki Yehovah Sup̃e adeada.

⁵Go naworawora ni Levi, Yeshua, go Kadmiel, Bani, Hashabneiah, Sherebiah, Hodiah, Shebaniah, go Pethahiah eu naga, Kuga tuleana po pasap̃ia ki Yehovah Sup̃e animu waina e pae tuai mau pa pa paki tuai mau: euga vasap̃ia ki nagisam̃a ni nasamasamaana waina e pakilagi liu dap̃au sara navasap̃iakiana go nasamasamaniana.

⁶Nigo ku pei Yehovah, nigo sikim̃a; nigo ku mari nakoroatelagi, nakoroatelagi ni nakoroatelagi maga, go taua adeada mamau puti, maramana go naleo maga mamau puti waina eu doko asa, natasi maga go naleo maga mamau puti waina eu doko ara, go nigo ku do mautipauri puti ra; go taua ni nakoroatelagi e do lotu ki‐go.

⁷Yehovah O, nigo ku pei Sup̃e, nigo ku matadoa Abram, po piragi lua e m̃elu dua ki Ur ki tea ni Kaldea maga, po salagisana ki Abraham;

⁸Go ku pap̃ai naga nap̃op̃ona e pei lomau namatam̃a, go ku mari navasasokiana sikai paki nia naga p̃a vitua ki navanua ni naworawora ni Kanaan, go ki naworawora ni Heth, go ki naworawora ni Amor, go ki naworawora ni Peris, go ki naworawora ni Yebus, go ki naworawora ni Circash, naga p̃a vitua ki nia paki naworaworana, go ku pakavuro nasaiana anigo; nalakena ku leana.

⁹Go ku punusi narogokitesaana ki tamagami maga waina eu doko Ityipt doko, po dogo nakuapiosoana adeada ragi waina eu doko Natasi Miala;

¹⁰Go ku mari navaivaiana maga go tea ni namagaana maga dip̃a Faraoh, go dip̃a tea suasua aneana maga mamau puti, go dip̃a narei mamau puti ni navanua aneana; nalakena ku atae naga eu mari madaga paki da; go ku dum̃am̃a manigo mari nagisa sikai, dapala waina e doko pa pa paki naaleatia waia.

¹¹Go ku dap̃otae natasi kivea ki da, dapala waina eu surata duagoto duaduru natasi doko natano garagara; go ku nadi ki tea sava dausi ra maga paki epua maga, dapala vatu sikai paki noai warua maga.

¹²Go ku maraki ra aleati doko napopouru lawodu sikai; go p̃ogi doko nakapu lawodu sikai, naga p̃a maramalagati ra napua waina euga vae asa pano.

¹³Go ku siwo umai paki tava Sinai, po pasa paki da pae nakoroatelagi, po dua ra navasap̃otaeana leana maga go nawotaeana lomau maga, go natawonakiana wia maga, go natip̃akiana maga:

¹⁴Go ku mari ra eu atae naga sabbath e pei naaleatia tapu anigo, po dip̃aki da natip̃akiana maga, go natawonakiana maga, go nawotaeana sikai, pae nam̃elearu ni tea suasua anigo Moses:

¹⁵Go ku dua ra navinaga pae nakoroatelagi nalakena navitoloana adeada, po madeada mari noai e dave m̃elu vatu laketoko nalakena namadouana adeada, po dip̃aki da naga euga sili pano po peani pioli ki navanua waina ku pivisa naga p̃a tua ra asa.

¹⁶Ma eu mari madaga, nara ma tamagami maga, go eu mari nanoada e kasua, po da daki dorogo paki natip̃akiana anigo maga mau,

¹⁷Go eu karai naga euga rogo parati ki, go eu da midoa ki tea ni namagaana anigo maga waina ku mari ra m̃aleoputo kakada mau; ma eu mari nanoada e kasua, go doko navei‐p̃auluulu‐ana adeada eu matadoa tea maraki sikai naga euga liliu paki navei‐naviti‐ana adeada: ma nigo ku pei Sup̃e, go ku do midoakikorokoro, ku pei Sup̃e saup̃ia go maritadodomi, tea mari daliali namaetoana, go tea warua nadodomiana, go ku da doropusi ra mau.

¹⁸Go ragi waina eu dum̃ada madeada mari kau natuna anoai takiana sikai, po naga, Tea waia e pei Sup̃e anigo waina e piragi lua ko m̃elu dua ki Ityipt sake umai; go ragi waina eu mari navei‐p̃auluuluana warua maga;

¹⁹Ma pae nadodomiana warua anigo maga, nigo ku da doropusi ra masop̃alo mau: napopouru lawodu waina e pea ki da doko napua e da puoli ki da aleati mau; kite nakapu lawodu p̃ogi, waina e maramalagati ra napua waina euga vae asa pano.

²⁰Go ku dua ra naatam̃a wia naga ega tapavanau ra, go ku da mauti manna anigo pa dua ki nawokada mau, go ku dua ra noai nalakena namadouana adeada.

²¹Io, natau rualima pati ku pagani ra doko masop̃alo, go eu da dika ki te navatuna mau; sugoro adeada maga eu da disu duai mau, go natuada maga eu da pei woka mau.

²²Go ku dua ra namarakiana maga go narei maga, waina ku dap̃otawotae ra pae matele adeada maga: dapala nogoe eu peani navanua ki Sihon, nawota ni Heshbon, go navanua ki Ok, nawota ni Bashan.

²³Go ku mari naworaworada eu laapa dapala m̃asoe maga ni nakoroatelagi, po piragi ra umai paki navanua waina ku sai paki tamada maga naga euga sili paki asa po peani a.

²⁴Dapala nogoe naworaworada eu sili pano po peani navanua wanogoe, go ku mari naatatoko maga ni navanua, naka ni Kanaan, eu pakitano naraeda, po pitua ki da paki nam̃elearuda maga, nara ma nawota adeada maga, go narei maga ni navanua, naga euga mari paki da ega tapala waina eu pe masauna.

²⁵Go eu dape pavakoto natokoana p̃aakagoroana maga, go navanua m̃anopunopu sikai, po peani nasum̃a maga waina eu pura ki sara naleo wia maga, m̃oru noai wia maga waina eu pei tea kiliana, roara maga ni vaine, go roara maga ni oliva, go nakau maga ni nawa eu laapa liu: dapala nogoe eu ganikani, po puka, po m̃anopunopu, po maro nawiaana warua anigo.

²⁶Ma eu dogopiri, po mari p̃auluulu dip̃a ko, po nadi ki nawotaeana anigo paki natakuda, po mari punue profeta anigo maga waina eu noasokisoki dip̃a ra naga euga mari ra euga maradoa liliu paki‐go, go eu mari navei‐p̃auluulu‐ana warua maga.

²⁷Nalakena tea wanogoe ku pitua ki da paki nam̃elearu ni tea kokona ki da maga, waina eu diesoki ra: go doko ragi ni narogokitesaana adeada, ragi waina eu pioso paki‐go, ku dogo nakua‐pioso‐ana adeada pae nakoroatelagi; go pae nadodomiana warua anigo maga, ku dua ra tea maumau maga waina eu mauti ra m̃elu dua ki nam̃elearu ni tea kokona ki da maga.

²⁸Ma ragi waina eu peani sua namaromaroana, eu moro mari tea waina e sa namatam̃a: nalakena tea wanogoe ku doropusi ra paki nam̃elearu ni tea kokona ki da maga, dapala waina eu maramara dap̃au ra: ma ragi waina eu maradoa liliu, po pioso paki‐go, ku dogo nakuapiosoana adeada pae nakoroatelagi; go ku paka laapa pualua ra ki nadodomiana anigo maga;

²⁹Go ku noasokisoki paki da naga euga maradoa liliu paki nawotaeana anigo: ma eu mari madaga, po da dogo parati ki natip̃akiana anigo maga mau, ma eu mari naleo sa dip̃a navasap̃otaeana anigo maga, (waina te naata sikai e pe vavaigoro ra, e pe wo mauri ara,) go eu dosa liliua ki napauda, po mari nanoada e kasua, po karai daki dorogo.

³⁰Ma natau laapa ku dapetape pakale ra, po noasokisoki paki da ki naatam̃a pae profeta anigo maga: ma eu karai daki nadaligada: nalakena tea wanogoe ku pitua ki da paki nam̃elearu ni narei maga ni navanua maga.

³¹Ma nalakena nadodomiana warua anigo maga ku da mari puoli ki puti ra kite doropusi ra mau; nalakena nigo ku pei Sup̃e saup̃ia go dodomi.

³²Go nalakena tea wanogoe, Sup̃e aginami, Sup̃e warua, tea kasua, go tea mataukiana, waina ku do pavaigoro navasasokiana go namaritadodomiana, namawosaana mamau puti waina e pakilina ki gami, go ki nawota aginami maga, go ki tea maraki aginami maga, go ki tea viri aginami maga, go ki profeta aginami maga, go ki tamagami maga, go ki narei anigo mamau puti, pae ragi ni nawota naga ni Assiria pa pa paki naaleatia waia, ega ta pei tea midoakiana namatam̃a naga e pei tea kiki sa mau.

³³Nigo ku mari leana nalo ni tea mamau puti waina eu pakilina ki gami; nalakena ku mari naveilomauana, ma kinami au mari nasigisigileoana:

³⁴Go nawota aginami maga, tea maraki aginami maga, tea viri aginami maga, go tamagami maga, nara eu da pavaigoro nawotaeana anigo mau, kite dogo parati ki natip̃akiana anigo maga go nanoasokisokiana anigo maga, waina ku noasokisoki paki da ara.

³⁵Nalakena eu da manigo suasua doko namarakiana adeada mau, go doko nawiaana warua anigo waina ku dua ra asa, go doko navanua welewelea go m̃anopunopu waina ku dua ra asa, go eu da maradoa m̃elu dua ki natomariana sa adeada maga mau.

³⁶P̃a leo, naaleatia waia kinami au pei naviti maga, go navanua waina ku dua tamagami maga asa naga euga kani nawa kakana go nawiaana kakana, p̃a leo, kinami au pei naviti maga doko asa doko.

³⁷Go e do pitua ki p̃arua ki navinagana paki nawota maga waina ku lawo ki da dap̃au gami nalakena namarinaleosaana aginami maga: go eu peani navei‐nawota‐ana dap̃au nap̃atokogami, go dap̃au katel aginami, ragi waina eu masauna, go au doko nariesokiana warua doko.

³⁸Go nalakena tea mamau puti wanogoe, au mari navasasokiana vei lomau sikai, po midiri a; go tea maraki aginami maga, go naworawora ni Levi aginami maga, go tea viri aginami maga, eu pulusoki a.