Read Nguna Togoa Etafe North ESTHER 1 Bible Online

ESTHER 1 - Nguna Togoa Etafe North bible

ESTHER 1

¹Go e pakilina naaleatia maga ki Ahasuerus, (tea waia e pei Ahasuerus waina e maramara dap̃au navanua p̃onotia sikai rualima takuna dua tamate larua, pae India pa pa paki Ethiopia:)

²Doko naaleatia maga wanogoe, ragi waina nawota Ahasuerus e dasake doko malo tasake ni namarakiana aneana, doko natokoana ni naveinawotaana Shushan,

³E doko natau ketolu ni namaramaraana aneana, naga e magi tea maraki aneana maga go tea suasua aneana maga mamau puti mari nakaniana sikai; tea marimatua maga ni Persia go Media, navarapule maga, go tea maraki maga ni navanua maga, eu doko naraena:

⁴Ragi waina e pisei ki nasogolapaana go nasamasamaana ni namarakiana aneana, go nadodomadaganiana go natatap̃auana wialua aneana naaleatia laapa, naaleatia p̃onotia sikai rualima takuna latolu.

⁵Go ragi waina naaleatia maga wanogoe eu nopu, nawota e magi narei mamau puti waina eu doko Shushan, natokoana ni naveinawotaana, mari nakaniana sikai, e magi tea vakilagi maga go tea vakitano maga mari a, naaleatia larua doko roara ni nasum̃a warua ki nawota;

⁶E peani nakulukulu taugoro‐p̃otae maga, tea tare, tea malakesa, go tea kesakesa, eu pei tea tutiana ki natali maga ni linen wia, tea miala kesakesa, paki rig maga ni silver eu oti tea lawodu maga ni vatu tau: nawewele saragoroana maga eu pei tea ni kold go ni silver, go eu doko elagi ni vatu welewelea ni vatu tau, tea miala go tea tare, go tea m̃onom̃ono, go tea loa.

⁷Go eu dua ra lasa maga ni kold eu munu ara, (lasa visarasara maga,) go waine ki nawota e p̃arua, dapala nasaup̃iaana ki nawota.

⁸Go eu munu pae nawotaeana; te naata e da sua ki da naga euga munu mau: nalakena nawota e dip̃aki tea viviatu maga mamau puti ni nasum̃a aneana, naga euga mari dapala namasauana ki sara naatam̃oli sikasikai.

⁹Go Vashti nawota nagoroi e magi nagoroi maga ni nasum̃a ki nawota waina eu pei agi nawota Ahasuerus, mari nakaniana sikai.

¹⁰Doko naaleatia kelarua, ragi waina nap̃op̃o ni nawota e laelaea ki waine, e dip̃aki Mehuman, Bistha, Harbona, Biktha, go Abaktha, Sethar, go Karkas, atavau larua, waina eu pei tea suasua maga doko narae ni nawota Ahasuerus,

¹¹Po noa naga euga viragi Vashti nawota nagoroi umai paki narae ni nawota, ega suni vauvau ni navei‐nawota‐ana umai, naga ega visei ki narei maga go tea maraki maga naleom̃atakiana aneana: nalakena e pei rae wia.

¹²Ma Vashti nawota nagoroi e karai umai, ragi waina nawota e dip̃aki nia asa pae nawoka ni tea suasua atavau maga: nalakena tea wanogoe nawota e maeto p̃arua, go namaritausuana aneana e pavaga nap̃alauna.

¹³Go nawota e noa ki naatam̃oli manumatua maga waina eu atae nawotaeana, (nalakena nawota e mari dapala nogoe paki tea maga mamau puti waina eu atae nawotaeana go navasap̃otaeana;

¹⁴Go naatam̃oli maga wanogoe, waina eu pei tea silae aneana maga eu pei Karshena, Shethar, Admatha, Tarshish, Meres, Marsena, go Memukan, tea maraki larua ni Persia go Media, waina eu doko narae ni nawota po do dasake pisari malo tasake ni namarakiana:)

¹⁵Nawota e naga, Tuga mari nasava paki Vashti nawota nagoroi, ega vae nawotaeana, nalakena e da dogo parati ki natip̃akiana ki nawota Ahasuerus pae nawoka ni atavau maga?

¹⁶Go Memukan e pasadara narae ni nawota go ni tea maraki maga, e naga, Vashti nawota nagoroi e da mari naleo sa paki nawota sikina mau, ma e moro mari a paki tea maraki maga go paki narei maga mamau puti waina eu doko navanua maga ki nawota Ahasuerus.

¹⁷Nalakena natomariana wanogoe waina nawota nagoroi e po mari a, ega vei tea ataeana paki nagoroi maga mamau puti, go ega mari naanoai adeada maga euga vei tea midoakip̃alo‐kiana namatada, ragi waina ega vei tea noasaiana naga, Nawota Ahasuerus e pitip̃aki naga Vashti nawota nagoroi ega vei tea viragiana umai paki naraena, ma e da umai mau.

¹⁸Go naaleatia waia tea maraki nagoroi maga ni Persia go Media, ragi waina euga rogo nalo ni natomariana wanogoe ki nawota nagoroi, nara ma euga wo moro pasa dapala nogoe paki tea maraki maga mamau puti ki nawota. Go dapala nogoe namidoaki‐p̃alo‐kiana ega wo doko, go namaritausuana warua ega wo pakilina.

¹⁹Waina nawota e pe midoaki nia naga e p̃ia, go natip̃akiana sikai ega m̃elu pae nawota pano, go tusi sikai ega vei tea midiriana ega vei nawotaeana sikai paki tea ni Persia go tea ni Media, go ega ta pei tea mariana ega vanop̃ota mau, naga Vashti ega ta moro umai paki narae ni nawota Ahasuerus mau; go nawota ega vitua ki tokora vakilagi aneana paki tea p̃ota sikai waina e p̃ia liu sa.

²⁰Go ragi waina natawonakiana ki nawota waina nae ega mari a, ega vei tea rogorogokiana usuraki namarakiana aneana, (nalakena e p̃arua,) ragi wanogoe nagoroi laki maga mamau puti, tea vakilagi maga go tea vakitano maga, euga wo dodomadagani adawota maga.

²¹Go namidoakip̃otae‐ana wanogoe e p̃ia namata ni nawota go ni tea maraki maga; go nawota e mari dapala navasaana ki Memukan:

²²Go e dip̃aki lua tusi maga pano paki navanua maga mamau puti ki nawota, paki sara navanua sikasikai dapala namidiriana kakada, go paki sara narei sikasikai dapala masileo adeada, po noa naga sara naanoai euga sikasikai pei tea maraki ni nasum̃a adeada, go naga euga rogorogo ki nia ki masileo ki narei adeada.