Read Nguna Togoa Etafe North ESTHER 2 Bible Online

ESTHER 2 - Nguna Togoa Etafe North bible

ESTHER 2

¹Edaku ki naleo maga wanogoe, ragi waina namaetoana ki nawota Ahasuerus e nopu, e moro midoaki Vashti go tea waina e mari a, go tea waina eu midoaki p̃otae dip̃a e.

²Ragi wanogoe tea suasua maga ki nawota waina eu maneana suasua eu naga, Nagoroi atara leom̃atakiana maga euga magi nawota pei tea laagaana:

³Go nawota ega tawona ki tea viviatu maga navanua mamau puti ni namarakiana aneana, naga euga viragi saisai ki puti nagoroi atara leom̃atakiana maga paki Shushan, paki natokoana ni naveinawotaana, paki nasum̃a ki nagoroi maga, euga toko etano ki navavaigoroana ki Hekai, tea suasua atavau sikai ki nawota, tea leo parati ki nagoroi maga; go naleo maga ni namaridautau‐ki‐da‐ana euga vei tea vituakiana paki da:

⁴Go nagoroi atara waina nawota ega midoaki m̃ata ki p̃arua ki nia ega vei tea mariana ega vei nawota nagoroi oli Vashti. Go tea wanogoe e p̃ia namata ni nawota; go e mari dapala nogoe.

⁵Go naatam̃oli sikai ni Yudea e doko Shushan, natokoana ni naveinawotaana, nagisana Mordekai natu ni Yair, natu ni Shimei, natu ni Kish, naatam̃oli sikai ni Benyamin;

⁶Waina e pei tea viragi‐lua‐ana m̃elu dua ki Yerusalem pano, nara ma tea vua‐pavakotoana maga waina eu mamau pei tea viragi‐lua‐ana pano sikoti Yekoniah, nawota ni Yudah, waina Nebukadnessar nawota ni Babelon, e piragi lua ra pano.

⁷Go naatam̃oli wanogoe e pakale Hadassah, aloana natuna nagoroi, nagisana Esther: nalakena tamana go p̃ilana ero da moro doko, go naatara wanogoe e pei rae wia go e pei tea leom̃atakiana sikai; go ragi waina tamana go p̃ilana ero mate, Mordekai e piragi a e pei natuna nagoroi.

⁸Go e pakilina, ragi waina natip̃akiana ki nawota go natawonakiana aneana e pei tea rogoana, go ragi waina naatara laapa eu pei tea viragi‐saisai‐kiana paki Shushan, paki natokoana ni naveinawotaana, doko navavaigoroana ki Hekai, naga Esther e pei tea viragiana umai paki nasum̃a ki nawota, paki navavaigoroana ki Hekai, tea leo parati ki nagoroi maga.

⁹Go e midoaki m̃ata ki naatara wanogoe, go nae e pap̃ai nasaup̃iaana namata ni nawota; go nawota e mari m̃araverave po dua e naleo maga ni namari‐dautauki‐nia‐ana, pilake tea waina e pei tea aneana, go naatara larua waina e p̃ia euga vei tea aneana m̃elu nasum̃a ki nawota: go e piragi ra ma tea suasua naatara aneana maga eu mamau umai paki tokora wia liu ni nasum̃a ki nagoroi maga.

¹⁰Esther e ko da noakisai narei aneana kite namatarau aneana mau: nalakena Mordekai e pasa parati ki nia naga ega ta noakisai ra asa mau.

¹¹Go sara naaleatia Mordekai e surata kivea ni roara ni nasum̃a ki nagoroi maga, naga ega atae Esther e dapala sava, go nasava waina ega vakilina ki nia.

¹²Go ragi waina e po pei ragi adeada naga naatara maga euga sikasikai pa punusi nawota Ahasuerus, edaku ki e pei tea mariana paki da dapala nawotaeana nalo ni nagoroi maga atelagi rualima sikai tamate dua, (nalakena e dapala nogoe naga naaleatia maga ni namari‐dautau‐kida‐ana eu pei tea vakavuroana, e pei atelagi latesa ni naroro ni murra, go atelagi latesa ni nap̃o lolo maga, go eu pilake naleo maga ni namariautau‐ki‐nagoroi‐maga‐ara,)

¹³Ragi wanogoe dapala waina naatara wanogoe e pa punusi nawota, dapala nogoe tea waina e masauna eu dua e asa, naga ega tape a pano sikoti a m̃elu dua ki nasum̃a ki nagoroi maga paki nasum̃a ki nawota.

¹⁴E pano ragi melu, go matamai ki nia e moro liliu paki nasum̃a kerua ki nagoroi maga, doko etano ki navavaigoroana ki Shaaskas, tea suasua atavau sikai ki nawota, waina e leo parati ki narup̃a maga: e da moro umai punusi nawota mau, waina nawota e pe ta midoaki m̃ata ki nia, go e pe ta soso noa nagisana.

¹⁵Go ragi waina e pei ragi ki Esther, natu nagoroi ni Abihail, aloa ni Mordekai waina e pakale a e pei natuna nagoroi, ragi waina e pei ragi aneana naga ega va punusi nawota, e da masau te navatuna mau, ma tea waina Hekai tea suasua atavau sikai ki nawota, tea leo parati ki nagoroi maga, e noa‐ki‐p̃otae a asa. Go Esther e pap̃ai nasaup̃iaana namata ni tea maga mamau puti waina eu leo punusi a.

¹⁶Go eu piragi Esther umai punusi nawota Ahasuerus, paki nasum̃a ni naveinawota‐ana aneana, atelagi kerualima sikai waina e pei atelagi Tebeth, natau kelarua ni namaramaraana aneana.

¹⁷Go nawota e dodomi Esther p̃arua liu nagoroi maga mamau puti, go nae e pap̃ai nasaup̃iaana go navasam̃atakiana namatana p̃arua liu naatara p̃ota maga mamau puti; go e sawa ki vauvau ni navei‐nawota‐ana e doko nap̃auna, po mari a e pei nawota nagoroi oli Vashti.

¹⁸Go nawota e magi tea maraki aneana maga mamau puti go tea suasua aneana maga mari nakaniana warua sikai nalakena Esther; go e noasai namaromaroana sikai usuraki navanua maga, po pitua ki nadodomiana maga dapala navasap̃iakiana ki nawota.

¹⁹Go ragi waina naatara maga eu po moro pei tea viragi‐saisai‐kiana sala kerua, ragi wanogoe Mordekai e doko namata‐pua ki nawota.

²⁰Esther e ko da noakisai namatarau aneana kite narei aneana mau; dapala waina Mordekai e pasa parati ki nia asa: nalakena Esther e dogo parati ki natip̃akiana ki Mordekai, dakiusi waina e pei piakiki doko sikoti a.

²¹Doko naaleatia maga wanogoe, ragi waina Mordekai e doko namata‐pua ki nawota, tea suasua atavau maga ki nawota tea rua kakada, Biktan ma Teresh, ero pei te seara ni tea maga waina eu pavaigoro namata, nara ero maeto po laaga naga eroga nadi ki nam̃elearuda paki nawota Ahasuerus.

²²Go Mordekai e atae a, po noakisai Esther nawota nagoroi asa, go Esther e noakisai nawota asa, e pasa pae nagisa ni Mordekai.

²³Go ragi waina eu pusuusu parati ki nalo kakana, go e pei tea vap̃aiana naga e pei lomau, eu sara ki da ero dau nakau sikai dau: go e pei tea midiriana tusi ni naleo maga waina eu pei tea mariana doko sara naaleatia doko narae ni nawota.