Read Nguna Togoa Etafe North ESTHER 3 Bible Online

ESTHER 3 - Nguna Togoa Etafe North bible

ESTHER 3

¹Edaku ki naleo maga wanogoe, nawota Ahasuerus e pusake Haman natu ni Hammedatha, naatam̃oli ni Akak, e pei tea vakilagi, po lawo ki malo tasake aneana e pakilagi liu tea ki tea maraki maga mamau puti waina eu doko sikoti a.

²Go tea suasua maga mamau puti ki nawota, waina eu doko namata‐pua ki nawota, eu kolo suai natano po dodomadagani Haman: nalakena nawota e pitip̃aki asa nalo kakana. Ma Mordekai e da kolo suai natano mau, go e da mari nadodomadaganiana paki nia mau.

³Go tea suasua maga ki nawota waina eu doko namata‐pua ki nawota, eu noa ki Mordekai, eu naga, Ekasana ku dapiri natip̃akiana ki nawota?

⁴Go e pakilina, ragi waina eu pasa paki nia sara naaleatia, ma e da dogo parati ki da mau, naga eu noakisai Haman asa, naga euga vunusi navasaana ki Mordekai ega tapala sava: nalakena e pea noa ki sua ra naga e pei tea ni Yudea sikai.

⁵Go ragi waina Haman e punusi naga Mordekai e da kolo suai natano mau go e da mari nadodomadaganiana paki nia mau, ragi wanogoe Haman e pura ki namaritausuana.

⁶Ma e midoaki p̃alo ki nia naga ega nadi ki nam̃elearuna paki Mordekai ega sikina mau; nalakena eu pea noakisai a narei ki Mordekai: nalakena tea wanogoe Haman e laaga naga ega mari sa ki puti ki tea ni Yudea maga, narei ki Mordekai, waina eu doko usuraki namarakiana mamau ki Ahasuerus.

⁷Doko atelagi vea, waina e pei atelagi Nisan, doko natau kerualima sikai tamate dua ki nawota Ahasuerus, eu nadi ki Pur, waina e pei gole, narae ni Haman sara naaleatia pa pa paki atelagi kerualima sikai tamate dua, waina e pei atelagi Adar.

⁸Go Haman e noa ki nawota Ahasuerus, e naga, Narei sikai e doko waina e pei tea taperaverakiana sari narei maga ni navanua maga mamau puti ni namarakiana anigo; go nawotaeana adeada maga eu panop̃ota, eu da dakiusi tea ki narei p̃ota maga; go eu da pavaigoro nawotaeana maga ki nawota mau: nalakena tea wanogoe e da p̃ia mau naga nawota ega suasua ra.

⁹Waina e pe wia namata ni nawota, go ega vei tea midiriana tusi sikai naga euga vei tea marisakiana: go aga wo pakotovi paki nam̃elearu ni tea maga waina eu do leo parati ki nawosiana ki nawota, talenta ni silver tivilia sikai, waina ega vaki nasum̃a maga ni natauakiana ni naleo wia maga ki nawota.

¹⁰Go nawota e sawo lua rig aneana m̃elu dua ki nakinina, po pitua ki nia paki Haman natu ni Hammedatha, naatam̃oli ni Akak, tea kokona sikai ki tea ni Yudea maga.

¹¹Go nawota e noa ki Haman, e naga, Silver wanogoe e pei tea vituakiana paki‐go go narei ma ega tapala nogoe, naga p̃a mari paki da tea waina ku midoaki nia naga e p̃ia.

¹²Go doko atelagi vea, naaleatia kerualima sikai tamate dolu kakana, eu soso saisai ki tea midiri maga ki nawota, go eu midiri dapala tea mamau puti waina Haman e pitip̃aki asa paki satrap maga ki nawota, go paki tea maramara maga waina eu dap̃au sara navanua, go paki tea maraki maga ni narei maga mamau puti; paki sara navanua pae namidiriana kakada, go paki sara narei pae masileo visarasara adeada maga; e pei tea midiriana pae nagisa ni nawota Ahasuerus, go e pei tea vulusokiana ki rig ki nawota.

¹³Go eu dip̃aki lua tusi maga pae nam̃elearu ni naatam̃oli sava kasua maga pano usuraki navanua maga mamau puti ki nawota, po noa naga euga mari sa ki po maripunuvunue naatam̃oli maga mamau puti ni Yudea, go naga euga mari ra euga vano puoli, tea vusavusa maga go tea matua maga, piakirikiri kiki maga go nagoroi maga, doko naaleatia sikai maau, naaleatia kerualima sikai tamate dolu ni atelagi kerualima sikai tamate dua, waina e pei atelagi Adar, go naga euga tape tea vuti‐lua‐pavakotoana adeada.

¹⁴Tusi sikai waina e dakiusi tusi waina e naga natip̃akiana ega vaki sara navanua, e pei tea rogorogokiana usuraki narei maga mamau puti, naga euga mari m̃ata raki naaleatia wanogoe.

¹⁵Naatam̃oli sava kasua maga waina eu dape tusi maga pano, eu mari m̃araverave pae natip̃akiana ki nawota, go natawonakiana wanogoe e pei tea rogorogokiana natokoana ni naveinawotaana Shushan: go nawota e doko natano, nara ma Haman, ero munu; ma natokoana ni Shushan e pinovinoi.