Read Nguna Togoa Etafe North ESTHER 4 Bible Online

ESTHER 4 - Nguna Togoa Etafe North bible

ESTHER 4

¹Go ragi waina Mordekai e atae tea mamau puti waina e pei tea mariana, Mordekai e puap̃orae sugoro aneana maga, po suni nakulukulu ni sak, e pilake natanoapu, go e dave pano paki m̃aleoputo ni natokoana, go e kua ki nakuaana warua sa go ni nasusueana warua sa:

²Go e umai po du namata‐pua ki nawota: nalakena te naata sikai waina e suni nakulukulu ni sak e mari sa sili namata‐pua ki nawota mau.

³Go doko sara navanua, sara tokora waina natip̃akiana ki nawota go natawonakiana aneana e paki asa, nasusueana warua e doko m̃aleoputo ni tea ni Yudea maga, go navaliana, go natagiana, go nalalagaarovaana; go tea laapa eu one natano eu suni nakulukulu ni sak go eu pilake natanoapu.

⁴Go tea suasua nagoroi maga ki Esther, go tea suasua atavau aneana maga eu rumai po noa ki nia asa; go nawota nagoroi e dogokitesa p̃arua: go e dip̃aki lua po dua Mordekai sugoro seara naga ega suni ra naga ega sawo lua nakulukulu ni sak m̃elu dua ki nia pano: ma Mordekai e da suasua asa mau.

⁵Go Esther e soso Hathak, tea suasua atavau maga ki nawota sikai kakada, waina nawota e pasa dawona ki nia naga ega magi Esther suasua, po pasa parati ki nia naga ega va punusi Mordekai, naga ega atae e pei nasava, go nasava e pei nalakena.

⁶Go dapala nogoe Hathak e dave pano punusi Mordekai paki tokora welewelea ni natokoana, waina e doko kivea ni namata‐pua ki nawota.

⁷Go Mordekai e noakisai a tea mamau puti waina e pakilina ki nia, go totowo ni m̃ane waina Haman e sai a naga ega vitua ki nia paki nasum̃a ni natauakiana ni naleo wia maga ki nawota, ega vei navago dip̃a tea ni Yudea maga naga euga mari sa ki da.

⁸Go e dua e tusi waina e dakiusi tusi midiriana ni natawonakiana waina eu dua ra asa Shushan, waina e naga euga mari sa ki da, naga ega visei ki Esther asa, go naga ega noap̃otae a asa; go naga ega vasa parati ki nia naga ega va punusi nawota po pavara ni a, po magi narei aneana mari natatagoana naraena.

⁹Go Hathak e umai po noa ki Esther navasaana maga ki Mordekai.

¹⁰Go Esther e pasa paki Hathak po dua e navitaua naga ega noakisai Mordekai asa, e naga:

¹¹Tea suasua maga mamau puti ki nawota, go narei maga ni navanua maga ki nawota, eu atae naga naata waina e pe umai punusi nawota roara ni nasum̃a aneana, go e pe ta pei tea sosoana mau, e pe vei naanoai kite nagoroi, ma nawotaeana sikai maau e doko raki nia, naga ega vei tea toropusiana paki namateana, ma naata waina nawota ega sai ki tiko ni kold paki nia, nae masikina ega wo mauri: ma naaleatia rualima dolu waia, kinau a da pei tea sosoana mau naga aga va punusi nawota.

¹²Go eu noa ki Mordekai navasaana maga ki Esther.

¹³Go Mordekai e noa ki da naga euga tape navasadaraana liliu paki Esther naga, P̃a ta dum̃am̃a midoaki nia mau naga nigo p̃a wo masikim̃a pei tea mautiana doko nasum̃a ki nawota, p̃arua liu naka ni Yudea mamau puti.

¹⁴Go waina ku pe vunuta ragi waia, ragi wanogoe nasilaeana go navualuaana eroga wo magi tea ni Yudea maga pakilina pae tokora p̃ota sikai, ma nimu ma tea ni nasum̃a ki tamam̃a kuga wo mamau mate puoli: go sei e atae a ku pe ta umai paki navei‐teavakilagiana raki ragi sikai dakiusi ragi waia, kite?

¹⁵Go Esther e noa ki da naga euga tape navasadaraana liliu paki Mordekai,

¹⁶e naga, P̃a vano, p̃a viragi saisai ki puti ki tea ni Yudea maga waina eu doko Shushan, go kuga maginau pali po da ganikani po da munu mau naaleatia euga tolu, aleati go p̃ogi; kinami ma tea suasua nagoroi aginau maga auga wo pali ega tapala nogoe; go aga wo sili pa punusi nawota, waina e da pae nawotaeana mau: go waina a pe mate, aga mate.

¹⁷Go Mordekai e pae napua aneana pano, po mari dapala tea mamau puti waina Esther e dip̃aki nia asa.