Read Nguna Togoa Etafe North ESTHER 5 Bible Online

ESTHER 5 - Nguna Togoa Etafe North bible

ESTHER 5

¹Go e pakilina naaleatia ketolu naga Esther e suni sugoro ni naveinawota‐ana aneana, po lawodu roara ni m̃aleoputo ni nasum̃a ki nawota, e leana dip̃a nasum̃a ki nawota: go nawota e dasake malo tasake ni navei‐nawota‐ana aneana nasum̃a ni navei‐nawota‐ana, e leana dip̃a namata‐pua ni nasum̃a.

²Go e pakilina ragi waina nawota e punusi Esther nawota nagoroi e lawodu roara ni nasum̃a, naga Esther e pap̃ai nasaup̃iaana namatana: go nawota e sai ki tiko ni kold waina e doko nam̃elearuna paki Esther. Go Esther e umai paki m̃aladigi po kisidogo namatap̃ago ni tiko wanogoe.

³Go nawota e noa ki nia, e naga, Nigo ku masau nasava Esther nawota nagoroi? Go natatagoana anigo e pei nasava? Ega wo pei tea vituakiana paki‐go, e pe vei namagovai ni namarakiana.

⁴Go Esther e naga, Waina nawota e pe midoaki nia naga e p̃ia, nawota ma Haman eroga umai naaleatia waia paki nakaniana waina a maneana mari m̃ata ki nia.

⁵Go nawota e naga, Kuga noa ki Haman naga ega mari m̃araverave naga ega vei tea mariana ega tapala waina Esther e po noa e. Go dapala nogoe nawota ma Haman ero umai paki nakaniana waina Esther e mari m̃ata ki sua e.

⁶Go ragi waina eu do munu waine, nawota e noa ki Esther, e naga, Navavaraana anigo e pei nasava? Go ega wo pei tea vituakiana paki‐go. Go natatagoana anigo e pei nasava? Ega wo pei tea mariana, e pe vei namagovai ni namarakiana.

⁷Go Esther e pasadara, po naga, Navavaraana aginau go natatagoana aginau ero pei tea waia:

⁸Waina e pe vap̃ai nasaup̃iaana namata ni nawota, go waina nawota e pe midoaki nia naga e p̃ia naga navavaraana aginau ega vei tea vituakiana paki nau, go naga ega mari pataka ni natatagoana aginau, nawota ma Haman eroga umai paki nakaniana waina aga wo madeada mari m̃ata ki nia, go matamai aga wo pasa dapala waina nawota e po noa e.

⁹Go naaleatia wanogoe Haman e dave pano, e samasama go nap̃op̃ona e laelaea: ma ragi waina Haman e punusi Mordekai namata‐pua ki nawota, naga e da duleana kite parivari naraena mau, e pura ki namaritausuana dip̃a Mordekai.

¹⁰Ma Haman e dum̃ana soki a, po paki nasum̃a aneana pano; go e dip̃aki lua po paraki tana ri maga go Seresh anagoroi euga umai punusi a.

¹¹Go Haman e noakisai ra nasamasamaana ni nasogolapaana aneana, go nalaapaana ni natuna maga, go sara naleo waina nawota e mari a e pakilagi asa, go takana waina e mari a e pakilagi liu tea maraki maga go tea suasua maga ki nawota.

¹²Go Haman e moro naga, Io, Esther nawota nagoroi e da suasua ki te naata naga ega sikoti nawota sili paki nakaniana waina e mari m̃ata ki nia mau, ma kinau aga sikigu; go e pitautau gami ma nawota naga aroga moro mamau pano matamai.

¹³Ma tea mamau puti wanogoe eu da p̃ia ki nau mau, ragi waina a ko do punusi Mordekai, naatam̃oli ni Yudea, e do natano namata‐pua ki nawota.

¹⁴Go Seresh anagoroi go tana ri maga mamau puti eu noa ki nia, eu naga, Nakau varau pakilagi sikai ega vei tea mariana, navakilagiana kakana ega vei kubit rualima lima, go matamai malip̃ogi p̃a vasa paki nawota naga Mordekai ega vei tea sarakiana asa: go p̃a sili paki nakaniana pilake nalaelaeaana nimu ma nawota. Go Haman e midoaki m̃ata ki tea wanogoe; go e noa naga euga mari nakau varau pakilagi wanogoe.