Read Nguna Togoa Etafe North ESTHER 6 Bible Online

ESTHER 6 - Nguna Togoa Etafe North bible

ESTHER 6

¹P̃ogi wanogoe nawota e mari sa maturu; go e pitip̃aki naga euga viragi umai tusi ni naleo maga waina eu pei tea mariana doko sara naaleatia, go e pei tea veveana narae ni nawota.

²Go e pei tea vap̃aiana asa naga Mordekai e noakisai nalo ni Bikthana ma Teresh, tea suasua atavau maga ki nawota waina eu pavaigoro namata, ero dua kakada, waina ero laaga naga eroga nadi ki nam̃elearuda paki nawota Ahasuerus.

³Go nawota e naga, Seve nadodomadaganiana go navakilagiana e pei tea mariana paki Mordekai nalo ni tea wanogoe? Go tea suasua maga ki nawota waina eu maneana suasua eu noa ki nia, eu naga, Te navatuna sikai e da maneana pei tea mariana mau.

⁴Go nawota e naga, Sei e doko roara ni nasum̃a? Go Haman e po umai paki roara ni etaku ni nasum̃a ki nawota naga ega vasa paki nawota naga ega sara ki Mordekai ega tau nakau varau pakilagi wanogoe waina e maneana mari m̃ata ki nia.

⁵Go tea suasua maga ki nawota eu noa ki nia, eu naga, P̃a leo, Haman e lawodu roara ni nasum̃a. Go nawota e naga, Ega sili umai.

⁶Go Haman e sili. Go nawota e noa ki nia, e naga, Nasava ega vei tea mariana paki naatam̃oli waina nawota e midoaki m̃ata ki nia naga ega dodomadagani a? Go Haman e dum̃ana noa nap̃op̃ona, Sei e doko waina nawota e midoaki m̃ata ki nia naga ega dodomadagani a p̃arua liu au?

⁷Go Haman e noa ki nawota, e naga, Nalo ni naatam̃oli waina nawota e midoaki m̃ata ki nia naga ega dodomadagani a,

⁸Sugoro ni navei‐nawota‐ana waina nawota e pea suni a, ega vei tea viragiana umai, go horse waina nawota e pea sakesaake asa, waina vauvau ni navei‐nawota‐ana e pei tea sawakiana e doko nap̃auna:

⁹Go sugoro wanogoe go horse eroga vei tea vituakiana paki nam̃elearu ni tea maraki vakilagi liu maga ki nawota sikai kakada, naga ega sugoro naatam̃oli wanogoe asa waina nawota e midoaki m̃ata ki nia naga ega dodomadagani a, go ega mari a ega sakesaake horse po pae napua ni natokoana pano, po dogorogo pea ki nia, Ega vei tea mariana ega tapala nogoe paki naatam̃oli waina nawota e midoaki m̃ata ki nia naga ega dodomadagani a.

¹⁰Go nawota e noa ki Haman, e naga, P̃a mari m̃araverave po dape sugoro wanogoe go horse, dapala waina ku po noa e, go p̃a mari ega tapala nogoe paki Mordekai, naatam̃oli ni Yudea waina e do natano namata‐pua ki nawota: tea mamau puti waina ku pasa asa, te navatuna ega ta dowo mau.

¹¹Go Haman e dape sugoro wanogoe go horse, po sugoro Mordekai po mari a e sakesaake pano pae napua ni natokoana, po dogorogo pea ki nia, Ega vei tea mariana ega tapala nogoe paki naatam̃oli waina nawota e midoaki m̃ata ki nia naga ega dodomadagani a.

¹²Go Mordekai e moro umai paki namata‐pua ki nawota. Ma Haman e mari m̃araverave po paki nasum̃a aneana pano, doko do susue go e kulutigoro nap̃auna.

¹³Go Haman e atusi paki Seresh anagoroi go tana ri maga mamau puti sara navatuna waina eu pakilina ki nia. Go naatam̃oli manumatua aneana maga go Seresh anagoroi eu noa ki nia, eu naga, Waina Mordekai, waina ku pae asa dowo, e pe vei tea ni naworawora ni Yudea sikai, go nigo ku mari sa marimatua ki nia mau, ma p̃a wo dowo naraena lomau.

¹⁴Ragi waina eu ko do pasa sikoti a, tea suasua atavau maga ki nawota eu rumai, po mari m̃araverave naga euga viragi Haman pano paki nakaniana waina Esther e mari m̃ata ki nia.