Read Nguna Togoa Etafe North ESTHER 8 Bible Online

ESTHER 8 - Nguna Togoa Etafe North bible

ESTHER 8

¹Doko naaleatia wanogoe nawota Ahasuerus e pitua ki tea ni nasum̃a ki Haman, tea kokona ki tea ni Yudea maga, paki nam̃elearu ni Esther nawota nagoroi. Go Mordekai e umai du narae ni nawota; nalakena Esther e noakisai sua naga e pei tea ni namatarau aneana.

²Go nawota e sawo lua rig aneana waina e dape liliua ki nia ki Haman, po dua Mordekai asa. Go Esther e lawo ki Mordekai e pei tea leo parati ki dap̃au tea ni nasum̃a ki Haman.

³Go Esther e moro pasa narae ni nawota, po dowo pisari natuana, po pavara ni a pilake naririmata maga naga ega mari lua namarisakiana ki Haman, naatam̃oli ni Akak, go namidodoana aneana waina e midoaki nia dip̃a tea ni Yudea maga.

⁴Go nawota e sai ki tiko ni kold paki Esther. Go Esther e duleana po lawodu narae ni nawota.

⁵Go e naga, Waina nawota e pe midoaki m̃ata ki nia, go a pe vap̃ai nasaup̃iaana namatana, go waina naleo wanogoe e pe leana namata ni nawota, go kinau a pe vei tea midoaki‐m̃atakiana namatana maga, go ega vei tea midiriana naga euga vasapiri namidiriana waina Haman natu ni Hammedatha, naatam̃oli ni Akak, e midoaki nia, waina e midiri a po noa naga euga mari sa ki puti ki naatam̃oli maga ni Yudea waina eu doko navanua maga mamau puti ki nawota:

⁶Nalakena aga wo dum̃agu soki au dapale sava waina a pe vunusi tea waina e sa e pe vakilina ki narei aginau? Kite aga wo dum̃agu soki au dapale sava waina a pe vunusi namarisakiana ki namatarau aginau?

⁷Go nawota Ahasuerus e noa ki Esther nawota nagoroi, go ki Mordekai naatam̃oli ni Yudea, e naga, Kuga leo, a po pitua ki tea ni nasum̃a ki Haman paki nam̃elearu ni Esther, go eu sara ki Haman e dau nakau varau pakilagi, nalakena e nadi ki nam̃elearuna paki tea ni Yudea maga.

⁸Go p̃a midiri tusi sikai pae nagisa ni nawota paki tea ni Yudea maga ega tapala waina p̃a midoaki m̃ata ki nia, po pulusoki a ki rig ki nawota: nalakena namidiriana waina e pei tea midiriana pae nagisa ni nawota, po pei tea vulusokiana ki rig ki nawota, te naata sikai e mari sa moro pasapiri a mau.

⁹Go ragi wanogoe eu soso saisai ki tea midiri maga ki nawota doko atelagi ketolu, waina e pei atelagi Sivan, naaleatia kerualima dua tamate dolu kakana; go e pei tea midiriana dapala tea mamau puti waina Mordekai e pitip̃aki paki tea ni Yudea maga asa, go paki satrap maga, go paki tea maramara maga go paki tea maraki maga ni navanua maga, waina eu doko India go pa pa paki Ethiopia, navanua p̃onotia sikai rualima takuna dua tamate larua, paki sara navanua pae namidiriana kakada, go paki sara narei pae masileo adeada, go paki tea ni Yudea maga pae namidiriana adeada, go pae masileo adeada.

¹⁰Go e midiri pae nagisa ni nawota Ahasuerus, po pulusoki a ki rig ki nawota, po dip̃aki lua tusi maga pano pae nam̃elearu ni tea sakesaake horse maga, eu sakesaake horse maga waina eu sava kasua, waina eu pei agi nawota, waina eu pisola ki horse maga ki nawota:

¹¹Pae tea maga wanogoe nawota e suasua ki tea ni Yudea maga waina eu doko sara natokoana, naga euga tum̃ada saisai ki da, go naga euga lawodu raki namauriana adeada, po mari sa sa ki po maripunuvunue, po mari puoli ki nakasuaana mamau ki narei maga ni navanua waina eu mari dip̃a ra, piakirikiri adeada maga, go nagoroi adeada maga, go naga euga tape pavakoto ki tea vua‐pavakotoana adeada,

¹²Doko naaleatia sikai maau, usuraki navanua maga ki nawota Ahasuerus, naaleatia kerualima sikai tamate dolu ni atelagi kerualima sikai tamate dua, waina e pei atelagi Adar.

¹³Tusi sikai waina e dakiusi tusi waina e naga natawonakiana wanogoe ega vei tea vituakiana paki sara navanua, e pei tea rogorogokiana paki narei maga mamau puti, naga tea ni Yudea maga euga mari m̃ata raki naaleatia wanogoe, naga euga tum̃ada mari nasikosikoana paki tea kokona ki da maga.

¹⁴Go tea tape tusi maga waina eu sakesaake horse sava m̃araverave maga ki nawota eu dave pano, eu mari m̃araverave nalakena natip̃akiana ki nawota; go natawonakiana e pei tea vituakiana paki natokoana ni naveinawotaana Shushan.

¹⁵Go Mordekai e dave m̃elu dua ki narae ni nawota pano, e suni sugoro ni navei‐nawota‐ana tea kesakesa go tea tare, go vauvau warua sikai ni kold, go sugoro kovagoro sikai ni linen wia tea miala‐kesakesa: go natokoana ni Shushan e darasa ki nalaelaeaana.

¹⁶Naatam̃oli maga ni Yudea eu peani namarama go nalaelaeaana, go nasamasamaana go nadodomadaganiana.

¹⁷Go doko sara navanua go sara natokoana, sara tokora waina natip̃akiana ki nawota go natawonakiana aneana e paki asa, naatam̃oli maga ni Yudea eu peani nalaelaeaana go nasamasamaana, e pei naaleatia wia sikai ni nakaniana sikai. Go tea laapa ni narei maga ni navanua eu pei tea tapala tea ni Yudea maga; nalakena namatauki‐tea‐ni Yudea‐ana e dowo ara.