Read Nguna Togoa Etafe North ESTHER 9 Bible Online

ESTHER 9 - Nguna Togoa Etafe North bible

ESTHER 9

¹Go doko atelagi kerualima sikai tamate dua waina e pei atelagi Adar, naaleatia kerualima sikai tamate dolu kakana, ragi waina e pei m̃aladigi naga natip̃akiana ki nawota go natawonakiana aneana ega vei tea mariana, doko naaleatia sikai maau wanogoe waina tea kokona maga ki tea ni Yudea maga eu leogoro naga euga maramara dap̃au ra; ma e pei tea roaana e panop̃ota, go tea ni Yudea maga eu maramara dap̃au tea maga waina eu pilosi ra;

²Tea ni Yudea maga eu dum̃ada piragi saisai ki da doko natokoana adeada maga usuraki navanua maga mamau puti ki nawota Ahasuerus, naga euga nadi ki nam̃elearuda paki tea maga waina eu laaga nasaana adeada: go te naata sikai e mari sa lawo dugoro ra mau; nalakena namatauki‐da‐ana e dowo paki narei maga mamau puti.

³Go tea maraki maga mamau puti ni navanua maga, go satrap maga, go tea maramara maga, go tea maga waina eu mari nawosiana ki nawota, eu mamau puti silae tea ni Yudea maga; nalakena namatauki‐Mordekai‐ana e dowo ara.

⁴Nalakena Mordekai e pei naatam̃oli vakilagi doko nasum̃a ki nawota, go narogorogoana kakana e pei tea rogorogokiana usuraki navanua maga mamau puti: nalakena naatam̃oli wanogoe, Mordekai, e pei naatam̃oli vakilagi sikai waina e pakilagi liu.

⁵Go tea ni Yudea eu atugi tea mamau puti waina eu pei tea kokona ki da, ki nawoka ni lova, go ki namaripunuvunueana go namarisakiana, po mari tea waina e pei namasauana adeada paki tea maga waina eu mari dip̃a ra.

⁶Go doko natokoana ni naveinawotaana Shushan, tea ni Yudea maga eu atugi po mari sa sa ki naatam̃oli p̃onotia lima.

⁷Go Parshandatha, go Dalfon, go Aspatha,

⁸Go Poratha, go Adalia, go Aridatha,

⁹Go Parmashta, go Arisai, go Aridai, go Vaisatha,

¹⁰Go eu atugi natu naanoai rualima sikai ki Haman natu ni Hammedatha, tea kokona ki tea ni Yudea maga; ma eu da nadi ki nam̃elearuda paki tea tape‐pavakotoana mau.

¹¹Naaleatia wanogoe naveveana ni tea maga waina eu pei tea maripunueana natokoana ni naveinawotaana Shushan, e pei tea rogorogokiana narae ni nawota.

¹²Go nawota e noa ki Esther nawota nagoroi, e naga, Tea ni Yudea maga eu atugi po mari sa sa ki naatam̃oli p̃onotia lima doko natokoana ni naveinawotaana Shushan, go Haman natuna naanoai maga rualima sikai; go tu da atae naga e dapale sava doko tokora p̃ota maga ki nawota! Go ragi waia nasava e pei navavaraana anigo? Go ega wo pei tea vituakiana paki‐go. Kite nasava ega moro pei natatagoana anigo? Go ega wo pei tea mariana.

¹³Go Esther e naga, Waina nawota e pe midoaki m̃ata ki nia, go ega vei tea vituakiana paki tea ni Yudea maga waina eu doko Shushan, dapala waina eu mari pataka ni natawonakiana masoso, dapala nogoe euga moro mari a matamai, go Haman natuna naanoai rualima sikai euga vei tea sarakiana dau nakau varau pakilagi.

¹⁴Go nawota e pitip̃aki asa naga ega vei tea mariana ega tapala nogoe: go natawonakiana sikai e pei tea vituakiana Shushan; go eu sara ki Haman natuna naanoai rualima sikai eu dau nakau varau pakilagi.

¹⁵Go tea ni Yudea maga waina eu doko Shushan eu moro dum̃ada piragi saisai ki da naaleatia kerualima sikai tamate pati ni atelagi Adar, po atugi naatam̃oli p̃onotia dolu Shushan; ma eu da nadi ki nam̃elearuda paki tea tape‐pavakotoana mau.

¹⁶Go tea ni Yudea p̃ota maga waina eu doko navanua maga ki nawota, eu dum̃ada piragi saisai ki da, po lawodu raki namauriana adeada, go eu peani namaromaroana pa dua ki tea kokona ki da maga, go eu atugi tea maga waina eu pilosi ra naatam̃oli tivilia larua go manu lima; ma eu da nadi ki nam̃elearuda paki tea tape‐pavakotoana mau.

¹⁷Eu mari tea wanogoe naaleatia kerualima sikai tamate dolu ni atelagi Adar; go naaleatia kerualima sikai tamate pati kakana eu maromaro, po mari a e pei naaleatia sikai ni nakaniana go nalaelaeaana.

¹⁸Ma tea ni Yudea maga waina eu doko Shushan eu dum̃ada saisai ki da naaleatia kerualima sikai tamate dolu ni atelagi wanogoe, go naaleatia kerualima sikai tamate pati; go naaleatia kerualima sikai tamate lima kakana eu maromaro, po mari a e pei naaleatia sikai ni nakaniana go nalaelaeaana.

¹⁹Nalakena tea wanogoe tea ni Yudea maga waina eu doko natokoana kiki maga go waina eu doko natokoana maga waina p̃aaka maga eu dika ara, eu mari naaleatia kerualima sikai tamate pati ni atelagi Adar e pei naaleatia sikai ni nalaelaeaana go nakaniana, naaleatia wia sikai, go tea veani‐p̃otae‐ana adeada maga eu pitua ki da dum̃ada paki da.

²⁰Go Mordekai e midiri tea maga wanogoe po dip̃aki lua tusi maga pano paki tea ni Yudea maga mamau puti waina eu doko navanua maga ki nawota Ahasuerus, tea maga waina eu doko m̃aladigi go tea maga waina eu doko uvea.

²¹E noa ki sokisoki ra asa naga sara natau euga vavaigoro naaleatia kerualima sikai tamate pati ni atelagi Adar, go naaleatia kerualima sikai tamate lima kakana,

²²Eroga vei naaleatia maga waina tea ni Yudea maga eu maromaro asa pa dua ki tea kokona ki da maga, go atelagi waina e madeada pei tea roaana pae narogokitesaana paki nalaelaeaana, go pae nasusueana paki naaleatia wia sikai: naga euga mari ra euga vei naaleatia maga ni nakaniana go nalaelaeaana, go naga euga tum̃ada pitua paki da tea veani‐p̃otae‐ana adeada maga po pitua paki tea tika.

²³Go tea ni Yudea maga eu suasua asa naga euga mari dakiusi waina eu pea atulake mari a, go dapala waina Mordekai e midiri a paki da;

²⁴Nalakena Haman natu ni Hammedatha, naatam̃oli ni Akak, tea kokona ki tea ni Yudea maga mamau puti, e midoaki p̃ai tea sa dip̃a tea ni Yudea maga naga ega mari sa ki da, go e nadi ki Pur waina e pei gole, naga euga sirinopu po pano puoli;

²⁵Ma ragi waina nawota e dogo e, e midiri po pitip̃aki naga namidoakiana sa aneana, waina e midoaki p̃otae a dip̃a tea ni Yudea maga, ega liliu paki nap̃auna; go naga nara ma natuna naanoai maga euga vei tea sarakiana dau nakau varau pakilagi.

²⁶Nalakena tea wanogoe eu soso naaleatia maga wanogoe ki Purim, e pei nagisa ni Pur. Go tea wanogoe, nalakena navasaana maga mamau puti waina eu doko tusi wanogoe, go nalakena tea waina eu punusi a nalo kakana, go tea waina e pakilina ki da,

²⁷Tea ni Yudea maga eu dawona ki nia po dum̃ada marisokisoki naga ega vei tea adeada go tea ki naworaworada, go tea ki tea maga mamau puti waina eu sikoti ra, dapala waina ega ta puoli mau naga sara natau euga vavaigoro naaleatia dua wanogoe, pataka ni namidiriana kakana, go pataka ni ragi tatutakiana kakana;

²⁸Go naga naaleatia maga wanogoe euga vei tea midoaki‐lagati‐ana po pei tea vavaigoroana usuraki sara tagona go sara namatarau, go sara navanua, go sara natokoana; go naga naaleatia maga wanogoe ni Purim euga ta pei tea toropusiana mau m̃aleoputo ni tea ni Yudea maga, kite naga namidoaki‐lagati‐ana kakana ega ta pano puoli pa dua ki naworaworada maga mau.

²⁹Go Esther nawota nagoroi, Abihail natuna nagoroi, go Mordekai naatam̃oli ni Yudea wanogoe, ero midiri tusi sikai pae navei‐nawota‐ana naga eroga lawosoki tusi kerua wanogoe nalo ni Purim.

³⁰Go e dip̃aki lua tusi maga pano paki tea ni Yudea maga mamau puti, paki navanua p̃onotia sikai rualima takuna dua tamate larua ni namarakiana ki Ahasuerus, navasaana maga ni natam̃ateana go ni nalomauana,

³¹Naga ega lawosoki naaleatia maga ni Purim, ragi tatutakiana kakada maga, dapala waina Mordekai naatam̃oli ni Yudea go Esther nawota nagoroi ero dip̃aki da asa, go dapala waina eu dum̃ada madeada go magi naworaworada pasa dawona ki nia, nalo ni navaliana maga go natagiana adeada maga.

³²Go natip̃akiana ki Esther e lawosoki naleo maga wanogoe nalo ni Purim; go e pei tea midiriana tusi wanogoe.