Read Nguna Togoa Etafe North EKSODAS 1 Bible Online

EKSODAS 1 - Nguna Togoa Etafe North bible

EKSODAS 1

¹Go tea maga waia eu pei nagisa ni Israel natuna naanoai maga, waina eu rumai paki Ityipt; sara naatam̃oli go tea ni nasum̃a adeada maga sarasara ra eu sikoti Yakob umai.

²Reuben, Simeon, Levi, go Yudah;

³Issakar, Sebulun, go Benyamin;

⁴Dan go Naftali, Cad go Asher.

⁵Go naatam̃oli mamau puti waina eu dave m̃elu dua ki naware ni Yakob eu pei naatam̃oli rualima larua: go Yosef e doko sua Ityipt.

⁶Go Yosef e mate, nara ma taina maga mamau puti, go tagona wanogoe mamau.

⁷Go Israel natuna maga eu pavakawora, po pisola p̃arua, po laapa, po pei tea kasua liu; go navanua e pura ki da.

⁸Go nawota vau sikai e pakilina dap̃au Ityipt, waina e da atae Yosef mau.

⁹Go e noa ki narei aneana, e naga, P̃a leo, narei ni Israel natuna maga eu laapa liu gida po kasua liu gida:

¹⁰Ita, tuga mari manumatua paki da; eu pe wo laapa, go e pe wo doko naga ragi waina te navakalo sikai e pe wo pakilina, nara ma eu pe wo sokari tea kokona ki gida maga, po marimari dip̃a gida, po sake m̃elu dua ki navanua pano.

¹¹Go eu lawo ki nawota maga ni nawosiana ni nasautoga dap̃au ra naga euga mari ra euga rogokitesa ki natapetapeana adeada maga. Go eu magi Faraoh davagi natokoana ni natauakiana maga, Pithom go Raamses.

¹²Ma dapala waina eu mari ra eu dogokitesa, dapala nogoe eu po laapa po peravera. Go eu mataku‐karaikita Israel natuna maga.

¹³Go naka ni Ityipt eu mari Israel natuna maga eu p̃osiwosi po mari kasua ki da:

¹⁴Go eu mari namauriana adeada e kokona nalakena nawosiana kasua, ni naruku go ni brik, go ni sara nawosiana ni vanua, sara nawosiana adeada maga, waina eu mari ra eu p̃osiwosi asa po mari kasua ki da asa.

¹⁵Go nawota ni Ityipt e pasa ki nagoroi maga ni naworawora ni Heberu, waina eu madeada pisola, waina nagisa ni tea sikai e pei Shifrah, go nagisa ni tea p̃ota sikai e pei Puah:

¹⁶Go e naga, Ragi waina ku magi nagoroi ni naworawora ni Heberu maga mari nawosiana ni tea madeada pisola, po punusi ra eu doko nakau tasake ni navisolaana: e pe vei natuna naanoai sikai kuga mari punue a; ma e pe vei natuna nagoroi sikai, ega mauri.

¹⁷Ma tea madeada pisola maga eu matau ki Sup̃e, po da mari dapala waina nawota ni Ityipt e noa ki da asa mau, ma eu mauti piakiki naanoai maga eu mauri doko.

¹⁸Go nawota ni Ityipt e soso tea madeada pisola maga, po noa ki da, e naga, Ekasana ku po mari naleo waia, po mauti piakiki naanoai maga eu mauri doko?

¹⁹Go tea madeada pisola maga eu noa ki Faraoh, eu naga, Nalakena nagoroi maga ni naworawora ni Heberu eu da dakiusi nagoroi maga ni Ityipt mau; nalakena eu mari m̃araverave, po pisola sua ragi waina tea madeada pisola e ko da umai punusi ra mau.

²⁰Go Sup̃e e mari m̃ata ki tea madeada pisola maga: go narei eu po laapa, go eu po kasua liu.

²¹Go nalakena tea madeada pisola maga eu matau ki Sup̃e, e madeada mari nasum̃a maga.

²²Go Faraoh e dip̃aki puti narei aneana, po naga, Sara natuda naanoai waina euga wo pakilina, kuga nadi ki da paki noai sara, go sara natuda nagoroi kuga mauti ra euga mauri doko.