Read Nguna Togoa Etafe North EKSODAS 10 Bible Online

EKSODAS 10 - Nguna Togoa Etafe North bible

EKSODAS 10

¹Go Yehovah e noa ki Moses, e naga, P̃a vaki ekopu punusi Faraoh: nalakena kinau a po mari nap̃op̃ona, go nap̃op̃o ni tea suasua aneana maga eu madaga, naga aga mari navaivaiana aginau maga waia m̃aleoputo kakada:

²Go naga p̃a rogorogo paki nadaliga ni natum̃a, go ni natu ni natum̃a, ki dapala waina a po mari paki naka ni Ityipt, go ki navaivaiana aginau maga waina a po mari ra m̃aleoputo kakada; naga kuga atae naga kinau a pei Yehovah.

³Go Moses go Aaron ero paki ekopu punusi Faraoh, po noa ki nia, ero naga, Yehovah, Sup̃e ki naworawora ni Heberu e noa dapala waia, e naga, P̃a wo karai naga p̃a tum̃am̃a doro ko pakitano naraegu pa pa paki seve ragi? P̃a suasua ki narei aginau naga euga vano, naga euga maginau suasua.

⁴Nalakena ku pe karai suasua ki narei aginau maga naga euga vano, p̃a leo, matamai a pe wo piragi midiri maga umai paki navanua anigo:

⁵Go euga wo pakanoe narae ni navanua, dapala te naata ega wo da mariatae punusi navanua mau: go euga wo gani tea waina e ko doko, waina e manimu pei tea toropusiana ki usa ni vatu, go euga wo gani sara nakau waina e manimu ulua pae vanua:

⁶Go nasum̃a anigo maga euga wo pura, go nasum̃a maga ki tea suasua anigo mamau puti, go nasum̃a maga ki naka ni Ityipt mamau puti; dapala waina tamamu maga go tamamu tamada maga eu da punusi a mau, pae naaleatia waina eu doko navanua pa pa paki naaleatia waia. Go e dum̃ana doa e, po dave m̃elu dua ki Faraoh pano.

⁷Go tea suasua maga ki Faraoh eu noa ki nia, eu naga, Naatam̃oli waia ega wo pei nasasa sikai paki gida pa pa paki seve ragi? P̃a suasua ki naatam̃oli maga wanogoe naga euga vano, naga euga magi Yehovah Sup̃e adeada suasua: ku ko da atae naga Ityipt e pei tea marisakiana, kite?

⁸Go Moses go Aaron ero pei tea viragiana liliu umai punusi Faraoh: go e noa ki da, e naga, Kuga vano, kuga magi Yehovah Sup̃e animu suasua: ma sei mau euga wo pano?

⁹Go Moses e naga, Auga wo pano kinami ma tea vusavusa aginami maga go tea matua aginami maga, natugami naanoai maga go natugami nagoroi maga, navata ni shiip go ni naninani aginami maga go navata ni kau aginami maga auga wo mamau puti pano; nalakena e one gami one naga auga mari nasaisaiana ki Yehovah sikai.

¹⁰Go e noa ki da, e naga, Yehovah ega sikoti mu doko, ega tapala waina aga wo suasua ki mu, go piakirikiri animu maga, naga kuga vano: koroga vunusi a; nalakena nasaana e doko narae mu.

¹¹Ega ta dapala nogoe mau: kuga vano nimu naanoai maga, po magi Yehovah suasua; nalakena tea wanogoe e pei tea waina nimu koro datago asa. Go ero pei tea kopasi‐lua‐ana dave m̃elu dua ki narae ni Faraoh pano.

¹²Go Yehovah e noa ki Moses, e naga, P̃a sai ki nam̃elearum̃a elagi ni navanua ni Ityipt raki midiri maga, naga euga sake umai paki navanua ni Ityipt, po gani sara nataputea ni navanua, tea mamau puti waina usa ni vatu e doropusi ra eu doko.

¹³Go Moses e sai ki tiko aneana elagi ni navanua ni Ityipt, go Yehovah e piragi nalagi ruatu sikai umai paki navanua naaleatia wanogoe mamau, go nap̃ogiana mamau; e po pei malip̃ogi, go nalagi ruatu e dape midiri maga umai.

¹⁴Go midiri maga eu sake pano usuraki navanua mamau ni Ityipt, po lawodu sara tokora ni Ityipt; eu madaga p̃arua sa; sala vea midiri seara waina eu dakiusi ra eu da pakilina mau, go seara waina euga wo dakiusi ra euga wo da pakilina sala edaku mau.

¹⁵Go eu pakanoe narae ni navanua mamau, dapala navanua e maligo ara; go eu gani sara nataputea ni navanua, go sara nawa ni nakau maga waina usa ni vatu e doropusi ra eu doko: go te navatuna malakesa seara ni nakau go ni nataputea ni vanua, usuraki navanua mamau ni Ityipt, e da moro doko mau.

¹⁶Go Faraoh e pioso raki Moses go Aaron m̃araverave; go e naga, A po mari naleo sa paki Yehovah Sup̃e animu, go paki mu.

¹⁷Go ragi waia koroga maginau midoakikorokoro namarinaleosaana aginau paki sikai maau waia, a pavara ni mu asa, go p̃a vavara ni Yehovah Sup̃e animu, naga ega tape lua namateana sikai maau waia kiagu.

¹⁸Go e dave m̃elu dua ki Faraoh, po pavara ni Yehovah.

¹⁹Go Yehovah e doa nalagi tokotano sikai waina e sau kasua sa, waina e dape midiri maga sake, po sui lua ra paki Natasi ni Nam̃om̃o; midiri sikai e da moro doko navanua mamau ni Ityipt mau.

²⁰Ma Yehovah e mari nap̃op̃o ni Faraoh e kasua, go e da suasua ki Israel natuna maga naga euga vano mau.

²¹Go Yehovah e noa ki Moses, e naga, P̃a sai ki nam̃elearum̃a paki nakoroatelagi, naga namaligo ega toko usuraki navanua ni Ityipt, namaligo waina ega vei tea tovidogo‐ana.

²²Go Moses e sai ki nam̃elearuna paki nakoroatelagi; go namaligo wono sikai e doko navanua mamau ni Ityipt naaleatia dolu;

²³Eu da dum̃ada punusi ra mau, go te naata e da duleana m̃elu dua ki naliana naaleatia dolu mau: ma Israel natuna maga eu mamau puti peani namarama natokoana adeada maga.

²⁴Go Faraoh e pioso paki Moses, po naga, Kuga vano, kuga magi Yehovah suasua; navata ni shiip go ni naninani animu maga go navata ni kau animu maga euga sikida doko: piakirikiri animu maga ma euga sikoti mu pano.

²⁵Go Moses e naga, Nigo p̃a wo moro pitua ki naviriana maga go ki naviriana tap̃arakiana maga paki nam̃elearugami, naga auga mari dua Yehovah Sup̃e aginami ara.

²⁶Katel aginami maga ma euga sikoti gami pano; nam̃ele sikai ega ta pei tea toropusiana doko mau; nalakena auga wo dape seara kakada naga auga magi Yehovah Sup̃e aginami suasua ara; go kinami au da atae tea waina auga wo magi Yehovah suasua asa, pa pa auga wo paki tokora wanogoe sua.

²⁷Ma Yehovah e mari nap̃op̃o ni Faraoh e kasua, go e karai suasua ki da naga euga vano.

²⁸Go Faraoh e noa ki nia, e naga, P̃a m̃elu dua kinau pano, p̃a tum̃am̃a pavaigoro ko, p̃a ta moro punusi naraegu mau; nalakena naaleatia waina p̃a wo punusi naraegu asa p̃a wo mate.

²⁹Go Moses e naga, Ku po pasa p̃ia; aga wo da moro punusi naraem̃a mau.