Read Nguna Togoa Etafe North EKSODAS 11 Bible Online

EKSODAS 11 - Nguna Togoa Etafe North bible

EKSODAS 11

¹Go Yehovah e noa ki Moses, e naga, Aga wo moro piragi naatugiana sikai maau umai paki Faraoh, go paki Ityipt; ega wo edaku suasua ki mu naga kuga vano m̃elu dua ki tokora waia pano: ragi waina ega wo suasua ki sua mu naga kuga vano, ega wo kopasi lua mu m̃elu dua ki tokora waia pano lomau.

²P̃a vasa nadaliga maga ni narei, go euga tatago, naanoai ega tatagovi naanoai ni m̃aladigi ki nia, go nagoroi ega tatagovi nagoroi ni m̃aladigi ki nia, ki naloriki maga ni silver, go ki naloriki maga ni kold.

³Go Yehovah e dua narei nasaup̃iaana namata maga ni naka ni Ityipt. Go naatam̃oli wanogoe Moses e p̃arua liu navanua ni Ityipt, namata maga ni tea suasua maga ki Faraoh, go namata maga ni narei.

⁴Go Moses e naga, Yehovah e noa dapala waia, e naga, P̃ogi matua kinau aga wo dave paki m̃aleoputo ni Ityipt pano:

⁵Go tea takalapa mamau puti ni Ityipt euga wo mate, pae tea takalapa ni Faraoh waina e doko malo tasake aneana, pa pa paki tea takalapa ni tea suasua nagoroi waina e doko nataku ni vatumaa; go tea takalapa mamau puti ni katel maga.

⁶Go nakua‐piosoana warua ega wo doko usuraki navanua mamau ni Ityipt, dapala waina e da doko sala vea mau, go waina ega wo da moro doko mau.

⁷Ma koria sikai ega wo da arom̃a ki Israel natuna maga sikai kakada mau, pae naatam̃oli pa pa paki nalo tuavati: naga kuga atae naga Yehovah e mari namawota sikai e doko namawota ni naka ni Ityipt go ni Israel.

⁸Go tea suasua anigo maga waia euga wo siwo umai punusi au, po kolo suai natano paki nau, po naga, P̃a m̃elu pano, nimu ma narei mamau waina eu dausi ko, kuga mamau: go aga wo edaku m̃elu pano. Go e dave m̃elu dua ki Faraoh e maeto p̃arua pano.

⁹Go Yehovah e noa ki Moses, e naga, Faraoh ega wo da dogo parati ki mu mau: naga tea ni namagaana aginau maga euga wo laapa navanua ni Ityipt.

¹⁰Go Moses go Aaron ero mari tea ni namagaana mamau puti wanogoe narae ni Faraoh: go Yehovah e mari nap̃op̃o ni Faraoh e kasua, go e da suasua ki Israel natuna maga naga euga vano m̃elu dua ki navanua aneana mau.