Read Nguna Togoa Etafe North EKSODAS 13 Bible Online

EKSODAS 13 - Nguna Togoa Etafe North bible

EKSODAS 13

¹Go Yehovah e pasa paki Moses po naga,

²P̃a maginau dapugoro tea takalapa mamau puti, tea maga waina eu pea pakilina m̃aleoputo ni Israel natuna maga, naatam̃oli go nalo tuavati maga: eu pei tea aginau.

³Go Moses e noa ki narei, e naga, Kuga midoa ki naaleatia waia, waina ku m̃elu dua ki Ityipt, nasum̃a ni naviti maga umai asa; nalakena Yehovah e piragi lua mu m̃elu dua ki tokora waia ki nakasuaana ni nam̃elearuna: bred waina leven e doko asa ega ta pei tea kaniana mau.

⁴Naaleatia waia nimu ku m̃elu pano asa atelagi Abib.

⁵Go ragi waina Yehovah ega wo piragi ko umai paki navanua ki naworawora ni Kanaan, go ki naworawora ni Heth, go ki naworawora ni Amor, go ki naworawora ni Hivah, go ki naworawora ni Yebus, waina e pivisa paki tamam̃a maga naga ega tua ko asa, navanua waina e sara ki milk go honi, p̃a wo mari nawosiana waia atelagi waia.

⁶Naaleatia larua p̃a kani bred waina leven e dika asa, go naaleatia kelarua nasaisaiana sikai ki Yehovah ega toko asa.

⁷Bred waina leven e dika asa ega vei tea kaniana naaleatia larua wanogoe; go bred waina leven e doko asa ega ta pei tea vunusiana veaniana anigo mau, go leven ega ta pei tea vunusiana veaniana anigo, navanua mamau anigo mau.

⁸Go p̃a wo noakisai natum̃a naaleatia wanogoe, po naga, Nalakena tea waina Yehovah e maginau mari a ragi waina a m̃elu dua ki Ityipt umai.

⁹Go ega wo manigo pei navaivaiana sikai doko nam̃elearum̃a, go namidoakiana sikai namawota ni namatam̃a, naga nawotaeana ki Yehovah ega toko nawokam̃a: nalakena Yehovah e po piragi lua ko nam̃elearu kasua sikai m̃elu dua ki Ityipt umai.

¹⁰Nalakena tea wanogoe p̃a vavaigoro natawonakiana waia ragi kakana sara natau.

¹¹Go ega wo doko ragi waina Yehovah ega wo piragi ko paki navanua ki naworawora ni Kanaan, dakiusi waina e pivisa paki‐go go paki tamam̃a maga, go ragi waina ega wo dua ko asa,

¹²Naga p̃a magi Yehovah doropusi tea mamau puti waina eu pea pakilina, go tea vea mamau puti ni nalo tuavati waina ku peani ra; tea anoai maga kakada euga vei tea ki Yehovah.

¹³Go tea vea mamau puti ni ass p̃a taulua ra ki shiip natuna sikai; go ku pe ta daulua e mau, p̃a marip̃ori nanoana: go p̃a taulua tea takalapa mamau puti ni naatam̃oli m̃aleoputo ni natum̃a naanoai maga.

¹⁴Go ega wo doko ragi waina natum̃a naanoai ega wo pusuusu paki‐go ragi edaku, po naga, Tea waia e pei nasava? Naga p̃a noa ki nia, p̃a naga, Yehovah e piragi lua gida ki nakasuaana ni nam̃elearuna tu m̃elu dua ki Ityipt, nasum̃a ni naviti maga umai:

¹⁵Go e pakilina, ragi waina Faraoh e mari nap̃op̃ona kasua naga ega ta suasua ki gida naga tuga vano mau, naga Yehovah e mari punue tea takalapa mamau puti ni navanua ni Ityipt, tea takalapa ni naatam̃oli, go tea takalapa ni nalo tuavati maga: nalakena tea wanogoe kinau a do mari tea mamau puti waina eu pea pakilina, waina eu pei tea anoai, eu pei naviriana paki Yehovah; ma tea takalapa mamau puti ni natugu naanoai maga a do daulua ra.

¹⁶Go ega wo pei navaivaiana sikai doko nam̃elearum̃a, go tea tokorae maga namawota ni namatam̃a: nalakena Yehovah e piragi lua gida ki nakasuaana ni nam̃elearuna tu m̃elu dua ki Ityipt umai.

¹⁷Go e pakilina, ragi waina Faraoh e suasua ki narei naga euga vano, naga Sup̃e e da maraki ra pae napua ni navanua ki Filistine maga mau, nalakena nae e pei m̃aladigi; nalakena Sup̃e e naga, Mase narei eu pe midoakidoa ragi waina eu pe vunusi navakalo, go eu pe liliu paki Ityipt pano:

¹⁸Ma Sup̃e e maraki doa narei pae napua ni masop̃alo pae Natasi ni Nam̃om̃o: go Israel natuna maga eu puati nalikau sake pano m̃elu dua ki navanua ni Ityipt.

¹⁹Go Moses e dape navatu maga ni Yosef eu sikoti a pano: nalakena e mari Israel natuna maga eu pivisa kasua, e naga, Sup̃e ega wo umai punusi mu lomau; go kuga tape navatugu maga euga sake sikoti mu m̃elu dua ki tokora waia pano.

²⁰Go eu dakai po surata pae Sukkoth pano, po m̃enaki Etham, nadigi ni masop̃alo.

²¹Go Yehovah e pea ki da pano aleati e doko napopouru lawodu, naga ega maraki ra napua; go p̃ogi e doko nakapu lawodu, naga ega maramalagati ra; naga euga surata aleati go p̃ogi:

²²Napopouru lawodu aleati, go nakapu lawodu p̃ogi, ero da m̃elu dua ki narae ni narei pano mau.