Read Nguna Togoa Etafe North EKSODAS 14 Bible Online

EKSODAS 14 - Nguna Togoa Etafe North bible

EKSODAS 14

¹Go Yehovah e pasa paki Moses, po naga,

²P̃a vasa paki Israel natuna maga, naga euga liliu po m̃enaki narae ni Pi‐hahiroth, namawota ni Mikdol go ni natasi, narae ni Baal sefon: kuga m̃enaki doko p̃ai a m̃aladigi ki natasi.

³Go Faraoh ega wo noa nalo ni Israel natuna maga, ega wo naga, Nara eu sasap̃o navanua, masop̃alo e po kokoro ra.

⁴Go aga wo mari nap̃op̃o ni Faraoh ega wo kasua, go ega wo dausi ra; go aga wo pei tea dodomadaganiana nalo ni Faraoh, go nalo ni taua mamau ni naatam̃oli navakalo aneana maga; go naka ni Ityipt euga wo atae naga kinau a pei Yehovah. Go eu mari dapala nogoe.

⁵Go e pei tea noasaiana paki nawota ni Ityipt naga narei eu sava pano: go nap̃op̃o ni Faraoh go ni tea suasua aneana maga eu po panop̃ota paki narei, go eu naga, Nasa sei tu po mari a, waina tu po suasua ki Israel naga euga vano naga euga ta manigida suasua mau?

⁶Go e likoti kariot aneana, po piragi narei aneana eu sikoti a pano:

⁷Go e piragi kariot matadoaana p̃onotia latesa, go kariot mamau puti ni Ityipt, go m̃aau maga eu doko puti ara.

⁸Go Yehovah e mari nap̃op̃o ni Faraoh nawota ni Ityipt e kasua, go e sava dausi Israel natuna maga: go Israel natuna maga eu m̃elu pano ki m̃elearu sikeana sikai.

⁹Go naka ni Ityipt eu sava dausi ra, horse ni kariot ki Faraoh mamau puti, go naatam̃oli ni horse aneana maga, go taua ni naatam̃oli navakalo aneana maga, po pa parati ki da eu m̃enaki m̃aladigi ki natasi, doko pisari Pi‐hahiroth, narae ni Baal sefon.

¹⁰Go Faraoh e umai paki m̃aladigi, go Israel natuna maga eu sike namatada, go p̃a leo, naka ni Ityipt eu surata dausi ra; go eu mataku p̃arua: go Israel natuna maga eu pioso paki Yehovah.

¹¹Go eu noa ki Moses, eu naga, Matigo seara eu da doko Ityipt, waina e pei nalakena ku po piragi lua gami naga auga mate masop̃alo kite? Nasa sei ku po mari a paki gami, waina ku po piragi lua gami m̃elu dua ki Ityipt?

¹²Tea waia e da pei navasaana waina au noa ki‐go asa Ityipt kite? Au naga, P̃a toropusi gami auga toko naga auga magi naka ni Ityipt suasua. Nalakena e p̃ia ki gami naga auga magi naka ni Ityipt suasua, ma e sa ki gami naga auga mate masop̃alo.

¹³Go Moses e noa ki narei, e naga, Kuga ta mataku mau, kuga tu dorogo, po punusi namautiana ki Yehovah, waina ega wo manimu mari a masoso: nalakena naka ni Ityipt waina ku po punusi ra masoso, kuga wo da moro punusi ra mau pa pa ega tu du po du mau du.

¹⁴Yehovah ega wo manimu marimari, go nimu kuga vunuta.

¹⁵Go Yehovah e noa ki Moses, e naga, Ekasana ku pioso paki nau? P̃a vasa paki Israel natuna maga, naga euga surata pano.

¹⁶Go nigo, p̃a sike tiko anigo, po sai ki nam̃elearum̃a elagi ni natasi, po dap̃otae a: go Israel natuna maga euga wo paki m̃aleoputo ni natasi natano garagara.

¹⁷Go kinau, p̃a leo, aga wo mari nap̃op̃o ni naka ni Ityipt euga wo kasua, go euga wo dausi ra pano: go aga wo pei tea dodomadaganiana nalo ni Faraoh, go nalo ni taua mamau ni naatam̃oli navakalo aneana maga, kariot aneana maga, go naatam̃oli ni horse aneana maga.

¹⁸Go naka ni Ityipt euga wo atae naga kinau a pei Yehovah, ragi waina aga wo pei tea dodomadaganiana Faraoh, kariot aneana maga, go naatam̃oli ni horse aneana maga.

¹⁹Go agelo ki Sup̃e, waina e pea ki taua ni Israel, e m̃elu pano po edakugoro ra; go napopouru lawodu e m̃elu dua ki naraeda pano, po lawodu natakuda:

²⁰Go e umai paki namawota ni taua ni Ityipt go ni taua ni Israel; go napopouru go namaligo ero doko, ma e pitua ki namarama p̃ogi: go sikai e da umai paki m̃aladigi ki sikai nap̃ogiana wanogoe mamau mau.

²¹Go Moses e sai ki nam̃elearuna elagi ni natasi; go Yehovah e mari natasi e pano ki nalagi ruatu kasua sikai nap̃ogiana wanogoe mamau, po mari natasi e pei natano garagara, go noai maga eu pei tea tap̃otaeana.

²²Go Israel natuna maga eu paki m̃aleoputo ni natasi natano garagara: go noai maga eu madeada pei nakoro sikai taleva ni matua kakada go taleva ni mawiri kakada.

²³Go naka ni Ityipt eu sava dausi ra, po edakugoro ra paki m̃aleoputo ni natasi pano, horse mamau puti ki Faraoh, kariot aneana maga, go naatam̃oli ni horse aneana maga.

²⁴Go e pakilina ragi ni navavaigoroana ni malip̃ogi, naga Yehovah e leoduru dave nakapu go napopouru lawodu punusi taua ni naka ni Ityipt, po kopasi taua ni naka ni Ityipt.

²⁵Go e dape lua tea taliepu ni kariot adeada maga, go eu mari ra eu pano kite sa go naka ni Ityipt eu naga, Tuga sava dua ki narae ni Israel pano; nalakena Yehovah e madeada marimari dip̃a naka ni Ityipt.

²⁶Go Yehovah e noa ki Moses, e naga, P̃a sai ki nam̃elearum̃a elagi ni natasi, naga noai maga euga liliu paki naka ni Ityipt, paki kariot adeada maga, go paki naatam̃oli ni horse adeada maga.

²⁷Go Moses e sai ki nam̃elearuna elagi ni natasi, go natasi e liliu paki namuaana tuai kakana malip̃ogi; go naka ni Ityipt eu sava sua e; go Yehovah e paruvaru lua naka ni Ityipt m̃aleoputo ni natasi.

²⁸Go noai maga eu liliu, po dap̃augoro kariot maga, go naatam̃oli ni horse maga, go taua mamau ni naatam̃oli navakalo maga ki Faraoh waina eu dausi ra paki natasi pano; sikai maau kakada e da doko mau.

²⁹Ma Israel natuna maga eu surata natano garagara m̃aleoputo ni natasi; go noai maga eu madeada pei nakoro sikai taleva ni matua kakada go taleva ni mawiri kakada.

³⁰Go Yehovah e mauti Israel m̃elu dua ki nam̃elearu ni naka ni Ityipt naaleatia wanogoe; go Israel e punusi naka ni Ityipt eu mate one nadigi ni natasi.

³¹Go Israel e punusi nawosiana warua wanogoe waina Yehovah e mari a paki naka ni Ityipt, go narei eu matau ki Yehovah: go eu saralomau Yehovah, go tea suasua aneana Moses.