Read Nguna Togoa Etafe North EKSODAS 16 Bible Online

EKSODAS 16 - Nguna Togoa Etafe North bible

EKSODAS 16

¹Go eu surata m̃elu dua ki Elim pano, go navata mamau ni Israel natuna maga eu rumai paki masop̃alo ni Sin, waina e doko namawota ni Elim go ni Sinai, naaleatia kerualima sikai tamate kelima ni atelagi kerua edaku ki nam̃elu‐dua‐ki‐navanua‐ni Ityipt‐ana adeada.

²Go navata mamau ni Israel natuna maga eu daururu dip̃a Moses go Aaron masop̃alo:

³Go Israel natuna maga eu noa ki da, eu naga, Ko, au pe mate ki nam̃elearu ni Yehovah navanua ni Ityipt e pe wia, ragi waina au doko pisari pot ni nap̃okasi maga, ragi waina au gani navinaga pa pa au puka; nalakena koro po piragi lua gami umai paki masop̃alo waia, naga koroga mari punue puti nasaisaiana mamau waia ki navitoloana.

⁴Go Yehovah e noa ki Moses, e naga, P̃a leo, aga wo manimu mari navinaga ega wo p̃owo pae nakoroatelagi umai; go narei euga tave pano po pila daua ki tea ni naaleatia sikai sara naaleatia, naga aga maridogo ra, euga wo surata pae nawotaeana aginau, kite e pe tika.

⁵Go ega wo pakilina naaleatia kelatesa, naga euga mari m̃ata ki tea waina eu po dape a umai asa, go ega vaka rua pataka ni tea waina eu pila daua ki nia sara naaleatia.

⁶Go Moses go Aaron ero noa ki Israel natuna mamau puti, ero naga, Ragi melu, kuga wo atae asa naga Yehovah e po piragi lua mu m̃elu dua ki navanua ni Ityipt umai:

⁷Go malip̃ogi, kuga wo punusi nasamasamaana ki Yehovah asa; nalakena e dogo nataururuana animu maga dip̃a Yehovah: go kinami aro pei nasava, naga ku daururu dip̃a gami?

⁸Go Moses e naga, Ega wo dapala nogoe, ragi waina Yehovah ega wo dua mu nap̃okasi ragi melu naga kuga kani a, go navinaga malip̃ogi pa pa kuga wo puka; nalakena Yehovah e dogo nataururuana animu maga waina nimu ku do daururu dip̃a e asa: go kinami aro pei nasava? Nataururuana animu maga eu da dip̃a gami mau, ma eu dip̃a Yehovah.

⁹Go Moses e noa ki Aaron, e naga, P̃a noa ki navata mamau ni Israel natuna maga, p̃a naga, Kuga umai paki m̃aladigi ki narae ni Yehovah: nalakena e po dogo nataururuana animu maga.

¹⁰Go e pakilina, ragi waina Aaron e do pasa paki navata mamau ni Israel natuna maga, naga eu leo daki paki masop̃alo, go p̃a leo, nasamasamaana ki Yehovah e pakilina napopouru.

¹¹Go Yehovah e pasa paki Moses, po naga,

¹²A po dogo nataururuana maga ki Israel natuna maga: p̃a vasa paki da, po naga, Ragi melu kuga wo gani nap̃okasi, go malip̃ogi kuga wo puka ki navinaga; go kuga wo atae naga kinau a pei Yehovah Sup̃e animu.

¹³Go e pakilina ragi melu, naga kuel maga eu sake umai, po dap̃augoro tokora ni nam̃enakiana: go malip̃ogi nasovaki e one dalivirigoro tokora ni nam̃enakiana.

¹⁴Go ragi waina nasovaki waina e one e sake pano, p̃a leo, naleo kiki malaveave e one narae ni masop̃alo, e kiki dakiusi frost tare waina e one natano.

¹⁵Go ragi waina Israel natuna maga eu punusi a, eu dum̃ada noa ki da, eu naga, E pei nasava? Nalakena e pei tea waina eu da atae a mau. Go Moses e noa ki da, e naga, E pei navinaga waina Yehovah e po dua mu asa naga kuga kani a.

¹⁶Tea waia e pei naleo waina Yehovah e po dip̃aki nia, e naga, Kuga vila daua ki seara kakana, sara naatam̃oli euga vila daua ki tea waina e pataka ni nakaniana adeada; kuga tape omer sikai agi naatam̃oli sikai ega sarasara naatam̃oli animu maga, sara naatam̃oli euga magi tea maga waina eu doko tap̃aup̃au adeada dape a.

¹⁷Go Israel natuna maga eu mari dapala nogoe, po pila daua ki, seara eu pila daua ki tea warua, go seara eu pila daua ki tea kiki.

¹⁸Go ragi waina eu dowogi a ki omer sikai, tea waina e pila daua ki tea warua e dika tea tupele, go tea waina e pila daua ki tea kiki e da dika mau; sara naatam̃oli eu pila daua ki tea waina e pataka ni nakaniana adeada.

¹⁹Go Moses e noa ki da, e naga, Te naata ega ta doropusi seara kakana ega ta doko pa pa paki malip̃ogi mau.

²⁰Ma eu da dogo parati ki Moses mau; ma naatam̃oli seara eu doropusi seara kakana e doko pa pa paki malip̃ogi, go e dape ula maga, po p̃oa: go Moses e maeto ki da.

²¹Go eu pila daua ki nia sara malip̃ogi, sara naatam̃oli eu pila daua ki tea waina e pataka ni nakaniana adeada: go ragi waina elo e po suisui, e sara.

²²Go e pakilina, naga naaleatia kelatesa eu pila daua ki navinaga waina e paka rua patakana, omer eduarua agi naatam̃oli sikasikai, go tea maraki mamau puti ni navata naatam̃oli eu rumai po noakisai Moses asa.

²³Go e noa ki da, e naga, Tea waia e pei tea waina Yehovah e po noa e, e naga, Matamai e pei naaleatia ni namaromaroana warua, sabbath tapu sikai ki Yehovah: tea waina kuga wo daoni a kuga taoni a, go tea waina kuga wo peni a ki noai kuga veni a ki noai; go tea mamau puti waina e dupele kuga manimu doropusi a naga ega vei tea mautiana pa pa paki malip̃ogi.

²⁴Go eu doropusi a e doko pa pa paki malip̃ogi, dakiusi waina Moses e pitip̃aki: go e da p̃oa mau, go ula seara e da doko asa mau.

²⁵Go Moses e naga, Kuga kani a masoso; nalakena masoso e pei sabbath sikai ki Yehovah: masoso kuga wo da pap̃ai a namalasi mau.

²⁶Naaleatia latesa kuga vila daua ki nia; ma naaleatia kelarua e pei sabbath, ega wo dika asa.

²⁷Go e pakilina naaleatia kelarua, naga naatam̃oli seara eu dave pano naga euga vila daua ki nia, go eu da pap̃ai seara mau.

²⁸Go Yehovah e noa ki Moses, e naga, Kuga karai pa pa paki seve ragi naga kuga vavaigoro natip̃akiana aginau maga go nawotaeana aginau maga?

²⁹Kuga vunusi, nalakena Yehovah e dua mu sabbath, nalakena tea wanogoe nae e do dua mu naaleatia kelatesa navinaga ni naaleatia dua; kuga toko naliamu doko, te naata sikai ega ta m̃elu dua ki tokora aneana pano naaleatia kelarua mau.

³⁰Go narei eu maromaro naaleatia kelarua.

³¹Go nasum̃a ni Israel eu soso nagisana ki Manna: go e dakiusi napati ni koriander, e dare; go nakatidogoana kakana e dakiusi keke waina honi e doko asa.

³²Go Moses e naga, Tea waia e pei naleo waina Yehovah e po dip̃aki nia, e naga, Navakavuroana ni omer sikai kakana ega magi tagona animu maga pei tea vavaigoroana; naga euga vunusi navinaga waina a pakale mu asa masop̃alo, ragi waina a piragi lua mu m̃elu dua ki navanua ni Ityipt umai.

³³Go Moses e noa ki Aaron, e naga, P̃a tape lasa sikai, po doropusi navakavuroana ni omer sikai ni manna asa, po doropusi a narae ni Yehovah, naga ega magi tagona animu maga pei tea vavaigoroana.

³⁴Dakiusi waina Yehovah e dip̃aki Moses asa, dapala nogoe Aaron e doropusi a narae ni Nanoasokisokiana, naga ega vei tea vavaigoroana.

³⁵Go Israel natuna maga eu gani manna natau rualima pati, pa pa eu rumai paki navanua ni natokoana; eu gani manna, pa pa eu rumai paki namatap̃ago ni navanua ni Kanaan.

³⁶Go omer sikai e pei namagovai kerualima ni efah sikai.