Read Nguna Togoa Etafe North EKSODAS 18 Bible Online

EKSODAS 18 - Nguna Togoa Etafe North bible

EKSODAS 18

¹Go Yethro, tea viri ni Midian, Moses m̃ona, e dogo tea mamau puti waina Sup̃e e magi Moses, go waina e magi Israel narei aneana mari a, naga Yehovah e piragi lua Israel m̃elu dua ki Ityipt umai.

²Go Yethro, Moses m̃ona, e piragi Sipporah umai, Moses anagoroi, edaku ki e dip̃aki lua e, nara ma natuna naanoai dua;

³Waina nagisa ni sikai e pei Cershom; nalakena e naga, A po pei nam̃enaki‐atatoko sikai navanua p̃ota:

⁴Go nagisa ni kerua e pei Elieser; nalakena e naga, Sup̃e ki mama e silae au, po pualua au pa dua ki lova ki Faraoh:

⁵Go Yethro, Moses m̃ona, e umai nara ma natuna naanoai dua go anagoroi eu mamau umai punusi Moses masop̃alo tokora waina nae e m̃enaki asa, tava ki Sup̃e:

⁶Go e noa ki Moses, e naga, Kinau m̃om̃a Yethro a po umai punusi ko, kinami ma am̃agoroi, go natuna naanoai dua ero sikoti a umai.

⁷Go Moses e dave pano naga ega sua m̃ona, go e kolo suai natano, po dum̃ili a; go ero dum̃ada pusuusu paki da ki nawiaana adeada; go eu rumai paki ekopu ni tap̃aup̃au.

⁸Go Moses e dogorogo paki m̃ona ki tea mamau puti waina Yehovah e mari a paki Faraoh go paki naka ni Ityipt nalakena Israel, namawosaana mamau puti waina e pakilina ki da napua, go naga Yehovah e pualua ra.

⁹Go Yethro e laelaea nalakena nawiaana mamau puti waina Yehovah e mari a paki Israel, waina e pualua ra m̃elu dua ki nam̃elearu ni naka ni Ityipt.

¹⁰Go Yethro e naga, Yehovah ega vei tea vasam̃atakiana, waina e po pualua mu m̃elu dua ki nam̃elearu ni naka ni Ityipt, go ki nam̃elearu ni Faraoh; waina e po pualua narei m̃elu dua ki etano ni nam̃elearu ni naka ni Ityipt.

¹¹Ragi waia a atae naga Yehovah e p̃arua liu sup̃e mamau puti: nalakena naleo waina eu mari madaga paki da asa nae e dap̃au ra.

¹²Go Yethro, Moses m̃ona, e magi Sup̃e dape naviriana tap̃arakiana sikai go naviriana p̃ota maga: go Aaron e umai, nara ma tea matua mamau puti ni Israel, naga euga kani navinaga sikoti Moses m̃ona narae ni Sup̃e.

¹³Go matamai ki nia, Moses e doko naga ega vasap̃otae narei: go narei eu lawodu pisari Moses pae malip̃ogi pa pa paki ragi melu.

¹⁴Go Moses m̃ona e punusi tea mamau puti waina nae e do mari a paki narei, go e naga, Naleo waia waina nigo ku do mari a paki narei e pei nasava? Ekasana nigo ku masikim̃a doko, go narei mamau eu lawodu pisari ko pae malip̃ogi pa pa paki ragi m̃elu?

¹⁵Go Moses e noa ki m̃ona, e naga, Nalakena narei eu rumai punusi au naga euga vusuusu paki Sup̃e:

¹⁶Ragi waina eu peani naleo sikai, eu rumai punusi au; go a pasap̃otae namawota ni naatam̃oli sikai go ni tana ri, go a mari ra eu atae natawonakiana maga ki Sup̃e, go nawotaeana aneana maga.

¹⁷Go Moses m̃ona e noa ki nia, e naga, Naleo waina nigo ku do mari a e da p̃ia mau.

¹⁸P̃a wo pamate lomau, nimu ma narei waia waina eu sikoti ko doko; nalakena naleo waia e madaga ki‐go; ku mari sa masikim̃a mari a.

¹⁹Ragi waia p̃a rogo parati ki nadaleogu, aga vusum̃aki paki‐go, go Sup̃e ega sikoti ko doko: nigo p̃a magi narei doko namawota kakada ma Sup̃e, go nigo p̃a viragi naleo maga umai punusi Sup̃e;

²⁰Go p̃a vasa pisei ki da natawonakiana maga go nawotaeana maga, po mari ra euga atae napua waina euga surata asa, go nawosiana waina euga mari a.

²¹Go nigo p̃a matadoa m̃elu dua ki narei mamau naatam̃oli maga ni namarimatuaana, waina eu matau ki Sup̃e, naatam̃oli maga ni nalomauana, waina eu pilosi natapepavakotoana; go p̃a lawo ki da dap̃au ra, naga euga vei tea maraki manu maga, tea maraki p̃onotia maga, tea maraki rualima lima maga, go tea maraki rualima sikai maga:

²²Go euga vasap̃otae narei sara ragi: go ega wo dapala waia, sara naleo warua euga wo piragi a umai punusi ko, ma sara naleo kiki euga wo dum̃ada pasap̃otae a: p̃a mari a ega manainai ki‐go ega tapala nogoe, go euga tapetape sikoti ko.

²³Ku pe mari naleo wanogoe, go Sup̃e e pe tip̃aki‐go asa, ku pe wo mariatae du, go narei mamau waia eu pe wo paki tokora adeada natam̃ateana.

²⁴Go Moses e dogo parati ki nadaleo ni m̃ona, po mari tea mamau puti waina e noa e.

²⁵Go Moses e matadoa naatam̃oli maga ni namarimatuaana m̃elu dua ki Israel mamau, po mari ra eu pei nap̃au ni narei, tea maraki manu maga, tea maraki p̃onotia maga, tea maraki rualima lima maga, go tea maraki rualima sikai maga.

²⁶Go eu pasap̃otae narei sara ragi: naleo kasua maga eu piragi a umai punusi Moses, ma sara naleo kiki eu dum̃ada pasap̃otae a.

²⁷Go Moses e suasua ki m̃ona naga ega vano; go e paki navanua aneana pano.