Read Nguna Togoa Etafe North EKSODAS 2 Bible Online

EKSODAS 2 - Nguna Togoa Etafe North bible

EKSODAS 2

¹Go naatam̃oli sikai ni nasum̃a ni Levi e pano, po piragi nagoroi sikai waina e pei Levi natuna nagoroi sikai.

²Go nagoroi wanogoe e diena, po dape natuna naanoai sikai: go ragi waina e punusi a naga e pei piakiki wia, e dasuru ki nia atelagi dolu.

³Go ragi waina e mari sa moro dasuru ki nia, e maneana dape areka ni papuro sikai, po puluti a ki bitumen go ki napulu; go e doropusi piakiki wanogoe asa, po doropusi a m̃aleoputo ni suf ni nadigi ni noai sara.

⁴Go gorena e lawodu uvea, naga ega atae tea waina ega wo pakilina ki nia.

⁵Go Faraoh natuna nagoroi e siwo umai naga ega loloso noai sara; go nagoroi atara aneana maga eu surata pae nadigi ni noai sara; go e punusi areka wanogoe e doko m̃aleoputo ni suf, go e dip̃aki lua nagoroi suasua aneana naga ega tape a umai.

⁶Go e lagai a, po punusi piakiki wanogoe: go p̃a leo, piakiki naanoai sikai e do kai. Go e dodomi a, po naga, Tea waia e pei sikai kaka ni piakiki maga ni naworawora ni Heberu.

⁷Go gorena e noa ki Faraoh natuna nagoroi, e naga, Aga va manigo soso nagoroi vakasusu sikai ni nagoroi maga ni naworawora ni Heberu, naga ega manigo pakasusu ki piakiki waia, kite?

⁸Go Faraoh natuna nagoroi e noa ki nia, e naga, P̃a vano. Go naatara wanogoe e pano po soso piakiki wanogoe p̃ilana.

⁹Go Faraoh natuna nagoroi e noa ki nia, e naga, P̃a tape lua piakiki waia, po maginau pakasusu ki nia, go kinau aga wo dua ko namoriana anigo. Go nagoroi wanogoe e dape piakiki wanogoe, po pakasusu ki nia.

¹⁰Go piakiki wanogoe e atum̃aki, go e piragi a umai punusi Faraoh natuna nagoroi, go e po pei natuna. Go e soso nagisana ki Moses, po naga, Nalakena a puati lua e m̃elu dua ki noai.

¹¹Go e pakilina te ragi ni naaleatia maga wanogoe, ragi waina Moses e p̃arua sua, naga e dave pano punusi taina maga, po leo punusi natapetapeana adeada maga: go e punusi naatam̃oli sikai ni Ityipt e atugi naatam̃oli sikai ni naworawora ni Heberu, tea sikai kaka ni taina maga.

¹²Go e leo piliali, go e punusi naga naatam̃oli p̃ota e dika, go e atugi naatam̃oli ni Ityipt wanogoe, po dasuru ki nia naworaone.

¹³Go e dave pano naaleatia kerua, go p̃a leo, naatam̃oli dua ni naworawora ni Heberu ero dum̃ada mari ra: go e noa ki tea marisaki, e naga, Ekasana ku atu tam̃a ri?

¹⁴Go e noa ki nia, e naga, Sei e mari ko ku pei tea maraki go tea vasap̃otae dap̃au gami? Ku midoa ki nia naga p̃a mari punue au, dakiusi waina ku mari punue naatam̃oli ni Ityipt, kite? Go Moses e mataku, po naga, Naleo wanogoe e pei tea ataeana lomau.

¹⁵Go Faraoh e dogo naleo wanogoe, po laaga naga ega mari punue Moses. Go Moses e sava dua ki narae ni Faraoh pano, po doko navanua ni Midian doko: go e do natano pisari m̃oru noai sikai.

¹⁶Go tea viri ni Midian e peani natuna nagoroi larua; go eu rumai po pautu noai, po pakavuro siloa maga naga euga tua navata ni shiip go ni naninani ki tamada euga munu.

¹⁷Go tea leo‐parati‐ki maga eu rumai po kopasi lua ra: ma Moses e duleana po silae ra, po dua navata ni shiip go ni naninani adeada eu munu.

¹⁸Go eu rumai punusi tamada Reuel, go e naga, Ekasana ku po umai m̃araverave masoso?

¹⁹Go eu naga, Naatam̃oli ni Ityipt sikai e pualua gami m̃elu dua ki nam̃elearu ni tea leo‐parati‐ki maga, go e maginami pautu noai, po dua navata ni shiip go ni naninani eu munu.

²⁰Go e noa ki natuna nagoroi maga, e naga, Go nae wai? Ekasana ku doropusi naatam̃oli wanogoe e madoko? Kuga soso e, naga ega kani navinaga.

²¹Go Moses e suasua naga ega toko sikoti naatam̃oli wanogoe doko: go e dua Moses natuna nagoroi Sipporah.

²²Go e dape natuna naanoai sikai, go tamana e soso nagisana ki Kershom: nalakena e naga, A po pei nam̃enaki‐atatoko sikai navanua p̃ota.

²³Go e pakilina te ragi ni naaleatia laapa wanogoe, naga nawota ni Ityipt e mate: go Israel natuna maga eu marousu nalakena nawosiana, go eu kua pioso, go nakuapioso‐ana adeada e sake umai paki Sup̃e nalakena nawosiana.

²⁴Go Sup̃e e dogo nagigiana adeada, go Sup̃e e midoa ki navasasokiana aneana paki Abraham, paki Isaak, go paki Yakob.

²⁵Go Sup̃e e punusi Israel natuna maga, go Sup̃e e dodomi atae ra.