Read Nguna Togoa Etafe North EKSODAS 21 Bible Online

EKSODAS 21 - Nguna Togoa Etafe North bible

EKSODAS 21

¹Go tea maga waia eu pei navasap̃otaeana maga waina p̃a wo lawo ki da naraeda.

²Ragi waina ku pakotovi tea suasua Heberu sikai, ega suasua natau latesa: go natau kelarua ega m̃elu pano pei tea veresi‐m̃oli‐ki‐ana.

³E pe sikina umai, ega sikina m̃elu pano: e pe veani nagoroi sikai, nagoroi aneana ega m̃elu sikoti a pano.

⁴Nawota aneana e pe tua e nagoroi sikai, go e pe maneana dape natuna naanoai maga kite natuna nagoroi maga; nagoroi wanogoe go natuna maga euga vei tea ki nawota aneana, go nae ega sikina m̃elu pano.

⁵Ma tea suasua wanogoe e pe naga, A dodomi nawota aginau, go nagoroi aginau, go natugu maga; aga ta m̃elu pano pei tea veresiana mau:

⁶Go nawota aneana ega viragi a umai punusi tea vasap̃otae maga, po piragi a paki namata, kite paki nakautu ni namata; go nawota aneana ega turisai nadaligana ki tea turisai sikai; go ega maneana suasua ega tu du po du mau du.

⁷Go ragi waina naatam̃oli sikai e sori natuna nagoroi naga ega vei tea suasua, ega ta m̃elu pano mau dakiusi waina tea suasua naanoai maga eu m̃elu pano.

⁸E pe sa namata ni nawota aneana, waina e dum̃ana maneana pasasoki a, ega mari naga ega vei tea tauluaana: ega ta peani naveinawotaana mau naga ega sori a paki nalauna p̃ota pilake namarimalauwelukiana aneana paki nia.

⁹Go e pe magi natuna naanoai pasasoki a, ega mari paki nia ega tapala waina eu mari paki natuda nagoroi maga.

¹⁰E pe tum̃ana maneana piragi tea p̃ota sikai; navinaga aneana, go tea suniana aneana, go tea waina e peani a nalakena e pei anagoroi, ega ta tape lua seara kakana mau.

¹¹Go e pe ta mari tea tolu wanogoe paki nia mau, ega m̃elu m̃oli pano, m̃ane ega tika.

¹²Tea waina e p̃okati naatam̃oli sikai, dapala e mate asa, ega vei tea maripunueana lomau.

¹³Go tea waina e da kusugoro mau, ma Sup̃e e mari a e sua nam̃elearuna; aga wo manigo dawona ki tokora sikai waina ega sava paki asa pano.

¹⁴Ma ragi waina naatam̃oli sikai e mari madaga paki tea ni m̃aladigi ki nia naga ega mari punue a ki nasurueana; p̃a viragi lua e ega m̃elu dua ki wede ni naviriana aginau naga ega mate.

¹⁵Go tea waina e p̃okati tamana, kite p̃ilana, ega vei tea maripunueana lomau.

¹⁶Go tea waina e panako naatam̃oli sikai, po sori a, kite e pe vei tea vap̃aiana doko nam̃elearuna, ega vei tea maripunueana lomau.

¹⁷Go tea waina e pasa sa ki tamana, kite p̃ilana, ega vei tea maripunueana lomau.

¹⁸Go ragi waina naatam̃oli maga eu pululu, go sikai e nadi sikai ki vatu sikai, kite e duki a ki nam̃elearuna weluakiana, go e da mate mau, ma e one nawewelena one:

¹⁹E pe moro duleana po surata paki katama ki tiko aneana, sogi ega vuoli ki tea waina e p̃okati a ma ega lagati dua e ragi ni natokom̃oliana aneana, po mari naga ega apu p̃ia.

²⁰Go ragi waina naatam̃oli sikai e p̃okati tea suasua naanoai aneana, kite tea suasua nagoroi aneana, ki nakau varati, go e mate etano ni nam̃elearuna, ega vei tea sikoana lomau.

²¹Ma e pe toko naaleatia sikai kite e pe rua ega ta pei tea sikoana mau: nalakena nae e pei m̃ane aneana.

²²Go ragi waina naatam̃oli maga eu dum̃ada mari ra, po diesiva ki nagoroi tiena sikai, go pipia aneana e m̃elu, go namarisakiana p̃ota e dika; euga mari tea waina e mari a ega vitua ki m̃ane, ega tapala waina nagoroi anawota ega wo doropusi a asa; go ega vitua ega tapala waina tea vasap̃otae maga euga wo noap̃otae a.

²³Ma namarisakiana e pe toko, p̃a vitua ki namauriana ega tip̃a namauriana,

²⁴Namatana ega tip̃a namatana, napatina ega tip̃a napatina, nam̃elearuna ega tip̃a nam̃elearuna, natuana ega tip̃a natuana,

²⁵Naasoana ega tip̃a naasoana, wotu ega tip̃a wotu, navaratiana ega tip̃a navaratiana.

²⁶Go ragi waina naatam̃oli sikai e duki namata ni tea suasua naanoai aneana, kite namata ni tea suasua nagoroi aneana, po mari sa ki nia; ega suasua ki nia naga ega m̃elu pei tea veresiana pano ega tip̃a namatana.

²⁷Go e pe tuki lesue napati sikai ni tea suasua naanoai aneana, kite napati sikai ni tea suasua nagoroi aneana; ega suasua ki nia naga ega m̃elu pei tea veresiana pano ega tip̃a napatina.

²⁸Go ragi waina oks sikai e dip̃a naatam̃oli sikai naanoai kite nagoroi, go e mate, oks wanogoe ega vei tea nadiana lomau ki vatu, go nap̃okasina ega ta pei tea kaniana mau; ma talakea ni oks ega ta pei tea vasatip̃aana mau.

²⁹Ma oks wanogoe e pe vivitip̃a sala vea, go e pe vei tea noasokisokiana paki talakeana, go e pe ta pavaigoro e mau, go e mari punue naatam̃oli sikai naanoai kite nagoroi; oks wanogoe ega vei tea nadiana ki vatu, go talakeana ma ega vei tea maripunueana.

³⁰Naulu ni natap̃augoroana e pe vei tea toropusiana asa, ega vitua ki naulu ni natauluaana ni namauriana aneana ega tapala tea mamau puti waina euga wo pei tea toropusiana asa.

³¹E pe tip̃a piakiki naanoai, kite e pe tip̃a piakiki nagoroi, euga mari paki nia ega tapala navasap̃otaeana wanogoe.

³²Oks wanogoe e pe tip̃a tea suasua naanoai kite tea suasua nagoroi; ega tua nawota adeada shekel ni silver rualima dolu, go oks wanogoe ega vei tea nadiana ki vatu.

³³Go ragi waina naatam̃oli sikai e lagai m̃orutano sikai, kite ragi waina naatam̃oli sikai e kili m̃orutano sikai po da p̃ogoro e mau, go oks sikai kite ass sikai e dowo paki asa, talakea ni m̃orutano ega lagati a;

³⁴Ega vitua ki m̃ane liliu paki talakeana, go tea mate ega vei tea aneana.

³⁵Go ragi waina oks ki naatam̃oli sikai e mari sa ki oks ki tea p̃ota sikai, go e mate; eroga sori tea mauri, po dap̃otae m̃ane kakana; go eroga moro dap̃otae tea mate.

³⁶Kite e pe vei tea ataeana naga oks wanogoe e pivitip̃a sala vea, go talakeana e da pavaigoro e mau; ega lagati lomau ki oks sikai ega tip̃a oks wanogoe, go tea mate ega vei tea aneana.