Read Nguna Togoa Etafe North EKSODAS 22 Bible Online

EKSODAS 22 - Nguna Togoa Etafe North bible

EKSODAS 22

¹Ragi waina naatam̃oli sikai e panako oks sikai, kite shiip sikai, po mari punue a, kite sori a; ega lagati oks ega lima ega tip̃a oks wanogoe, go shiip ega vati ega tip̃a shiip wanogoe.

²Tea vanako e pe vei tea vap̃aiana ragi waina e kili darave, po pei tea wokatiana po mate, nadana ega ta pei tea sikoana mau.

³Elo e pe sake sua asa, nadana ega vei tea sikoana; e pei tea waina ega lagati a; e pe ta peani te navatuna mau, ega vei tea soriana nalakena navanakoana aneana.

⁴Tea waina e panako epe vei tea vap̃aiana e pe mauri doko nam̃elearuna, e pe vei oks sikai, kite ass sikai, kite shiip sikai; ega lagati a ega rua.

⁵Ragi waina naatam̃oli sikai e mari vanua sikai kite roara ni vaine sikai e pei tea kaniana, go e kakaro tea kanikani aneana, go e ganikani vanua ki naata p̃ota sikai; ega lagati dua e tea wia liu ni vanua aneana, go tea wia liu ni roara ni vaine aneana.

⁶Ragi waina nakapu e soro pano, po pap̃ai tea makalikali maga, go taua maga ni napu ni korn, kite korn lawodu, kite namalasi e pei tea kaniana; tea waina e dokoni nasinu wanogoe ega lagati a lomau.

⁷Ragi waina naatam̃oli sikai e dua tea ni m̃aladigi ki nia m̃ane seara kite naloriki seara naga ega vavaigoro e, go e pei tea vanakoana m̃elu dua ki nasum̃a ki naata wanogoe; tea vanako e pe vei tea vap̃aiana, ega lagati a ega rua.

⁸Tea vanako e pe ta pei tea vap̃aiana mau, talakea ni nasum̃a ega umai paki m̃aladigi ki tea vasap̃otae maga, po pivisa e pe ta nadi ki nam̃elearuna paki naloriki ki tea ni m̃aladigi ki nia mau.

⁹Nalo ni sara naleo ni natapiriana, nalo ni oks, nalo ni ass, nalo ni shiip, nalo ni sugoro, nalo ni sara naleo waina eu puoli, waina te naata e noa naga, Tea waia e pei nae, naleo ki nara dua ega umai punusi tea vasap̃otae maga; go naata waina tea vasap̃otae maga euga wo dip̃akotovi a ega lagati a ega ruarua tea ni m̃aladigi ki nia asa.

¹⁰Ragi waina naatam̃oli sikai e pitua paki tea ni m̃aladigi ki nia ass sikai, kite oks sikai, kite shiip sikai, kite te nalo tuavati p̃ota sikai, naga ega vavaigoro e; go e mate, kite e pei tea marisakiana, kite e pei tea vuatiluaana, go te naata e da punusi a mau:

¹¹Navivisaana ki Yehovah ega toko namawota kaka ni nara dua, e pe ta nadi ki nam̃elearuna paki naloriki ki tea ni m̃aladigi ki nia mau; go talakeana ega tape a, go ega ta lagati a mau.

¹²Ma e pe vei tea vanakoana kiana, ega lagati dua talakeana.

¹³E pe vei tea katip̃oraworaeana, ega tape a umai ega vei tea noasokisoki; ega ta lagati tea waina e pei tea katip̃oraeana mau.

¹⁴Go ragi waina naatam̃oli sikai e datagovi tea ni m̃aladigi ki nia ki te navatuna, go e pei tea marisakiana, kite e mate, talakeana e da sikoti a doko mau, ega lagati a lomau.

¹⁵Talakeana e pe sikoti a doko ega ta lagati a mau: nae e pe vei tea ni namoriana, e pe umai nalakena namoriana kakana.

¹⁶Go ragi waina naatam̃oli sikai e surue nagoroi atara sikai waina e da pei tea vasasokiana mau, po one sikoti a, ega vakotovi a lomau naga ega vei anagoroi.

¹⁷Tamana e pe karai lomau naga ega tua e asa, ega rowogi silver ega vataka ni naulu ni navakotoviana ni nagoroi atara maga.

¹⁸P̃a ta suasua ki nagoroi wosidoa naga ega mauri doko mau.

¹⁹Tea mamau puti waina eu one sikoti nalo tuavati euga vei tea maripunueana lomau.

²⁰Tea waina e mari naviriana paki te sup̃e sikai masale ki Yehovah sikina, ega vei tea maripuolikiana.

²¹Go p̃a ta soro nam̃enaki‐atatoko mau, go p̃a ta diesoki a mau nalakena ku pei nam̃enaki‐atatoko maga navanua ni Ityipt.

²²Kuga ta mari sa ki te nagoroi malepu sikai mau, go te namalepu sikai mau.

²³Ku pe mari sa ki da, go eu kuapioso paki nau, a pe wo dogo nakuapiosoana adeada;

²⁴Go namaetoana aginau e pe wo pavaga, go a pe wo mari punue mu ki lova; go nagoroi animu maga eu pe wo pei malepu, go natumu maga eu pe wo pei namalepu.

²⁵Ku pe suasua ki m̃ane paki narei aginau, paki tea tika sikai sikoti ko, p̃a ta dapala tea suasua ki m̃ane paki nia mau; p̃a ta doropusi narogoviana asa mau.

²⁶Ku pe tape sugoro warua ki tea ni m̃aladigi ki‐go e pe vei nanadisokiana, p̃a moro dua e asa ega liliu ragi waina elo ega ko da musu mau:

²⁷Nalakena nae e sikina pei nakulu aneana, e pei aneana sugoro agi nawilina: ega wo maturu nasava? Go ega wo pakilina ragi waina ega wo kuapioso paki nau, naga aga wo dogo; nalakena kinau a saup̃ia.

²⁸P̃a ta pasa p̃alo ki Sup̃e mau, go p̃a ta pasa sa ki tea maraki sikai ni narei anigo mau.

²⁹P̃a ta mari daliali pitua ki seara ni navuraana ni nawa nakau anigo maga, go ni tea munuana visarasara anigo mau. Tea takalapa ni natumu naanoai maga p̃a tua au asa.

³⁰Dapala nogoe p̃a mari paki oks anigo maga, go shiip anigo maga: ega sikoti p̃ilana naaleatia ega larua; naaleatia kelatolu p̃a tua au asa.

³¹Go kuga vei naatam̃oli tapu aginau maga: go nap̃okasi waina e pei tea katip̃oraeana namalasi kuga ta gani a mau; kuga nadi ki nia paki koria maga.