Read Nguna Togoa Etafe North EKSODAS 24 Bible Online

EKSODAS 24 - Nguna Togoa Etafe North bible

EKSODAS 24

¹Go e noa ki Moses, e naga, P̃a sake umai punusi Yehovah, nimu ma Aaron, Nadab, go Abihu, go rualima larua ni tea matua maga ni Israel;

²Go kuga lotu uvea; go Moses ega masikina umai paki m̃aladigi ki Yehovah; ma nara euga ta umai paki m̃aladigi mau; go narei euga ta sake sikoti a mau.

³Go Moses e umai po dogorogo paki narei ki navasaana mamau puti ki Yehovah, go ki navasap̃otaeana mamau puti; go narei mamau eu pasadara ki nadaleo sikai maau, po naga, Navasaana mamau puti waina Yehovah e pasa asa tuga wo mari a.

⁴Go Moses e midiri navasaana mamau puti ki Yehovah, po duleana malip̃ogi sa, po davagi wede ni naviriana sikai etano ni tava, go tea lawodu rualima sikai tamate dua, pae naworawora ni Israel rualima sikai tamate dua.

⁵Go e dip̃aki lua natureai seara ni Israel natuna maga, waina eu pitua ki naviriana tap̃arakiana maga, po mari punue naviriana maga ni natam̃ateana paki Yehovah, kau natuda naanoai maga.

⁶Go Moses e dape namagovai ni nada, po doropusi a besin maga; go namagovai ni nada e meseura ki nia paki wede ni naviriana.

⁷Go e dape tusi ni navasasokiana, po peve a nadaliga maga ni narei; go eu naga, Tea mamau puti waina Yehovah e pasa asa tuga wo mari a, po dogo parati ki nia.

⁸Go Moses e dape nada, po meseura ki nia paki narei, po naga, Kuga leo, nada ni navasasokiana, waina Yehovah e po mari a paki mu nalo ni navasaana mamau puti wanogoe.

⁹Go Moses e sake pano, nara ma Aaron, Nadab, go Abihu, go rualima larua ni tea matua maga ni Israel eu mamau;

¹⁰Go eu punusi Sup̃e ki Israel; go etano ni natuana e dakiusi nawosiana sikai ni natareana ni safir, go dakiusi nakoroatelagi ki nam̃aruana.

¹¹Go e da doropusi nam̃elearuna navarapule maga ni Israel natuna maga mau: go eu leo punusi Sup̃e, po ganikani po munu.

¹²Go Yehovah e noa ki Moses, e naga, P̃a sake umai paki tava punusi au, go p̃a toko asa: go aga wo dua ko vatu welewelea dua, go nawotaeana go natip̃akiana, waina a po midiri a, naga p̃a vasa pisei ki da asa.

¹³Go Moses e duleana, nara ma tea suasua aneana Yoshua: go Moses e sake pano paki tava ki Sup̃e.

¹⁴Go e noa ki tea matua maga, e naga, Kuga toko raki gami tokora waia, pa pa aroga wo liliu umai punusi mu: go kuga leo, Aaron go Hur ero sikoti mu doko: naata waina e peani te naleo waina ega vei tea vasap̃otaeana, ega umai paki m̃aladigi ki da.

¹⁵Go Moses e sake paki tava pano, go napopouru e dap̃augoro tava.

¹⁶Go nasamasamaana ki Yehovah e doko tava Sinai, go napopouru e dap̃augoro e naaleatia latesa: go naaleatia kelarua e pioso paki Moses m̃elu m̃aleoputo ni napopouru.

¹⁷Go navunusiana ni nasamasamaana ni Yehovah e dakiusi nakapu kanikani nap̃au ni tava namata ni Israel natuna maga.

¹⁸Go Moses e sili paki m̃aleoputo ni napopouru, po sake paki tava pano: go Moses e doko tava naaleatia rualima pati go nap̃ogiana rualima pati.