Read Nguna Togoa Etafe North EKSODAS 26 Bible Online

EKSODAS 26 - Nguna Togoa Etafe North bible

EKSODAS 26

¹Go p̃a mari nasum̃atokoana ki tea kovagoro rualima sikai; p̃a mari ra euga vei tea ni linen vilokiana wia, go tea kesakesa, go tea miala‐kesakesa, go tea miala‐kalakala, euga vilake kerub maga nawosiana ki tea vau‐midiria mataisau.

²Navarauana ki tea kovagoro sikai ega vei kubit rualima dua tamate latolu, go naweleweleana ni tea kovagoro sikai kubit ega vati: tea kovagoro mamau puti euga vei totowo sikai.

³Tea kovagoro lima euga vei tea tasokatakiana dum̃ada likoliko ara; go tea kovagoro lima euga vei tea tasokatakiana dum̃ada likoliko ara.

⁴Go p̃a mari tea sarasoki maga ni tea kesakesa euga toko nadigi ni tea kovagoro sikai euga vae tatakisi tokora ni natasokatakiana; go p̃a mari ega tapala nogoe euga toko nadigi ni tea kovagoro waina e doko etaku tokora ni natasokatakiana kerua.

⁵P̃a mari tea sarasoki rualima lima euga toko tea kovagoro sikai, go tea sarasoki rualima lima euga toko nadigi ni tea kovagoro waina e doko tokora ni natasokatakiana kerua; tea sarasoki maga euga tum̃ada doko p̃ai ra.

⁶Go p̃a mari tagau matap̃ago‐rua ni kold rualima lima, po dasokata ki tea kovagoro maga ki tagau matap̃ago‐rua maga, sikai ega liko sikai: go nasum̃atokoana ega vei tea sikai mau.

⁷Go p̃a mari tea kovagoro maga ni nam̃au ni naninani euga vei tap̃aup̃au sikai dap̃augoro nasum̃atokoana: p̃a mari ra euga vei tea kovagoro rualima sikai tamate sikai.

⁸Navarauana ni tea kovagoro sikai ega vei kubit rualima dolu, go naweleweleana ni tea kovagoro sikai kubit ega vati: tea kovagoro rualima sikai tamate sikai wanogoe euga vei totowo sikai.

⁹Go p̃a tasokata ki tea kovagoro lima euga toko mamau, go tea kovagoro latesa euga toko mamau, go p̃a welua ki tea kovagoro kelatesa narae vea ni tap̃aup̃au.

¹⁰Go p̃a mari tea sarasoki rualima lima euga toko nadigi ni tea kovagoro sikai waina e doko etaku tokora ni natasokatakiana, go tea sarasoki rualima lima euga toko nadigi ni tea kovagoro waina e doko etaku tokora ni natasokatakiana kerua.

¹¹Go p̃a mari tagau matap̃ago‐rua ni brass rualima lima, po sara ki tagau matap̃ago‐rua tea sarasoki maga, po tasokata ki tap̃aup̃au, naga ega vei tea sikai maau.

¹²Go wora ni tea kovagoro maga ni tap̃aup̃au waina e dau sale waina e dau pele, namagovai ni tea kovagoro waina e dau pele, ega tau sale pae nataku ni nasum̃atokoana.

¹³Go kubit waina e dau taleva sikai, go kubit waina e dau taleva kerua, ni tea waina e dau pele ni navarauana ni tea kovagoro maga ni tap̃aup̃au, ega vei tea tau sale pae nadigi maga ni nasum̃atokoana taleva waia go taleva wanana, naga ega kovagoro e.

¹⁴Go p̃a magi tap̃aup̃au mari tea tap̃aukovagoro sikai ni nawili maga ni shiip anoai maga tea pupugiana miala, go tea tap̃aukovagoro sikai ni nawili maga ni siil maga elagi.

¹⁵Go p̃a mari napapa matolu maga agi nasum̃atokoana ni nakau akasia, waina euga lawodu.

¹⁶Kubit rualima sikai ega vei navarauana ni napapa sikai, go kubit sikai go namagovai ega vei naweleweleana ni napapa sikai.

¹⁷Konakona dua eroga toko napapa sikai, eroga toko pitata: p̃a mari ega tapala nogoe agi napapa mamau puti ni nasum̃atokoana.

¹⁸Go p̃a mari napapa maga wanogoe agi nasum̃atokoana, napapa rualima dua agi taleva ni sauth waina e paki sauth.

¹⁹Go p̃a mari laketano ni silver rualima pati euga toko etano ni napapa rualima dua wanogoe; laketano dua etano ni napapa sikai agi konakona dua kakana, go laketano dua etano ni napapa sikai agi konakona dua kakana:

²⁰Go agi taleva kerua ni nasum̃atokoana, taleva ni north, napapa rualima dua:

²¹Go laketano kakada ni silver rualima pati; laketano dua etano ni napapa sikai, go laketano dua etano ni napapa sikai.

²²Go agi nataku ni nasum̃atokoana waina e paki west, p̃a mari napapa latesa.

²³Go p̃a mari napapa dua agi naweluki dua ni nasum̃atokoana eroga toko natakuna.

²⁴Go eroga vataka ni tea rua etano, go dapala nogoe eroga vei tea mamau pa pa paki nap̃auna pa pa paki rig sikai: ega tapala nogoe agi sokata ki da; eroga vei agi naweluki dua.

²⁵Go euga vei napapa latolu, go laketano kakada maga ni silver, laketano rualima sikai tamate latesa; laketano dua etano ni napapa sikai, go laketano dua etano ni napapa sikai.

²⁶Go p̃a mari tea walagoto maga ni nakau akasia; elima agi napapa maga ni taleva sikai ni nasum̃atokoana,

²⁷Go tea walagoto lima agi napapa maga ni taleva kerua ni nasum̃atokoana, go tea walagoto lima agi napapa maga ni taleva ni nasum̃atokoana, agi natakuna waina e paki west.

²⁸Go tea walagoto ni m̃aleoputo, m̃aleoputo ni napapa maga, ega tuagoto pae namatap̃agona pa pa paki namatap̃agona.

²⁹Go p̃a vulutigoro napapa maga ki kold, go p̃a mari rig kakada maga ni kold euga vei nalia maga agi tea walagoto maga: go p̃a vulutigoro tea walagoto maga ki kold.

³⁰Go p̃a sike nasum̃atokoana ega tapala naleodawonakiana kakana waina e pei tea viseikiana paki‐go tava.

³¹Go p̃a mari tea taugorop̃otae sikai ni tea kesakesa, go tea miala‐kesakesa, go tea miala‐kalakala, go linen vilokiana wia: ega vei tea mariana ega vilake kerub maga, nawosiana ki tea vau‐midiria mataisau:

³²Go p̃a sara ki nia tea lawodu pati ni akasia, tea vulutigoroana ki kold (tagau kakada maga euga vei tea ni kold), euga lawodu laketano maga ni silver.

³³Go p̃a sara ki tea taugorop̃otae etano ni tagau matap̃ago‐rua maga, go p̃a tape areka ni nanoasokisokiana paki ekopu ni tokora wanogoe, ekopu ni tea taugorop̃otae: go tea taugorop̃otae ega manimu dap̃otae namawota ni tokora tapu go ni tokora tapu p̃arua liu.

³⁴Go p̃a toropusi tea tap̃augoro elagi ni areka ni nanoasokisokiana ekopu ni tokora tapu p̃arua liu.

³⁵Go p̃a lawo ki wede etaku ni tea taugorop̃otae, go nakau ni nasulu kivea ni wede ega toko taleva ni nasum̃atokoana waina e paki sauth, go p̃a toropusi wede ega toko taleva ni north.

³⁶Go p̃a mari tea tausiliki sikai agi namata ni Tap̃aup̃au, ni tea kesakesa go tea miala‐kesakesa, go tea miala‐kalakala, go linen vilokiana wia, nawosiana ki tea turi‐midiria.

³⁷Go p̃a magi tea tausiliki mari tea lawodu lima ni akasia, go p̃a vulutigoro ra ki kold; tagau kakada maga euga vei tea ni kold: go p̃a madeada daki laketano lima ni brass.